LAPSH i St. Gallenit reagon ndaj njoftimit të LAPSH të Cyrihut

"Për t`i mbuluar parregullsitë e tyre organizative dhe problemet e akumuluara ndër vite kanë adresuar në vazhdimësi akuza të pabaza, në adresë të prindërve, në adresë të institucioneve në atdhe apo në adresë të kolegëve"

Njoftimi i postuar ditë më parë nga LAPSH i Kantonit të Cyrihut në lidhje me problemet që, siç pretendohet, kanë lindur me subjektin e ri të mësimit shqip “Shkollën shqipe” të Zvicrës, ka shkaktuar reagim edhe nga LAPSH i Kantonit të St. Gallenit.

Në vazhdim, albinfo.ch publikon reagimin e plotë të kryesisë së LAPSH, St. Gallen.

Ne kryesia e LAPSh për kantonin e St. Gallenit reagojmë ashpër ndaj njoftimit të LAPSH të Cyrihut se gjoja «Ambasada e Shqipërisë ndërhyn pa të drejtë në punët tona», duke e atakuar edhe “Shkollën Shqipe” në Zvicër, të botuar në portalin albinfo.ch, të datës 13 shtator 2022. Vetë titulli  dëshmon veprimet e tyre të njëanshme, të cilat neve në LAPSH nuk na befasojnë sepse për t`i mbuluar parregullsitë e tyre organizative dhe problemet e akumuluara ndër vite kanë adresuar në vazhdimësi akuza të pabaza, në adresë të prindërve, në adresë të institucioneve në atdhe apo në adresë të kolegëve. Për hir të lexuesve dhe në veçanti për hir të prindërve shqiptarë kudo ku janë reagojmë duke i numëruar vetëm disa fakte:

1. Fakt është se LAPSH Cyrih në vazhdimësi ka adresuar kritika në adresë të ambasadave, institucioneve etj., dhe tani kur ato veprojnë, kur ato ndihmojnë, ata vërsulen për të mbuluar mos punën e tyre.
2. Habit fakti se pse koordinatori i LAPSH të Zyrihut Nexhat Maloku struket pas emrit të një prindi dhe nuk del haptazi të përballet me të pavërtetat, sepse ai është shkaktari kryesor i këtyre problemeve, qoftë si kryetar në nivele Zvicre (më se 12 vjet) apo koordinator LAPSh Cyrih.
3. Fakt është se nga viti 2013 deri në vitin 2019 janë munduar mësues të dalluar të hapin pikat shkollore në kuadër të Lapsh-it por pikërisht koordinatori i LAPSH Cyrih Nexhat Maloku, nuk lejoi një gjë të tillë. Shih linkun ( reagimin e LAPSh.it të Kantonit të San Gallenit) të botuar në vitin 2018 në portalin albinfo.ch: https://www.albinfo.ch/kryesia-e-l-a-p-sh-per-zvicer-eshte-pengese-kryesore-ne-organizimin-e-shkolles-shqipe
4. Fakt është se me këto veprime në vazhdimësi kanë shkelur edhe nenin 34 të Statutit të LAPSH në të cilin thuhet se: “Çdo mësues-e, që është i-e punësuar në kuadër të L.A.P.Sh “ Naim Frashëri” në Zvicër (pa marrë parasysh kantonin ku punon), nëse arrin të bëj mbi 12 nxënës, mund të hapë një pikë shkollore dhe të punoj si mësues-e”.
5. Fakt është se ata kanë probleme të brendshme dhe mundohen që problemet t`i adresojnë në adresën e të tjerëve, por një gjë të tillë nuk shkon te prindërit shqiptarë. Në Kuvendin e fundit të LAPSH për Zvicër, ata në momentin që nuk arritën ta mbajnë në “status quo” LAPSH-in, “delegatët e Kantonit të Cyrihut lëshuan demonstrativisht kuvendin”, Shih artikullin: https://prointegra.ch/liburn-mehmeti-kryetar-i-ri-i-lapsh-it-shpreh-zotimin-per-ti-bashkuar-dy-shkollat-shqipe-ne-zvicer/
6. Fakt është se ata në pamundësi për të hap pika të reja shkollore, ashtu siç shkruajnë edhe vetë në njoftim “Në Zvicër dhe në kantonin e Cyrihut, ka ende komuna dhe qytete ku mësimi, për arsye të ndryshme nuk zhvillohet”, ata lëshojnë lumë akuzash ndaj “Shkollës Shqipe” në Zvicër, e cila ka arritur të hap dhjetëra e dhjetëra shkolla shqipe në Kantonin e Cyrihut si dhe në mbarë Zvicrën. Ata në vend që të gëzohen me këto suksese i sulmojnë.
7. Edhe një fakt edhe më i rëndë se LAPSh i Kantonit të Cyrihut në pamundësi për të mbajtur nën kontroll LAPSh-in për Zvicër ka bërë përpjekje për të përçarë edhe kryesinë kantonale të Kantonit të St. Gallenit.
8. Dhe fare në fund ne si LAPSh i Kantonit të St. Gallenit do të vazhdojmë të punojmë në frymën e bashkëpunimit me qëllim që të përfshijmë sa më shumë nxënës në shkollat shqipe dhe nuk kemi kohë për sulme dhe përçarje si LAPSh i Kantonit Të Cyrihut.

 

L.A.P.Sh. “Naim Frashëri” për Kantonin e St. Gallenit

Mehmetali Sherifi  – kryetar

 

 

---