Në BE përdoren shumë pesticide, kërkohet përgjysmimi i përdorimit të tyre

Politikëbërësit dhe shtetet anëtare të Bashkimit Evropian do të duhet të bëjnë shumë më tepër nëse blloku shpreson të arrijë një objektiv të propozuar për përgjysmimin e përdorimit të pesticideve kimike deri në vitin 2030, tha sot Agjencia Evropiane e Mjedisit (EEA).

Në një analizë për ndikimin e pesticideve në shëndetin e njeriut dhe ekosistemet në Evropë, agjencia tha se prodhimi bujqësor i BE-së, bazohet ende në vëllime të larta të pesticideve kimike për të ruajtur rendimentin e të korrave.

Shitjet e pesticideve në BE ishin relativisht të qëndrueshme, në rreth 350 000 tonë në vit nga 2011 deri në 2020.

Sasitë më të mëdha të substancave më aktive u shitën në Gjermani, Francë, Spanjë dhe Itali, katër prodhuesit kryesorë bujqësorë në BE-në 27-anëtare.

Në mesin e vitit 2022, Komisioni Evropian paraqiti një propozim legjislativ, që ndër të tjera parashikon reduktimin e përdorimit të pesticideve me 50% deri në fund të dekadës.

Ky propozim ka hasur një rezistencë të fortë nga kritikët që shqetësohen për ndikimin e tyre në industritë bujqësore dhe sigurinë ushqimore evropiane.

“Përdorimi i gjerë i pesticideve është një burim kryesor i ndotjes së ujit, tokës dhe ajrit, si dhe një nxitës i humbjes së biodiversitetit dhe rezistencës ndaj dëmtuesve”, tha agjencia në Kopenhagë, transmeton dpa përcjell albinfo.ch.

Ekspozimi i njeriut ndaj tyre lidhet me sëmundje kronike si kanceri dhe zemra, sëmundjet e frymëmarrjes dhe ato neurologjike.

Në një studim gjithëpërfshirës në pesë vende evropiane midis 2014 dhe 2021, të paktën dy pesticide u zbuluan në 84% të mostrave të urinës, një normë e cila ishte shqetësuese sipas ekspertit të EEA-s, Dario Piselli.

Fëmijët vazhdimisht kishin përqendrime më të larta të pesticideve sesa të rriturit dhe ishin veçanërisht të prekshëm ndaj efekteve negative shëndetësore.