Dëmet nga stuhia në La Chaux-de-Fonds, mund të jenë mbi 100 milionë CHF

Siguruesit vlerësojnë dëmin në dhjetëra apo edhe qindra miliona franga dhe do të duhen disa vite për të rikthyer gjithçka në këmbë

Vlera e saktë e dëmeve të shkaktuara nga stuhia e ashpër e së hënës në La Chaux-de-Fonds të Neuchâtel pritet të bëhet publike mbrëmjen e së martës.

Megjithatë, mes kulmeve të grisura, dritareve të thyera dhe pemëve të shkulura, rindërtimi mund të jetë i shtrenjtë, siguruesit vlerësojnë dëmin në dhjetëra apo edhe qindra miliona franga dhe do të duhen disa vite për të rikthyer gjithçka në këmbë, shkruan RTS.

Të martën po ashtu ka filluar pastrimi dhe riparimi i infrastrukturës. Kështu, autoritetet u kanë bërë thirrje qytetarëve që të kufizojnë lëvizjet e tyre për shkak të rrezikut nga rënia e mbetjeve të dëmeve, përcjell albinfo.ch.

Trafiku hekurudhor dhe transporti publik janë të bllokuar në gjithë zonën.

Stuhia që u vlerësua se ishte 217 km/h goditi La Chaux-de-Fonds rreth orës 11:30 të mëngjesit të së hënës, duke shkaktuar vdekjen e një personi dhe duke plagosur rreth 40 persona, shkruan RTS.

Shumë automjete u shkatërruan, çatitë u shkulën dhe dhjetëra pemë u rrëzuan.

---