Ministrja Rizvanolli, në Berlin: Bizneset gjermane të investojnë në Kosovë

Foto FB: Ministria e Ekonomisë

Ministrja e Ekonomisë në Kosovë, Artane Rizvanolli, gjatë ditës së sotme është pritur në Berlin, në takim nga Anna Lührmann, ministre gjermane e Shtetit për Evropë dhe Klimë.

Sipas njoftimit nga Ministria e Ekonomisë, me këtë rast Rizvanolli i ka prezantuar ministres Lührmann “Pakon investive të Kosovës për energji 2023 – 2025”, e cila parasheh ndërtimin e kapaciteteve gjeneruese e akumuluese prej 950 megavatë përmes skemave konkurruese.

Tutje në takim është diskutuar mbi hapat e ardhshëm për Partneritetin Klimatik mes Gjermanisë dhe Kosovës, teksa Lührmann ka përgëzuar Rizvanollin për punën e bërë në Pakon Investive, e cila ofron mundësi tërheqëse investimi për kompanitë gjermane të sektorit të energjisë, duke filluar me ankandin e parë solar 100 megavatë të Kosovës, përcjell albinfo.ch.

Ministrja Rizvanolli ka njoftuar që këto projekte konkrete mbështeten edhe nga puna e bërë në legjislacion, siç është rasti me Ligjin e Parë për Burime të Ripërtërishme të Energjisë, i cili është miratuar në Qeveri dhe përmirëson edhe më tej ambientin për investime në Kosovë.