Edhe 10 milionë të planifikuara për blerjen e ambasadave

Ambasada Gjermane

Qeveria e Kosovës ka miratuar muajin e shkuar vendimin për fillimin e procedurave për blerjen e objektit për nevoja të Ambasadës së Kosovës në Berlin, si dhe blerjen e objektit rezidencial në Washington.

Edhe pse Qeveria nuk e ka bërë të ditur koston financiare për blerjen e këtyre objekteve, tani me miratimin e projektbuxhetit për vitin 2024, i cili ka arritur në Kuvend, figuron shuma prej 10 milionë e 125 mijë eurosh e ndarë për blerjen e ambasadave, shkruan indeksonline.

Për vitin 2024 janë paraparë të ndahen 10.125.000 euro për blerjen e ambasadave, në vitin 2025  janë planifikuar 14.000.000, ndërsa për vitin 2026 janë planifikuar të ndahen 14.125.000 euro.

“Më 18 tetor të këtij viti, Qeveria e Republikës së Kosovës ka zhvilluar mbledhje elektronike, në të cilën është miratuar vendimi për fillimin e procedurave për blerjen e objektit për nevoja të Ambasadës së Republikës së Kosovës në Berlin, Republika Federale e Gjermanisë, si dhe blerjen e objektit rezidencial në Washington D. C., në Shtetet e Bashkuara të Amerikës”, thuhet në njoftimin e Qeverisë, përcjell albinfo.ch.

Para 11 muajve Qeveria kishte ndarë 2.47 milionë euro për blerjen e objektit të Ambasadës së Kosovës në Londër.

Qeveria për herë të parë në vitin 2021 ndau 10 milionë euro për blerjen e ambasadave në shtete aleate. Deri para këtij vendimi Kosova ka pasur në pronësi vetëm objektin në Belgjikë.