Më 1 janar 2024 hyn në fuqi liberalizimi i vizave për Kosovën

Komisioni Evropian të mërkurën miratoi Pakon e Zgjerimit 2023, duke ofruar një vlerësim të detajuar të gjendjes dhe progresit të bërë nga shumë shtete, në veçanti edhe për Kosovën, përcjell albinfo.ch.

Me theks të veçantë u ripërsërit nga presidentja e Komisionit Evropian, Ursula von der Leyen, se më 1 janar 2024 do të hyjë në fuqi liberalizimi i vizave për Kosovën.

Po ashtu, në mbledhjen e KE-së u tha se Kosova mbeti e përkushtuar në rrugën e saj evropiane.

“Vendi vazhdoi të përafrohet plotësisht vullnetarisht me Politikën e Përbashkët të Jashtme dhe të Sigurisë të BE-së, duke përfshirë dënimin e luftës së agresionit të Rusisë kundër Ukrainës dhe miratimin e masave kufizuese kundër saj. Periudha raportuese dëshmoi arritje legjislative, duke përfshirë një reformë të rëndësishme zgjedhore. Megjithatë, duhet bërë më shumë punë, duke përfshirë planin e veprimit për reformat në drejtësi. Situata në veri të Kosovës është prekur nga disa kriza, ku e fundit ishte sulmi i dhunshëm kundër policisë së Kosovës më 24 shtator 2023. Në lidhje me normalizimin e marrëdhënieve me Kosovën, teksa është arritur një marrëveshje në Dialogun e lehtësuar nga BE-ja, Kosova dhe Serbia ende nuk e kanë filluar zbatimin e detyrimeve të tyre përkatëse, të cilat janë të detyrueshme për palët dhe pjesë kyçe e rrugëve të tyre evropiane”, u tha për Kosovën.