Kosovë: Një polic ka vdekur në vendin e tij të punës në Jarinje, reagon Sveçla

Një polic ka vdekur në vendin e tij të punës, në pikën kufitare në Jarinje.

Polici, tanimë i ndjerë, ishte duke e kryer ndërrimin e natës, kur u gjet i vdekur nga kolegët e tij, teksa për vdekjen e tij, ngushëllime familjes i ka shprehur ministri i Punëve të Brendshme, Xhelal Sveçla, përcjell albinfo.ch.

Ai tha se Rexhep Sejdiu do të kujtohet si zyrtar i përkushtuar e i palodhur.

“Të angazhuar në luftë kundër çdo kriminaliteti veçanërisht viteve të fundit në veriun e vendit tonë si pjesëtar i Njësisë së Ndërhyrjes së Shpejtë të kufirit. Bashkë me kolegët e tij, Rexhepi para një viti i rezistoi me qëndrueshmëri bllokimit 19 ditor në Jarinje pasi kishin arrestuar ish-zyrtarin policor Dejan Pantiq”, ka thënë ai.

Tutje ai u shpreh se lajmin për vdekjen e Sejdiut e ka pranuar me pikëllim të thellë.

”Zyrtari policor Rexhep Sejdiu do të mbetet përherë në mendjet e të gjithë neve që kishim fatin ta takonim gjithnjë në nivel të detyrës e kolegëve që punuan e shërbyen çdo ditë bashkë me të. Shpreh ngushëllimet e mia më të sinqerta familjes së tij, nënës, bashkëshortes e fëmijëve të tij. Të gjithë kolegëve e Policisë së Kosovës për humbjen e pjesëtarit të tyre”, u shpreh tutje ai.