Rama për turizmin: Bilanci më pozitiv i shënuar ndonjëherë

9.54 milionë vizitorë të huaj deri në nëntor vizituan Shqipërinë

Kryeministri i Shqipërisë, Edi Rama, ka njoftuar se viti 2023 ka shënuar vitin me bilancin më pozitiv sa i përket numrit të turistëve.

Sipas tij, 9.54 milionë turistë të huaj kanë zgjedhur Shqipërinë si destinacion turistik deri në muajin nëntor, përcjell albinfo.ch.

“Dhjetori vazhdon të sjellë ende flukse mysafirësh nga të gjitha vendet e botës, që duan ta shijojnë Shqipërinë edhe në dimër”, u shpreh ai, shkruan RTSH.

Rama përmendi se vizitorët nga Kosova zënë peshën kryesore të hyrjeve turistike, duke u rikthyer disa herë brenda vitit.

“Përveç vizitorëve besnikë nga Kosova që zënë peshën kryesore të hyrjeve turistike, duke u rikthyer disa herë brenda vitit, italianët kanë qenë surpriza e këtij viti, me 872 mijë vizitorë, Mali i Zi, Spanja, Franca e Gjermania me rritje rekord, e po ashtu Shqipëria po vizitohet gjithnjë e më shumë nga turistë që vijnë nga Turqia, Kina, e vendet nordike”, ka shtuar tutje ai.

 

---