Administratori shqiptar në MRG, storie suksesi në Itali

Nga një punëtor i thjeshtë, tani si themelues e administrator i shoqërisë MRG, prej një dyqani në lokalitetin Borghesiana në Romë, Zef Marku vepron si furnitor në tregun e pajisjeve elektronike dhe elektroshtëpiake në rajonin italian të Lacios, përcjell albinfo.ch.

Duket se punësimi i parë në Romë konsiston pranë një dyqani shitjesh materialesh sportive në lagjen Centocelle.

“Përveçse në praktimin e gjuhës italiane në një vend të huaj, ajo punë më ka ndihmuar shumë në përmirësimin e komunikimit me personat, pa menduar ende atëherë se në një të ardhme do të ballafaqohesha me një klientelë në cilësinë e furnizuesit siç jam sot. Nën organizimin e dyqanit, merrja pjesë në kurset e formimit për praktika sportive edhe jashtë Romës”, tregon Marku.

Kalimi në punësimin pranë një sipërmarrjeje shpërndarjeje pajisjesh elektroshtëpiake i mundëson administrim logjistik magazinash të tyre dhe i jep autonominë ekonomike të mbajë në jetë përkohësisht një dyqan familjar në Bërdicë të Shkodrës.

Specializimi në riparimin e elekroshtëpiakeve zgjeron mundësinë për aktivitet më të pavarur, materializuar në administrim magazinash dhe krijimin e shoqërisë MRG më 2019. “Në këtë periudhë u fokusova në rritjen e aftësive sipërmarrëse dhe zgjerova kapacitetin e ndërveprimit me klientët, duke krijuar taktika komunikimi e lidhjeje me ta e familjarët e tyre”, vazhdon rrëfimin e tij. “Shtimi i klientëve ndodhi në periudhën e pandemisë Covid-19, gjatë së cilës nuk e ndërpreva aktivitetin e shpërndarjes.

Hapa dyqanin e MRG në Borghesiana, hap për të cilin fitova siguri ta kryej pasi kisha krijuar kontakte me një seri shoqërish të sektorit të elektroshtëpiakeve. Në bazë të një marrëveshjeje furnizimi, 68% të mallrave e marr prej Eurocom, që në Itali është një prej operatorëve kryesorë italianë të specializuar në shpërndarjen e materialeve në këtë sektor e atë të elektronikës së konsumit.”

Ndihmon sipërmarrësit si Marku të kenë klientelë të vazhdueshme dhe mundësi publicizimi të aktivitetit një tendencë zhvendosjeje demografike nga qendra e qyteteve të mëdha, si Roma në lokalitete më periferike, ku kostoja e jetës, qerave dhe e pasurive të paluajtshme janë më të përmbajtura. Në Borghesiana ai është një prej disa sipërmarrësve shqiptarë të lokalitetit. Bisedën me ne e mbyll duke na pohuar se titullariteti i një shoqërie i mundëson të projektojë më tej fuqizimin e saj dhe përfshirjen e fuqizuar në aktivitet të rrethit familjar për ta konsoliduar e zgjeruar në perspektivë.

Një analizë bërë publike pak javë më parë prej Infocamere, entitet specializuar në përpunimin e të dhënave nga dhomat italiane të tregtisë, fotografon në 38.665 numrin e sipërmarrjeve në vendin fqinj me titullar të lindur në Shqipëri dhe një raport studimor i 2022-ës informonte se në Lacio numri i tyre ishte 1.543.