Largohen detyrimet doganore për importet industriale

SECO @SECO_CH, X

Që nga 1 janari Zvicra nuk vendos më detyrime doganore për importet e produkteve industriale, pavarësisht nga origjina e mallrave, njoftoi të martën Sekretariati Shtetëror për Ekonominë (Seco). Masa lejon “një fitim vjetor prosperiteti” prej 860 milionë frangash.

Reforma, e miratuar nga Parlamenti në tetor 2021, hyri në fuqi pas rreth dhjetë vjetësh punë përgatitore. Do të përfitojnë si importuesit, nëpërmjet heqjes së detyrimeve doganore dhe lehtësive administrative, ashtu edhe konsumatorët, të cilët do të përfitojnë nga çmimet më të ulëta, vëren Seco.

Masa, vijon Seco, gjithashtu lehtëson furnizimin me inpute konkurruese, gjë që promovon diversifikimin dhe rrit produktivitetin e kompanive zvicerane. “Marrëdhëniet tregtare në përgjithësi do të bëhen më efikase dhe konkurrenca do të forcohet”, beson Seco.

Në Zvicër produktet industriale përfshijnë inputet në proceset e prodhimit (p.sh. mallrat kapitale, lëndët e para, kripën, produktet gjysëm të gatshme dhe makineritë) dhe mallrat e konsumit, të tilla si biçikletat, pajisjet shtëpiake, veshjet ose këpucët. Nga ana tjetër, produktet bujqësore dhe të peshkimit nuk konsiderohen si të tilla dhe do të vazhdojnë të jenë subjekt i detyrimeve doganore.

Aty ku konkurrenca funksionon, konsumatorët duhet të përfitojnë nga kosto më të ulëta. Konfederata do ta sigurojë këtë nëpërmjet një sistemi monitorimi.

Berna nuk planifikon asnjë masë kompensimi të drejtpërdrejtë për humbjen e të ardhurave doganore për shkak të kësaj heqjeje të detyrimeve doganore. Megjithatë, vëren Seco, duhet të presim një rritje të prodhimit ekonomik dhe rrjedhimisht të të ardhurave tatimore për shtetin, të cilat duhet të kompensojnë rreth 30% të humbjes së të ardhurave doganore në afat të mesëm.

Nëse marrim parasysh ekonominë në tërësi, “efektet pozitive e kalojnë shumë humbjen e të ardhurave të Konfederatës”, saktëson më tej Seco./RTS