Haradinaj: I bindur në pafajësinë e Lekajt

Ramush Haradinaj, Facebook

Kryetari i Aleancës për Ardhmërinë e Kosovës, Ramush Haradinaj, gjatë ditës ka reaguar për vendimin e Gjykatës Themelore të Prishtinës për dënimin me burg të Pal Lekajt për keqpërdorim të detyrës zyrtare dhe dëmtim të qëllimshëm të buxhetit të shtetit.

Ai thotë se është i befasur me vendimin e gjykatës.

“Jam i befasuar nga vendimi i sotëm i Gjykatës Themelore për rastin e kolegut Pal Lekaj! Dua të besoj fuqishëm në sistemin e drejtësisë dhe në Gjykatën e Apelit e cila do ta zbardhë të vërtetën dhe do ta shkarkojë nga çdo akuzë ish-ministrin Lekaj. Çdo person është i pafajshëm deri në një vendim të formës së prerë! I bindur në pafajësinë e kolegut Lekaj!”, shkruan Haradinaj.

Pal Lekaj u dënuar me 3 vjet e tetë muaj burgim për rastin e 53-milionëshit. Lekaj i kishte dhënë këtë shumë konsorciumit të Bechtel Encas për autostradën Arbën Xhaferi.