Nuk miratohet kërkesa e Bashës për të ndihmuar Kosovën me 50 milionë dollarë

Pas rrëzimit të amendamentit, Lulzim Basha ka thënë se strategjia e sigurisë kombëtare do të duhet t’i nënshtrohej debatit

Kuvendi i Shqipërisë nuk e ka miratuar kërkesën e deputetit Lulëzim Basha për të ndihmuar me 50 milionë dollarë Kosovën.

75 vota ishin kundër amendamentit të Bashës, i cili kërkoi që 50 milionë dollarë nga buxheti i shtetit të shkonin për mbrojtjen e sigurisë së Kosovës, transmeton albinfo.ch.

Pas rrëzimit të amendamentit, Lulzim Basha ka thënë se strategjia e sigurisë kombëtare do të duhet t’i nënshtrohej debatit.

“Dita e sotme ka një monotoni dhe një të re. Monotonia i intereson Edi Ramës. Nuk pati asnjë akt të opozitës për t’i kërkuar llogari Edi Ramës dhe qeverisë. Ky teatër do të ishte i pamundur nëse deputetët e opozitës do të vinin interesat e qytetarëve në plan të parë. Sot është miratuar një dokument që quhet strategjia e sigurisë kombëtare. Strategjia duhej t’i nënshtrohej një debati politik e publik. E pafalshme që një vend i NATO-s të zvarritet me dokumente burokratikë”, ka thënë ai, i cili pyeti nëse përbën kërcënim për sigurinë e Shqipërisë minimi dhe sabotimi i integritetit territorial të Kosovës, si ato në Banjskë.

“Është e pafalshme që kjo pyetje vetëm 6 muaj pas sulmit në Banjskë nuk shtrohet. A përbën rrezik për sigurinë kombëtare të Shqipërisë dobësimi i aftësive mbrojtëse të strukturave mbrojtëse të Kosovës? A ka në dorë Shqipëria të bëjë diçka për t’i ardhur në ndihmë Kosovës? A duhet të bëjmë diçka që Kosova të marrë sinjalin që Shqipëria nuk po fërkohen duart, por po kontribuon”, ka thënë Basha.

 

---