Nga 3 prilli, Kosova me gjoba të ashpra në komunikacion, sa do të jenë efektive?

Policia e Kosovës

Nga 3 prilli (e mërkurë), Policia e Kosovës do të shqiptojë gjoba të reja, deri në 500 euro për kundërvajtje të ndryshme në trafik, përfshirë edhe heqjen e pikëve dhe ndalimin e drejtimit të automjetit.

Në një intervistë për Radio Kosovën, drejtori i Komunikacionit Rrugor në Policinë e Kosovës, Jeton Rexhepi, thotë se përmes këtyre ndryshimeve synohet rritja e sigurisë rrugore për të gjithë pjesëmarrësit në trafik.

“Gjoba për rrypinë e sigurisë është 150 euro. Përdorimi i telefonit, nëse ndalohet për herë të parë, shoferi dënohet me 100 euro, për herë të dytë 200 euro, ndalesë 3 muaj dhe minus 2 pikë negative, dhe nëse ndalohet më tepër se dy herë, gjoba është 500 euro, 6 muaj e ka të ndaluar drejtimin e automjetit dhe minus 3 pikë. Tejkalimi me ligj të ri është 200 euro dhe 3 muaj ndalim të drejtimit të automjetit dhe 2 pikë negative”, tha ai.

Këto ndryshime që pritet të hyjnë në fuqi nuk do të ulin numrin e aksidenteve, thotë eksperti i komunikacionit, Nol Dedaj.

“Totalisht është e humbur rruga e masave preventive për siguri më të madhe në Kosovë. Nëse e marrim ne këtë sikur janë përcaktuar gjobat herën e parë, kaq, herën e dytë, herën e tretë e herën e katër, duhet me pas një softver goxha të fortë për 600-700 mijë shoferë”, theksoi ai.

E për disa qytetarë që intervistojë Radio Kosova, këto rregulla janë të mirëseardhura. Madje ata thonë se si pjesëmarrës të trafikut që janë, le t’i ndëshkojnë edhe ata nëse i shkelin rregullat.

“Gjobat nuk më duken të larta, si ngasëse e makinës qe 18 vite, nuk e kam sigurinë sot me dal në rrugë me qetësinë më të plotë”, tha ai.

Ndryshe, ndër masat e shqiptuara pas 3 prillit është edhe konfiskimi i targave për ato automjete që janë të paregjistruara në afatin pas 30 ditësh dhe dënim me 500 euro gjobë, për mospërdorimin e helmetës gjoba është 100 euro dhe shumë kundërvajtje të tjera.