Kukës: Zjarret shpërthejnë minat luftarake që dyshohet se janë nga lufta e fundit në Kosovë

Ilustrim, Agjencia e Menaxhimit Emergjent

Në Kukës është aktivizuar një tjetër vatër zjarri pasditen e sotme, në vendin e quajtur Fierza e Qemës, në fshatin Kishaj të bashkisë Has.

Sipas raportimeve, ekipet e shërbimit zjarrfikës të bashkisë Has, bashkë me punonjësit e shërbimit pyjor, janë nisur drejt vendit të ngjarjes për të luftuar flakët, përcjell albinfo.ch.

Ndërkohë, në dy vatrat e tjera aktive, në Zogaj të Tropojës dhe Letaj të Hasit, po punohet për izolimin e tyre, raporton oraneës.

Në fshatin Peraj të Hasit, pranë kufirit me Gjakovën, zjarri ka shpërthyer disa mina luftarake, prezenca e të cilave mendohet të jetë që prej luftës në Kosovë në vitin 1999. Për shkak të kësaj situate, punonjësit e shërbimeve zjarrfikëse kanë ndërprerë punën, duke ia lënë vendin forcave ushtarake që do të monitorojnë situatën në mënyrë të specializuar.

Vatrat e zjarrit po ndikohen nga temperaturat e larta, thatësira dhe erërat e forta të zonës.