Vuçiq pas takimit me Lajçakun: Do të përgjigjemi me masa serioze në 72 orët e ardhshme

screenshot

Presidenti i Serbisë, Aleksandar Vuçiq,, ka thënë se do të dalë me përgjigje me “masa serioze” në 72 orët e ardhshme. Deklaratën e ka dhënë pas takimit që ka pasur të martën me emisarin e Bashkimit Evropian për dialogun Kosovë-Serbi, Miroslav Lajçak.

Siç ka thënë Vuçiqi, ai do t’i adresohet popullit serb për kërkesat e Serbisë pas “sulmeve brutale mbi popullatën serbe në veri të Kosovës”.

“Sot patëm biseda të ndara dyorëshe për Kosovën, fillimisht me Miroslav Lajçakun dhe me ambasadorin amerikan, Christopher Hill dhe në 72 orët e ardhshme do t’i drejtohemi publikut… Ne do t’u përgjigjemi me masa serioze në 72 orët e ardhshme. Serbia është gjithmonë pro dialogut, unë jam gjithmonë i gatshëm”, ka shkruar Vuçiq në Instagram.

Presidenti Vuçiq e ka akuzuar edhe bashkësinë ndërkombëtare “se nuk po i përmbush ato që i kërkon Serbia”.

“…Do të kemi shumë takime të rëndësishme, sepse duhet të luftojmë për pozitën e Serbisë në botë, të kërkojmë aleatë. Ne do të bëjmë gjithçka që është e mundur për atë çështje. Është e qartë që Kurti dëshiron shkatërrimin e persekutimin e popullatës serbe”, ka theksuar ai.