Sulmi ndaj kryetarit të Pejës, Policia thotë se nuk e di cili është motivi

Mëngjesin e së shtunës dy persona kanë sulmuar kryetarin e Komunës së Pejës, Gazmend Muhaxheri. Të njëjtit i kanë shkaktuar lëndime trupore.
Dy të dyshuarit për sulmin janë arrestuar dhe janë dërguar në mbajtje. Policia e Kosovës ka njoftuar të dielën për rastin, duke thënë që ende nuk dihet motivi.

“Dy meshkuj kosovarë (njëri prej tyre kryetari i Komunës së Pejës) derisa ishin duke ecur në rrugë janë sulmuar fizikisht nga dy të dyshuarit meshkuj kosovarë, me ç ‘rast viktimat kanë pësuar lëndime trupore. Pas një pune hetimore, dy të dyshuarit janë lokalizuar dhe janë arrestuar nga policia. Motivi i rastit nuk dihet. Në konsultim me prokurorin është iniciuar rasti si dhe dy të dyshuarit pas intervistimit janë dërguar në mbajtje. Rasti është nën hetime”, thuhet në raportin 24-orësh të Policisë së Kosovës.