Karakteristikat e popullsisë në Kosovë

Të enjten, Agjencia e Statistikave të Kosovës ka publikuar të dhënat për numrin e përgjithshëm të banorëve rezident në Kosovë.

Banorë të regjistruar sipas të dhënave të ASK-së janë 1,585,566, megjithatë, ky numër është i reduktuar për shkak që qytetarët e komunitetit serbë në katër komunat e veriut e bojkotuan procesin e regjistrimit.

ASK njoftoi se me ndihmën e partnerëve ndërkombëtar kanë llogaritur se diku rreth 24 mijë serbë jetojnë në këtë zonë, prandaj numri i përgjithshëm i banorëve rezidentë në Kosovë është 1,602,515.

“Agjencia e Statistikave të Kosovës (ASK) ka realizuar Vlerësimin e Popullsisë për katër komunat veriore të Kosovës: Leposaviq, Zveçan, Zubin Potok dhe Mitrovica e Veriut. Këto komuna janë të banuara kryesisht nga komuniteti serb, i cili në një masë të konsiderueshme ka bojkotuar procesin e regjistrimit, si pasojë e thirrjeve për bojkot nga subjektet politike serbe. Ky vlerësim është realizuar në bashkëpunim të ngushtë ndërmjet ASK-së dhe ekspertëve ndërkombëtarë, duke u bazuar në praktikat dhe standardet ndërkombëtare për vlerësimin e popullsisë. Rezultatet e Vlerësimit të Popullsisë për këto komuna do të përfshihen në numrin e përgjithshëm të popullsisë së Kosovës, qe zyrtarisht do te merret si numër i përgjithshëm i popullsisë se Kosovë (05 Prill 2024) duke siguruar kështu një pasqyrë të plotë dhe të saktë të strukturës demografike të vendit”, thuhet nga ASK.

795 552 janë meshkuj dhe 790 014 janë femra.

Sipas këtyre të dhënave, vendi ka tkurrje të popullsisë krahasuar me censusin e fundit të vitit 2011, sipas të cilit Kosova kishte 1,739,825 banorë. 875 900 meshkuj dhe 863 925 femra.

Përkatësia etnike që dominon në Kosovës janë shqiptarët që përbëjnë 91.67% të popullsisë, pasuar nga serbët me 2.38%, pastaj komuniteti boshnjak 1.68%, komuniteti turk 1.23%, komuniteti rom 0.56%, komuniteti ashkali 1.05%, komuniteti egjiptian 0.68%, komuniteti goran 0.58% dhe të tjerë 0.11% dhe ata që kanë preferuar të mos përgjigjen janë 0.06%.

Në Kosovë 93.49% e popullsisë është deklaruar se i përket besimit islam, 2.31% janë ortodoksë, 1.75% katolik, 0.45% janë të tjerë, 0.50% në asnjë besim fetar dhe 1.50% nuk janë deklaruar.