Lajme

Alarm epidemie: Austria mbyll kufijtë e saj nga e shtuna

E premte, 4 Prill 2025 - 17:00 albinfo.ch

Keystone

Austria po merr masa drastike dhe po mbyll kufijtë me Hungarinë dhe Sllovakinë. Nga e shtuna do të mbyllen 24 pika kufitare. Kjo masë mbrojtëse pritet të qëndrojë në fuqi deri më 20 maj.

Arsyeja është frika e një shpërthimi të madh të sëmundjes Afta Epizootike (FMD), e cila aktualisht është e përhapur në Hungari dhe Sllovaki.

Virusi po përhapet me shpejtësi vetëm disa kilometra larg kufirit austriak. Mijëra kafshë janë duke u therur aktualisht në Hungari dhe Sllovaki. Sëmundja e kafshëve konsiderohet jashtëzakonisht ngjitëse dhe prek të gjitha thundrakët – duke përfshirë bagëtinë, derrat, dhitë dhe delet. Mund të infektohen edhe kafshë të egra si dreri, transmeton albinfo.at.

Kufijtë e mbyllur, ndalohet importi i kafshëve dhe mishit

Austria dëshiron të parandalojë një përsëritje të fatkeqësisë që ndodhi pothuajse 50 vjet më parë: në atë kohë, 80.000 kafshë duheshin therur.

Nga e shtuna do të mbyllen 24 pika kufitare me vendet e prekura. Do të ketë kontrolle të rrepta për ato që do të mbeten të hapura. Gjithashtu, ndalohet importi i kafshëve dhe produkteve shtazore, duke përfshirë bagëtinë, derrat, mishin e freskët, qumështin e papërpunuar dhe mishin e gjahut, shkruan Bild.

“Virusi më i rrezikshëm që njohim”

Virologu Norbert Nowotny i Universitetit të Mjekësisë Veterinare në Vjenë flet për një rrezik të lartë infeksioni: “Virusi më i rrezikshëm që njohim”. Periudha e inkubacionit është nga dy deri në 14 ditë – kohë e mjaftueshme që virusi të përhapet pa u vënë re.

Në Gjermani ka pasur një rast në janar

Sipas Institutit Friedrich Loeffler, sëmundja Afta Epizootike (FMD) ishte e përhapur për herë të fundit në Bullgari në vitin 2011. Pasi Gjermania ishte pa FMD për 37 vjet, sëmundja e Afta Epizootike shpërtheu në Brandenburg: në janar 2025, u prek një tufë prej 14 buallicësh. Ky shpërthim mbeti një rast i vetëm. Në mars, Hungaria dhe Sllovakia raportuan shpërthime të FMD në tufat e bagëtive. Fermerët, në përgjithësi, u ankuan për një humbje totale të kafshëve të tyre.