Avokati i popullit: Të paraburgosurit janë torturuar

Institucioni i Ombudspersonit ka marrë informacione se ndaj të arrestuarve është përdorur torturë. Disa nga ta mezi qëndrojnë në këmbë

Avokati i Popullit në Maqedoni, Ixhet Mehmeti ka alarmuar institucionet dhe qytetarët se  të paraburgosurit e grupit të Kumanovës janë torturuar dhe maltretuar nga autoritetet maqedonase. Institucioni i Ombudspersonit ka marrë informacione se ndaj të arrestuarve është përdorur torturë.

“Pas grumbullimit të dëshmive dhe informacioneve kemi siguruar elemente të mjaftueshme se tek një i paraburgosur është kryer torturë. Njëlloj edhe në rastet e tjera të të paraburgosurve kemi informacione për maltretime dhe tortura dhe këto denoncime janë bërë edhe nga avokatët dhe të afërmit e të paraburgosurve”, ka deklaruar Memeti.

Në burgun e Shutkës, sipas tij, janë vizituar vetëm një pjesë e të paraburgosurve dhe jo të gjithë dhe se për disa nuk dihet akoma gjendja e tyre. Ombudspersoni gjithashtu ka bërë të ditur se nga e premtja e kaluar, Avokati i Popullit po përballet me obstruksione nga drejtoria e burgut të Shkupit. Për këtë ai ka njoftuar dhe kërkuar raport nga Ministria e Drejtësisë.

Nga ana tjetër familjarët e të arrestuarve nga më shumë se tri orë presin para dyerve të burgut të Shutkës për të vizituar të afërmit e tyre, të cilët sipas avokatëve, janë malltrtetuar dhe keqtrajtuar nga policia. Raportohet se të paraburgosurit shqiptarë mezi qëndrojnë në këmbë dhe shëndeti i tyre është tepër i rëndë.

Ndryshe, gjatë përleshjes së armatosur në Kumanovë me 9 maj, përveç se u vranë 10 qytetarë, gati 30 u arrestuan nga policia e shtetit. Edhe pse, siç është raportuar, ka pas një marrëveshje për dorëzimin e grupit të shqiptarëve që ishin stacionuar në Lagjen e Trimave, pas dorëzimit ndaj tyre është përdorur dhunë brutale.