Dështon për të 21-të herë radhazi konstituimi e Kuvendit të Kosovës

Deputetët e Kuvendit të Kosovës kanë dështuar sërish të dielën ta konstituojnë përbërjen e re parlamentare, për të 21-tën herë me radhë, duke e thelluar më tej krizën politike që ka përfshirë vendin pas zgjedhjeve të mbajtura në muajin shkurt, raporton albinfo.ch.

Kalimi i më shumë se tre muajve pa arritur formimin e institucioneve të reja shtetërore ka lënë vendin jo vetëm pa një Kuvend funksional, por edhe pa një qeveri të re. Ky bllokim institucional po ndodh pavarësisht thirrjeve të vazhdueshme nga faktori vendor dhe ndërkombëtar për të gjetur një zgjidhje dhe për të lëvizur përpara me ndërtimin e institucioneve demokratike.

Në seancën e së dielës, ligjvënësit kanë refuzuar për të trembëdhjetën herë rresht formimin e një komisioni ad hoc që do të mbikëqyrte një votim të fshehtë për zgjedhjen e kryetarit të ri të Kuvendit. Ky hap procedural është kusht i domosdoshëm për konstituimin e Kuvendit dhe për nisjen e procesit të formimit të qeverisë, transmeton albinfo.ch.