Shqipëri, nis procesi i votimit

Në orën 7:00 janë hapur qendrat e votimit dhe procesi i votimit po ecën pa asnjë pengesë. Rreth 3. 3 milionë shqiptarë do të votojnë sot në zgjedhjet lokale

Rreth 3. 3 milionë shqiptarë do të votojnë sot në zgjedhjet lokale për liderët e preferuar për kryetarë të bashkive dhe për anëtarët e këshillave bashkiake për katër vitet e ardhshme. Në orën 7:00 janë hapur qendrat e votimit dhe procesi i votimit po ecën pa asnjë pengesë.

Këto janë zgjedhjet e para pas miratimit të reformës territoriale, e cila reduktoi në 61 bashki numrin e njësive vendore. Në rang vendi janë ngritur 5299 qendra votimi. Siç raportojnë mediel lokale, Tirana bashkia me numrin më të madh të qendrave votuese 864, ndërsa bashkia me numrin më të vogël të qendrave të votimit është Poliçani, me 26 të tilla.

Këto zgjedhje do të monitorohen nga rreth 3 mijë vëzhgues, ndërsa ODIHR i ka 274 vëzhgues.

Në garë janë 63 parti politike. Shumica prej tyre të grupuara në dy koalicionet më të mëdha: Aleanca për Shqipërinë Evropiane, kryesuar nga Partia Socialiste, e cila ka në përbërje 37 forca politike dhe Aleanca Popullore për Punë dhe Dinjitet, drejtuar nga Partia Demokratike me 15 subjekte zgjedhore.

Kryetarja e KQZ, Lefterie Luzi pas hedhjes së votës theksoi rëndësinë e këtyre zgjedhjeve dhe bëri thirrje që procesi të shkoj mbarë, ndërsa iu bërë apel kryesisht grave që të jenë pjesë e procesit zgjedhor.

“Doja t’ju bëja thirrje sot qytetarëve shqiptarë të shkojnë pranë qendrave të votimit, të votojnë sepse sikurse e dimë të tërë, këto zgjedhje janë testi i radhës për të ardhmen e Shqipërisë. Gjithashtu doja t’ju bëja thirrje edhe grave të cilat duhet të jenë sot pjesë e procesit të votimit edhe për një arsye më shumë, për shkak se përfaqësimi i tyre në këshillat bashkiakë do të jetë 50 për qind”, deklaroi ajo.