Ekspozita “Shqipëria 1921” me fotografitë e zviceranit Eugène Pittard

Fotografitë e rralla të Shqipërisë së vitit 1921 ekspozohen për herë të parë në Tiranë

Bëhet e ditur se do të mbahet një ekspozitë unike të martën, më 21 tetor 2025, nga ora 18,  në Qendrën për Hapje dhe Dialog (COD), pranë Kryeministrisë. Ekspozita “Shqipëria 1921” do të sjellë për herë të parë për publikun fotografi të rralla të realizuara nga antropologu dhe miku i madh zviceran i Shqipërisë, Eugène Pittard, transmeton albinfo.ch.

Në hapje do të marrin pjesë ambasadorja e Zvicrës, Ruth Huber, kryeministri Edi Rama, si dhe ministri i Turizmit, Kulturës dhe Sportit, Blendi Gonxhja.

Ekspozita përfshin printime origjinale dhe përmbajtje digjitale, shoqëruar me një album fotografikqë dokumenton jetën, kulturën dhe njerëzit e Shqipërisë në vitet 1921–1924, një pasuri vizuale që rrallë është parë më parë.

Organizatorët theksojnë se kjo është një nderim për kontributin e Pittard-it, i cili ndihmoi në promovimin e imazhit të Shqipërisë në Evropën e fillimshekullit XX. /Albinfo.ch

---