Parlamenti zviceran kërkon të ashpërsojë rregullat e azilit

Pas Senatit zviceran, edhe Dhoma e Përfaqësuesve është shprehur në favor të një propozimi për një strategji të re për azilin. Ndër të tjera, kjo kërkon që numri i kërkesave për azil të ulet ndjeshëm

Sipas tekstit të mocionit të paraqitur nga Partia Popullore Zvicerane (SVP), qeveria federale duhet të paraqesë një strategji të re që, ndër të tjera, kufizon bashkimin familjar për azilkërkuesit. Ky mocion u miratua nga Dhoma e Përfaqësuesve gjatë një seance të jashtëzakonshme për çështjet e sigurisë, ku u diskutuan gjithsej 14 mocione, shkruan swissinfo.ch, transmeton albinfo.ch.

Gjithashtu synohet që:

të ulet numri i kërkesave për azil,

të reduktohen kostot e azilit,

të zvogëlohet kriminaliteti i lidhur me azilin,

të përshpejtohen procedurat e azilit dhe apelimit,

dhe të rritet numri i kthimeve të azilkërkuesve në vendet e tyre.

Një mocion i ngjashëm nga politikani Hannes Germann (SVP) ishte miratuar një ditë më parë edhe në Senat. Ai ende duhet të miratohet nga dhoma tjetër e parlamentit, por kjo konsiderohet kryesisht formalitet.

Po ashtu u mbështet edhe një mocion tjetër nga e njëjta parti që parashikon ndalim-dalje 10-ditore ose ndalim në qendrat federale të azilit për azilkërkuesit problematikë.

Në këtë seancë të jashtëzakonshme u paraqitën mocione nga të gjitha grupet parlamentare. Ndër to:

Një mocion nga Partia e Qendrës për të kaluar kostot e sigurisë së protestave tek organizatorët.

Një mocion nga Partia Liberale e Gjelbër për procedura më të thjeshta për shkelësit e përsëritur pa status të rregullt qëndrimi.

Një mocion nga Partia Socialdemokrate për mbrojtjen e viktimave të dhunës me bazë gjinore që nuk kanë status të rregullt qëndrimi

---