Një tjetër valë stuhish godet Zvicrën, autoritetet paralajmërojnë për përmbytje dhe breshër

Vala e radhës e stuhive po lëviz tashmë nëpër Zvicër, qeveria federale po paralajmëron për përmbytje dhe breshër.

Alarmi mbetet në fuqi në pjesën më të madhe të vendit, ndërsa moti i keq vazhdon të shkaktojë probleme në rrugë, aeroporte dhe transport

Pas stuhive të fuqishme që goditën vendin të martën, një tjetër valë moti të keq po përfshin Zvicrën. Autoritetet federale kanë lëshuar paralajmërime për reshje intensive, breshër, rrufe dhe rrezik për përmbytje në pjesën më të madhe të vendit.

Paralajmërimi i nivelit 3 është në fuqi deri të mërkurën në mbrëmje, ndërsa për rajonet e Bernës dhe Fribourgut është lëshuar alarmi i nivelit 4, që nënkupton rrezik të madh nga moti ekstrem.

Përmbytje dhe rrëshqitje dheu në Uri

Në kantonin Uri, reshjet e dendura kanë shkaktuar rrëshqitje dheu, daljen e përrenjve nga shtrati dhe dëmtime në infrastrukturë. Rruga Kleintalstrasse në Isenthal është dëmtuar nga ujërat, ndërsa disa rrugë të tjera janë mbyllur.

Autoritetet njoftuan gjithashtu për një zjarr të vogël pyjor të shkaktuar nga goditja e rrufesë. Fatmirësisht, nuk raportohet për persona të lënduar.

Kaos në Aeroportin e Cyrihut

Stuhitë kanë vazhduar të shkaktojnë probleme edhe në Aeroportin e Cyrihut. Pas devijimit të më shumë se 30 avionëve një natë më parë, të mërkurën u anuluan rreth 70 fluturime.

Pasagjerëve u rekomandohet të kontrollojnë statusin e fluturimeve me kompanitë ajrore para se të nisen drejt aeroportit.

Reshje rekord dhe breshër

Sipas MeteoNews, reshjet më intensive gjatë 24 orëve të fundit u regjistruan në Flühli (LU), Opfikon (ZH) dhe në zonën e Aeroportit të Cyrihut.

Gjatë natës pati edhe stuhi të forta në rajonin e Bernës, të shoqëruara me breshër dhe erëra të forta që rrëzuan degë pemësh dhe shkaktuan bllokime në disa rrugë.

Moti përmirësohet në fundjavë

Megjithëse moti i paqëndrueshëm pritet të vazhdojë edhe gjatë ditës së mërkurë, meteorologët parashikojnë që temperaturat të rriten sërish gjatë fundjavës, duke arritur rreth 30 gradë Celsius në shumë pjesë të Zvicrës.

---