Pianistja Fatjona Maliqi shkëlqen me recital në Kalanë e Loburgut

Artistja nga Kosova vazhdon të prezantohet me sukses në skenat muzikore të Gjermanisë, duke interpretuar kryevepra të muzikës klasike në ambiente historike.

Pianistja kosovare Fatjona Maliqi ka realizuar një performancë të suksesshme në një koncert recital të mbajtur në kuadër të “Koncerteve të Kalasë së Loburgut”, duke dëshmuar edhe një herë nivelin e saj artistik dhe interpretimin profesional, transmeton albinfo.ch.

 

 

Në këtë mbrëmje të veçantë, Maliqi interpretoi “Variacionet Goldberg” të kompozitorit të madh Johann Sebastian Bach, një nga veprat më të njohura dhe më sfiduese të repertorit pianistike klasik.

 

 

Përmes një postimi, artistja ka shprehur emocionet dhe mirënjohjen e saj për këtë përvojë:

“Sot më lejuan të luaja në Koncertet e Kalasë së Loburgut – dhe le të tingëllojnë Variacionet Goldberg të Bach në këtë ambient të veçantë. Lidhja midis muzikës, hapësirës dhe momentit ishte diçka shumë unike. Jam mirënjohëse për këtë përvojë dhe po marr shumë përshtypje të bukura me vete. Faleminderit Ostbevern!”

Fatjona Maliqi ka bërë të ditur gjithashtu se shumë shpejt do të jetë pjesë e një tjetër koncerti të rëndësishëm, këtë herë në një tjetër vend historik.

“Një nga koncertet e mia të radhës do të jetë në kalanë e bukur Neckarhausen. Po e pres shumë me padurim”, është shprehur ajo.

Pianistja kosovare po vazhdon të ndërtojë një rrugëtim të suksesshëm artistik jashtë vendit, duke e përfaqësuar kulturën shqiptare me dinjitet në skenat ndërkombëtare dhe duke sjellë interpretim të nivelit të lartë në muzikën klasike./Albinfo.ch

 

---