Filharmonia e Kosovës mbërrin në Berlin për prezantimin e operës “Syrigana” të Petrit Halilajt

Artistët kosovarë do të performojnë në Hamburger Bahnhof, një nga hapësirat më prestigjioze të artit bashkëkohor në Evropë

Instrumentalistët dhe ekipi i Filharmonisë së Kosovës kanë mbërritur në Berlin për përgatitjet finale të prezantimit të operës “Syrigana”, projekti artistik i artistit të njohur kosovar Petrit Halilaj, që do të prezantohet në muzeun prestigjioz Hamburger Bahnhof – Nationalgalerie der Gegenwart, përcjell albinfo.ch.

Para nisjes së provave dhe performancave, artistët vizituan ambientet e muzeut dhe ekspozitën “An Opera Out of Time”, ku opera “Syrigana” prezantohet si një formë e re performative që ndërthur muzikën, artin bashkëkohor dhe teatrin vizual.

Nën dirigjimin e Marco Crispo, Filharmonia e Kosovës do të interpretojë partiturën e kompozuar nga Lugh O’Neill, së bashku me sopranot Nina Guo dhe Urta Haziraj, si dhe ansamblin “Don’t Listen to Your Neighbors”.

Pas premierës së saj në Kosovë gjatë verës së vitit 2025, “Syrigana” po prezantohet tashmë edhe para publikut ndërkombëtar në Berlin, si pjesë e programit jubilar që shënon 30-vjetorin e Hamburger Bahnhof, një prej institucioneve më të rëndësishme të artit bashkëkohor në Evropë.

Performancat do të mbahen më 29 dhe 30 maj 2026 në Berlin, duke shënuar një tjetër prezantim të rëndësishëm të kulturës dhe artit kosovar në skenën ndërkombëtare. /Albinfo.ch

---