Policia shkatërroi më shumë se 105 mijë fishekë

Asgjësimi i armëve, sipas Policisë, është realizuar pas konfiskimit të tyre gjatë vitit të kaluar dhe pas përfundimit të proceseve gjyqësore të organeve kompetente

Policia e Republikës së Kosovës dhe përfaqësuesit e Programi për Zhvillim të Kombeve të Bashkuara (UNDP), kanë shkatërruar sot (e martë) në Malin Goleshit mbi Sllatinë, më shumë se 105 mijë copë municioni të konfiskuara nga Policia, gjatë këtij vitit dhe vitit të kaluar.

Shkatërrimi i municionit  u realizua në kuadër të Strategjisë të Kosovës për Kontrollin e Armëve dhe Planit të Veprimit, nga Ministria e Punëve të Brendshme me ç’rast është mbështetur nga UNDP me Projektin për Minimizimin e Rrezikut të Armëve dhe Eksplozivëve (FERM) dhe i financuar nga qeveritë e Gjermanisë dhe Norvegjisë.

“Asgjësimi i armëve është realizuar pas konfiskimit të tyre gjatë vitit të kaluar dhe pas përfundimit të proceseve gjyqësore të organeve kompetente. Ky asgjësim është kryer nga zyrtarët të cilët janë të trajnuar dhe certifikuar për këto lloje të municioneve”, deklaroi Dejan Jankovic, zëvendësdrejtor i Policisë së Kosovës, i cili ishte i pranishëm në këtë ngjarje.

Shkatërrimi i municionit u zhvillua në përputhje me Udhëzimet Ndërkombëtare Teknike për Municion të OKB-së (IATG).

Gjatë viteve të kaluar Policia e Kosovës ka asgjësuar edhe mijëra armë të gjata dhe të shkurta, që janë konfiskuar nga qytetarët. Ky është një projekt i përbashkët, vendorëve dhe ndërkombëtarëve, që vazhdon për asgjësimin e armeve ilegale, të cilat janë në numër të madh në duar të qytetarëve. Sipas UNDP=së, mendohet se në Kosovës janë rreth 350 mijë armë ë gjata ilegale.