Ambasadori amerikan: Çështja e dinarit ka ndikuar në partneritetin SHBA – Kosovë

Ambasadori i Shteteve të Bashkuara të Amerikës në Kosovë, Jeffrey Hovenier, ka deklaruar sot se situata me Rregulloren e re të Bankës Qendrore të Kosovës, përkatësisht me dinarin ka ndikuar në partneritetin SHBA – Kosovë, transmeton albinfo.ch.

Tutje ai ka thënë se SHBA-ja ka shqetësime domethënëse për Rregulloren e BQK-së dhe se nuk i sfidojnë institucionet e Kosovës për të rregulluar sektorin financiar, por kanë kërkuar që Rregullorja e re e BQK-së të shtyhet.

“Një nga zyrtarët më të lartë amerikan, James O’Brien, e bëri të qartë dhe mesazhi im është i qartë – SHBA-ja ka shqetësime domethënëse për zbatimin e Rregullores së BQK-së. Shqetësimet i kemi thënë në publik dhe privat. Nuk i sfidojmë institucionet e Kosovës për të rregulluar sektorin financiar, nuk sfidojmë institucionet e Kosovës që të ulin rrezikun e pastrimit të parave apo financimin e grupeve terroriste, nuk i sfidojmë institucionet e Kosovës apo BQK-në, por ne vazhdimisht po kërkojmë që të shtyhet zbatimi i Rregullores për një periudhë tranzicioni”, ka thënë ai.

Ndër të tjera, ai ka deklaruar se kjo çështje duhet të zgjidhet në dialog dhe pret që Kosova e Serbia të jenë konstruktive në zgjidhjen e saj, teksa ka thënë se ndihmëssekretari i Shtetit, James O’Brien, shprehu keqardhje që Qeveria e Kosovës nuk i është përgjigjur kësaj kërkese të SHBA-së.

“O’Brien e bëri të qartë se nëse Qeveria e Kosovës nuk na konsideron partnere, as ne nuk do ta konsiderojmë të tillë. Kam dëgjuar në intervista se kjo situatë nuk ka ndikuar në marrëdhëniet tona. Dua të jem i qartë, thjesht nuk është e vërtetë. Kjo situatë ka prekur partneritetin tonë. Çdo shpjegim tjetër është keqkuptim”, ka deklaruar Hovenier.

Ambasadori amerikan u shpreh se është e rrallë të dëgjohet në Këshill të Sigurimit të Organizatës së Kombeve të Bashkuara të thuhen gjëra kritike për Kosovën.

“Është e rrallë që në Këshill të Sigurimit përfaqësuesi amerikan të thotë gjëra kritike për Qeverinë e Kosovës. Ambasadorja Linda-Thomas Greenfield e bëri këtë. Është e rrallë që ndihmës-sekretari për Evropë, James O’Brien, të japë intervistë me tone e kontekst të tillë siç e bëri, është shumë e rrallë. Reflekton për një problem. Shpresa ime është të ndalet kjo. Nuk duam të jemi në këto rrethana. Duam të jemi në rrethana të tjera”.

Hovenier e ka konsideruar si veprim jo të mençur që Qeveria e Kosovës nuk po reagon pasi ka thënë se nuk është kërkesë vetëm e SHBA-së për të pezulluar “vendimin për dinarin”, por edhe e të gjitha shteteve nga të cilat varet Kosova për të avancuar në rrugën drejt BE-së, NATO-s e Këshillit të Evropës.