Bashkohet opozita, kërkon dorëheqjen e Qeverisë

Bashkimi opozitar vjen pas dështimin të Qeverisë për ta rrezuar murin ilegal që kanë ndërtuar serbët në Mitrovicën e veriut. Opozita nuk i përjashton edhe protestat

Pas ndarjes disamujore, tri partitë opozitare në Kosovë, Lëvizja Vetëvendosje, Aleanca për Ardhmërinë e Kosovës dhe Partia NISMA, janë bashkuar sërish për të kërkuar rrëzimin e qeverisë dhe paralajmërimi e protestave të reja. Bashkimi opozitar vjen pas dështimin të Qeverisë për ta rrezuar murin ilegal që kanë ndërtuar serbët në Mitrovicën e veriut.

Në një konferencë të përbashkët, opozita e akuzoi Qeverinë se nuk po e zbaton Rezolutën e Kuvendit të Kosovës, e cila i jep urdhër ekzekutivit për ta rrëzuar murin serb.

“Më datë 29 dhjetor 2016 Kuvendi miratoi rezolutën që obligon qeverinë për ta rrëzuar murin e ndërtuar nga Serbia prapa urës së Ibrit. Sot është data 1 shkurt dhe qeveria ka dështuar në zbatimin e kësaj rezolute e cila është votuar edhe nga deputetët e mazhorancës. Shpërfillja në këtë mënyrë të Kuvendit, tregon përcaktimin e kësaj qeverie për shkeljen konstante të demokracisë”, ka thënë Pal Lekaj, nga AAK.

Ai ka theksuar se kjo qeveri pa asnjë koncept, pa kurrfarë kushtesh vazhdon dialogun dhe nënshtrimin karshi Serbisë, citon TG.

“Zgjedhja më e mirë është që kjo qeveri të dorëhiqet dhe vendi të shkojë në zgjedhje. Kjo qeveri duhet të japë dorëheqje pasi kjo është cenim i Kushtetutës së vendit, nuk ka kuptim që kjo qeveri të vazhdojë më tutje”, tha Lekaj.

Ndërkaq, shefi i Grupit Parlamentar të Vetëvendosjes, Glauk Konjufca ka thënë se opozita vazhdon të jetë e bashkuar sa i përket temave nacionale. Ai ka theksuar se në rast se është nevoja do të organizojnë edhe protesta edhe demonstrata varësisht nga rrethanat.