Berati, për japonezët, një ndër qytetet kryesore që duhet vizituar

  Zyra e Kooperacionit Japonez “JICA” ka renditur qytetin e Beratit si një nga vendet kryesore në Shqipëri që duhet të vizitohet nga turistët

Dhjetë operatorët turistikë japonezë dhe disa përfaqësues të medias japoneze vizituan Shqipërinë gjatë fundjavës për t’u njohur me vlerat turistike, kulturore, historike dhe kulinare të vendit tonë.

Udhëtimi familjarizues i operatorëve turistik dhe përfaqësuesve të medias japoneze u organizua nga “Agjencia Kombëtare e Turizmit”, në bashkëpunim me zyrën e Kooperacionit Japonez “JICA”.

Ky udhëtim u bë i mundur në vijim të pjesëmarrjes për të dytin vit radhazi në panairin “JATA EXPO Tokyo 2017”, të “AKT”-së, si pjesë e programit të bashkëpunimit me “JICA”, ambasadën tonë në Japoni dhe vendet e tjera të Rajonit si Serbia, Maqedonia, Bosnja e Mali i Zi.

Gjatë dy ditëve të qëndrimit të grupit japonez në vendin tonë AKT organizoi gjithashtu një workshop në ambientet e “Hotel Tirana International”, ku pjesëmarrës ishin dhe shumë prej operatorëve më të mirë shqiptarë, të cilët operojnë me vende të ndryshme të Evropës të interesuar gjithashtu të rrisin numrin e “incoming” edhe me tregun japonez.

Gjatë mbrëmjes grupi japonez pati mundësinë të degustojë dhe gatimet tradicionale të vendit tonë pranë një prej restoranteve ‘Sloë Food” të kryeqytetit, ku i pranishëm ishte dhe Ambasadori i Japonisë në Shqipëri.

Kuzhina shqiptare u vlerësua shumë nga të pranishmit dhe u cilësua si një vlerë e fortë promovuese që e bën akoma më tërheqës produktin turistik që ofrohet nga operatorët e ndryshëm shqiptar.