Beyer: Ndryshimi apo shkëmbimi i territoreve, ide me rrezik

Deputeti i Parlamentit të Gjermanisë, Peter Beyer, ka folur për takimin që ka pasur sot në mëngjes me presidentin e Kosovës, Hashim Thaçin.

Kur ky ia ka prezantuar qëndrimin gjerman se ndryshimi apo shkëmbimi i territoreve është ide me rrezik të lartë, Thaçi i ka thënë: “Unë jam president i këtij vendi, unë vendos”, përcjell albinfo.ch.

Deputeti gjerman tha se Parlamenti i Kosovës është institucioni kryesor që duhet të vendosë për çështje të tilla. Sipas tij, normalizimi i marrëdhënieve kërkon zgjidhje të qëndrueshme. Beyer këto komente i ka bërë gjatë një takimi me gazetarë.

Ndryshe nga Beyer, përmes rrjetit social Facebook, Thaçi nuk e ka përmendur reagimin e tij ndaj qëndrimit gjerman. Aty Thaçi ka thënë se me deputetin gjerman të CDU-së ka folur për marrëdhëniet ndërmjet dy shteteve, situatën politike në rajon si dhe për dialogun Kosovë-Serbi.