Tarifat e reja gjithëpërfshirëse të presidentit të Shteteve të Bashkuara, Donald Trump, ndaj dhjetëra vendeve në mbarë botën, kanë hyrë në fuqi të mërkurën pas mesnatës.

Pak pas mesnatës, përmes platformës së tij Truth Social, Trump shkroi: “Është mesnatë!!! Miliarda dollarë në tarifa po rrjedhin tani në Shtetet eBashkuara të Amerikës!”.

Shtëpia e Bardhë tha se mallrat nga më shumë se 60 vende dhe nga Bashkimi Evropian do të përballen me tarifa prej 10 për qind ose më të larta.

Tarifat do të zbatohen edhe ndaj vendeve të Ballkanit Perëndimor, sipas këtyre përqindjeve:

Serbia 35 për qind, Bosnja e Hercegovina 30 për qind, Maqedonia e Veriut 15 për qind, Kosova 10 për qind dhe Mali i Zi 10 për qind.

Pjesë e listës është edhe Kroacia, anëtare e Bashkimit Evropian, produktet e së cilës do të tatohen me 15 për qind gjatë importit në Shtetet e Bashkuara.

Qeveria e Kosovës në detyrë vendosi më 1 gusht ta heqë tarifën doganore prej 10 për qind ndaj mallrave amerikane.

Produktet nga Bashkimi Evropian, Japonia dhe Koreja e Jugut do të tatohen me 15 për qind, ndërsa importet nga Tajvani, Vietnami dhe Bangladeshi do të tatohen me 20 për qind.

Kur bëhet fjalë për pjesën tjetër të botës, Brazili po përballet me tarifa më të larta doganore amerikane në botë – një tarifë prej 50 për qind që zbatohet për shumicën e mallrave.

Edhe India do të preket nga një tarifë prej 50 për qind, e cila hyn në fuqi më 27 gusht.

Sa i përket Kinës, negociatat janë ende në vazhdim dhe si Uashingtoni, ashtu edhe Pekini janë pajtuar që t’i shtyjnë të gjitha tarifat e reja deri më 12 gusht.

Meksikos i është dhënë gjithashtu një shtyrje, pasi Trump ka thënë se do të vazhdohet me normat aktuale për edhe 90 ditë, duke shmangur kështu rritjen e kërcënuar në 35 për qind.

Kanadaja tashmë po përballet me një tarifë prej 35 për qind, që është në fuqi që nga e premtja e kaluar, ndonëse shumica e mallrave janë të përjashtuara në bazë të marrëveshjes tregtare ndërmjet SHBA-së, Meksikës dhe Kanadasë.

Për vende si BE-ja, Japonia dhe Koreja e Jugut, Trump gjithashtu pret që ato të investojnë qindra miliarda dollarë në SHBA.

“Mendoj se rritja do të jetë e paprecedentë”, tha Trump të mërkurën pasdite.

Ai shtoi se SHBA-ja “po fiton qindra miliarda dollarë nga tarifat”, por dha ndonjë shifër të saktë për të ardhurat, duke thënë se “ne madje nuk e dimë ende numrin përfundimtar” në lidhje me normat e tarifave.

Pavarësisht pasigurisë, Shtëpia e Bardhë është e bindur se fillimi i këtyre tarifave gjithëpërfshirëse do të sjellë qartësi për rrugën që do ndjekë ekonomia më e madhe në botë.

Megjithatë, kompani dhe grupe të industrisë paralajmërojnë se tarifat e reja do të dëmtojnë rëndë bizneset e vogla amerikane.

Ekonomistët gjithashtu paralajmërojnë se ato mund të nxisin inflacionin dhe të rëndojnë rritjen ekonomike në një afat më të gjatë.

Vala e fundit e tarifave “reciproke”, të cilat synojnë të adresojnë praktikat tregtare që Uashingtoni i konsideron të padrejta, zgjerojnë masat që Trump ka ndërmarrë që kur është rikthyer në presidencë.

Megjithatë, këto tarifa më të larta nuk zbatohen për importet specifike për sektorë të caktuar që janë objekt më vete, si çeliku, automjetet, barnat dhe çipat elektronikë.

Trump tha të mërkurën se planifikon një tarifë prej 100% për gjysmëpërçuesit  megjithëse Taipei deklaroi se gjiganti i prodhimit të çipave, TSMC, do të përjashtohet nga tarifat, pasi ka fabrika në SHBA.

Një raport i ri nga Agjencia Evropiane e Mjedisit zbulon qytetet evropiane me cilësinë më të lartë të ajrit dhe ujit, duke analizuar ndotjen në mbi 350 qytete në 30 vende. Në krye të listës për ajër të pastër ndodhen disa qytete nordike dhe të Mesdheut, të cilat dallohen për nivelin e ulët të grimcave të imëta në atmosferë.

Sipas të dhënave, qyteti me ajrin më të pastër regjistron një mesatare prej vetëm 3.5 mikrogramësh grimcash për metër kub. Kjo arrihet falë masave të qëndrueshme mjedisore, transportit të pastër dhe ruajtjes së hapësirave të gjelbra urbane.

Ndërkohë, edhe cilësia e ujit të pijshëm mbetet e lartë në këto rajone, me shumë qytete që ofrojnë ujë të pastër direkt nga burimet natyrore, pa nevojë për trajtim të mëtejshëm. Urbanizimi i balancuar me natyrën, rregulloret e forta mjedisore dhe investimet në energji të rinovueshme luajnë një rol kyç në këtë sukses.

Qytete të njohura për standarde të larta të mjedisit përfshijnë kryeqytete dhe rajone alpine që ofrojnë ajër të pastër, ujë të pijshëm cilësor dhe stil jete të orientuar drejt shëndetit dhe mirëqenies. Në disa prej tyre, edhe zonat rurale përreth mbeten të paprekura nga ndotja industriale, duke krijuar një ambient ideal për jetesë të shëndetshme.

Kombinimi i teknologjisë së gjelbër, edukimit për mbrojtjen e natyrës dhe legjislacionit të rreptë e vendos këto qytete në krye të listës për ata që kërkojnë cilësi jete më të lartë dhe një lidhje më të thellë me mjedisin.

Një valë intensive e të nxehtit ka përfshirë rajonet perëndimore të Evropës, ku temperaturat kanë arritur deri në 41 gradë Celsius. Sipas raportimeve të “Euronews”, ky gusht mund të rezultojë si muaji më i nxehtë në 15 deri në 20 vitet e fundit.

Vlerat minimale të temperaturës variojnë nga 16 deri në 24 gradë Celsius, ndërsa ato maksimale shkojnë nga 28 deri në 41 gradë. Rajonet veriore të vendit përkatës janë aktualisht nën alarmin e kuq për shkak të kushteve ekstreme.

Instituti Kombëtar i Meteorologjisë ka paralajmëruar se ky alarm është niveli më i lartë i rrezikut dhe është vendosur për shkak të qëndrueshmërisë së temperaturave maksimale jashtëzakonisht të larta, veçanërisht në zonat e brendshme të territorit.

Parashikimet tregojnë se ky muaj jo vetëm që do të shënojë temperatura të larta gjatë ditës, por edhe netët do të jenë më të ngrohta se zakonisht, duke ndikuar në ritmin e jetesës dhe shëndetin publik.