Presidentja e Kosovës, Vjosa Osmani, në cilësinë e Komandantes Supreme të Forcës së Sigurisë së Kosovës ka vizituar sot Defender Europe ’25, , ku Kosova është edhe nikoqire, përcjell albinfo.ch.

Ajo tha se pjesëmarrja e rreth 1000 pjesëtarëve të FSK-së në këtë ushtrim, përkrah ushtrive të vendeve më të fuqishme në botë, tregon nivelin e përgatitjes dhe gatishmërinë e Kosovës për t’u bërë pjesë e NATO-s.

“Vetëm dy ditë më parë, në SHBA, diskutuam për vizionin e përbashkët për mbrojtjen e Evropës. Sot, ky vizion po zbatohet në terren, në tokën tonë”, tha Osmani.

Osmani shtoi se përmes këtij angazhimi, Kosova po dëshmon se jo vetëm kontribuon për paqen dhe sigurinë, por është plotësisht e gatshme të jetë pjesë e strukturave euroatlantike.

Së fundmi, ambasadori britanik në Kosovë, Jonathan Hargreaves ka reaguar pas kërcënimeve të fundit ndaj presidentes, Vjosa Osmani, përcjell albinfo.ch.

Në një postim në Facebook, ai ka shprehur shqetësimin ndaj këtyre kërcënimeve dhe siç tha valës në rritje të gjuhës së urrejtjes drejtuar grave.

“Jam thellësisht i shqetësuar nga kërcënimet e fundit dhe vala në rritje e gjuhës së urrejtjes drejtuar grave, veçanërisht atyre në role udhëheqëse. Dhuna me bazë gjinore – përfshirë dhunën në internet – nuk ka vend në shoqërinë tonë. Ne qëndrojmë me Grupin e Sigurisë Gjinore dhe e mbështesim plotësisht deklaratën e tyre të përbashkët. Në kohë si këto, heshtja nuk është një opsion. Ne zgjedhim solidaritetin”.

“Siç ka thënë Jess Phillips, Ministrja e Mbretërisë së Bashkuar për Mbrojtjen dhe Dhunën ndaj Grave dhe Vajzave, “Kjo nuk do të ndryshojë nëse nuk e bëjmë sistematike për këdo që has ndonjëherë një viktimë ose një autor të dhunës, ta mendojë si detyrën e tij kryesore të bëjë diçka në lidhje me këtë”, shkroi  Hargreaves.

Në këtë reagim, diplomati britanik në Kosovë ka shpërndarë deklaratën e ‘UN Women Kosovo’’, Grupi për Siguri dhe Barazi Gjinore mbi kërcënimet ndaj presidentes Vjosa Osmani dhe nevojën urgjente për të adresuar dhunën ndaj grave në politikë.

Shefja e shtetit u kërcënua sërish me jetë të hënën përmes adresës zyrtare të Presidencës së Kosovës, për herë të dytë brenda një periudhe të shkurtër kohore.

Ambasada e Gjermanisë në Kosovë ka thënë se Berlini mbetet fuqimisht e përkushtuar ndaj anëtarësimit të Kosovës në Këshillin e Evropës dhe se qëllimi në këtë drejtim është i arritshëm, përcjell albinfo.ch.

Në një postim të kësaj ambasade në Facebook thuhet se Kosova duhet të veprojë tani, duke përfshirë përmbushjen e angazhimeve të saj në kuadër të dialogut të lehtësuar nga BE-ja.

Kjo ambasadë bashkë me deklaratën për Kosovën në KiE në postimin e saj shkëputi edhe të tjera nga konferenca përmbyllëse e Institutit të Drejtësisë të Kosovës dhe Lëvizjes FOL, përcjell albinfo.ch.

“Në konferencën përmbyllëse të Institutit të Drejtësisë të Kosovës dhe projektit Lëvizja FOL, ambasadori Rohde theksoi rolin themelor të sundimit të ligjit në demokraci – një parim në zemër të Këshillit të Evropës”.

“Gjetjet inkurajuese tregojnë se seancat dëgjimore publike dhe të drejtat gjuhësore respektohen, me shumicën e individëve të përfaqësuar profesionalisht. Megjithatë, sfidat mbeten, duke përfshirë zgjidhjet e ngadalta të çështjeve dhe zbatimin e pamjaftueshëm të jurisprudencës së GJEDNJ-së”.

“Përtej monitorimit të gjyqësorit, projekti ndihmoi në fuqizimin e qytetarëve, duke siguruar që ata të dinë të drejtat e tyre dhe standardet që gjykatat duhet të mbështesin”, u tha mes tjerash në postim.

Ambasadori i Zvicrës në Kosovë, Jürg Sprecher ka zhvilluar një takim me Kryetarin e Bashkisë së Pejës, Gazmend Muhaxhiri, shkruan albinfo.ch.

Sprecher është shprehur se ky ishte një takim i shkëlqyer me Kryetarin e Bashkisë së Pejës.

“Jemi krenarë që kemi mbështetur Bashkinë e Pejës në përpjekjet e tyre frymëzuese për të nxitur turizmin dhe sistemet lokale të ushqimit. Angazhimi dhe lidershipi i tyre kanë qenë çelësi i progresit mbresëlënës që kemi parë — një shembull i shkëlqyer i asaj që mund të arrijë angazhimi i fortë lokal dhe partneritetet afatgjata. Ne të dy ramë dakord se prioritizimi i financimit të qëndrueshëm për turizmin është shumë i rëndësishëm”, është shprehur ai.

Nga ana tjetër edhe kryetari Muhaxheri është shprehur i lumtur për viziten e ambasadorit të Zvicrës në Pejë.

“Në takim u diskutua për projektet ndërkufitare, forcimin e bashkëpunimit ndërkufitar, ruajtjen e trashëgimisë natyrore dhe kulturore të rajonit, për atraksionet turistike Zip Line dhe Via Ferrata, për projektet konkrete, të përbashkëta, siç është projekti “Promovimi i Punësimit në Sektorin Privat” (PPSE), fidanishtja e modernizuar në fshatin Leshan të Komunës së Pejës, që synon të rrisë prodhimin e fidanëve dhe të përmirësojë cilësinë e tyre, si dhe për bashkëpunime në të ardhmen, sa i përket mundësive të ndryshme ekonomike”, është shprehur ai. /Albinfo.ch

Ka përfunduar protesta e bizneseve kundër daljes në tregun e hapur të energjisë, përcjell albinfo.ch.

Protesta kishte nisur nga ora 10:00, ndërsa u bllokuan hyrjet kryesore për në Prishtinë. Një shirit i rrugëve ishte lënë i lirë për qarkullim. 

Protesta zgjati për dy orë. 

Bizneset po protestojnë kundër daljes në treg të hapur të energjisë, ku thonë se do të paguajnë çmim trefish më të shtrenjtë.

Bizneset kanë paralajmëruar masa të tjera nëse nuk merren parasysh kërkesat e tyre.

Kryetari i Odës Ekonomike, Lulzim Rafuna, ka kërkuar reflektim nga institucionet lidhur me kërkesën për shtyrje të vendimit për dalje në treg të lirë.

Ai ka thënë se do të ketë “hapa tjerë e radikalizim” nëse nuk ka reflektim nga institucionet. 

Për arsyen e lënies së një shiriti të lirë, ai ka thënë se është për shkak të ushtrimeve “Defender Europe 25”. 

Nga ana tjetër, ministrja në detyrë e Ekonomisë, Artane Rizvanolli, ka thënë se i kanë ftuar në takim bizneset lidhur me daljen në treg të lirë, por se sipas saj, Oda Ekonomike po u bënë presion që të mos mbajnë takime, por të protestojnë.

Rizvanolli ka shtuar se po angazhohen për të adresuar shqetësimet e bizneseve lidhur me daljen në treg të lirë, megjithatë ka theksuar se vendimi hyn në fuqi nga java tjetër.

“Uroj që Oda Ekonomike ta ketë përcjellë ftesën për takimin e dakorduar dje….. Menjëherë pas takimit të djeshëm dhe pas zotimit të kryeministrit që kryeministri do tu qëndroj pranë bizneseve, në media pamë ftesën për bllokim… Ne kemi dëgjuar që bizneset kane presion nga OEK për të mos marre pjesë në takime për të mos pranuar oferta e për te dalë në protesta”, ka thënë ajo në konferencë për media.

Rizvanolli i ka quajtur të pavërteta deklaratat se KESCO blen energji më lirë dhe e shet atë në treg të lirë më pas.

“Nuk është e saktë që KESCO do ta blejë energjinë me 30 euro e do ta shesë në treg të lirë. Të gjithë furnizuesit tregtarë kanë qasje në energjinë shtesë të KEK. Nuk është e saktë që KESCO ka të drejtë ta blej me 30 euro energjinë e ta shes në treg të lirë”.

Kuvendi i Kosovës ka dështuar sërish të konstituohet edhe në tentativën e 23-të.

Sërish nuk mori votat e mjaftueshme formimi i Komisionit për votim të fshehtë për zgjedhjen e kryeparlamentarit, përcjell albinfo.ch.

Nga 111 deputetë që ishin në sallë, 55 deputetë votuan për, një kundër dhe s’pati abstenim.

Kryesuesi i seancës, Avni Dehari, kërkoi nga PDK-ja, LDK-ja, AAK-ja, Nisma dhe Lista Serbe që të bëjnë propozimet e kandidatëve të tyre për komision, por këto parti sërish nuk pranuan të propozojnë emrat si dhe nuk morën pjesë në votim.

Seanca u ndërpre për shkak të mungesës së kuorumit për të vazhduar me 31 maj në orën 10:30.