Kryeministri Albin Kurti njofton se ekipet e Ministrisë së Punëve të Brendshme dhe Ministrisë së Mjedisit, Planifikimit Hapësinor dhe Infrastrukturës kanë qëndruar dje dhe gjatë natës në terren për të monitoruar situatën e rënduar nga vërshimet dhe për të asistuar në evakuimin e banorëve nga zonat më të rrezikuara, përcjell albinfo.ch.

Ministrat Xhelal Sveçla, Hysen Durmishi dhe Elbert Krasniqi kanë qenë në kontakt të vazhdueshëm me kryetarët e komunave më të prekura, ndërsa Forca e Sigurisë së Kosovës ka mbajtur njësitet e saj në gatishmëri dhe ka asistuar vendosjen e familjeve të rrezikuara, veçanërisht në Gjakovë.

Sipas raporteve të Agjencisë së Menaxhimit Emergjent, komunat më të prekura përfshijnë Fushë Kosovën, Lipjanin, Obiliqin, Drenasin, Podujevën, Shtimjen, Graçanicën, Gjakovën, Prizrenin, Suharekën, Malishevën, Rahovecin, Mamushën, Dragashin, Mitrovicën, Vushtrrinë, Skenderajn, Klinën, Istogun, Junikun, Deçanin dhe Pejën.

Aktualisht, situata raportohet të jetë nën kontroll. Përveç dëmeve materiale, fatmirësisht nuk ka pasur lëndime serioze. Gjatë natës janë ndërhyrë në zona me rrëshqitje dhe bllokime të puseteve, ndërsa kompanitë përgjegjëse mbeten në gatishmëri.

Kryeministri Kurti falënderoi ekipet operative, zjarrfikësit dhe institucionet e sigurisë për reagimin e shpejtë, si dhe qytetarët për solidaritetin dhe bashkëpunimin. Ai u bëri thirrje qytetarëve të ndjekin udhëzimet e institucioneve deri në tejkalimin e plotë të situatës.

Lidhja Demokratike e Kosovës ka rikthyer sërish ulësen e 15-të në Kuvend, duke ia marrë atë Partisë Demokratike të Kosovës, e cila tashmë ka rënë në 22 ulëse. Ky ndryshim ka ndodhur ndërsa numërimi i votave nga zgjedhjet e 28 dhjetorit ka arritur në 2,800 nga 2,836 vendvotime.

Deri tani, Lëvizja Vetëvendosje ka marrë 50.82% të votave, duke siguruar 57 ulëse në Kuvendin me 120 vende, përfshirë 20 ulëset e rezervuara për komunitetet. PDK-ja e Bedri Hamzës, e cila dje kishte “rrëmbyer” një ulëse nga LDK-ja, tashmë numëron 22 ulëse, me 20.34% të votave. Lidhja Demokratike ka siguruar 15 ulëse me 13.24% të votave.

Me këtë përllogaritje, Fadil Hadërgjonaj rikthehet sërish si deputet, ndërsa te PDK-ja, Bekim Haxhiu humbet ulësën e 23-të. Aleanca për Ardhmërinë e Kosovës mbetet me 6 ulëse, duke marrë 5.51% të votave.

Situata me vërshime në disa zona të Kosovës mbetet nën vëmendje edhe sot, ndërsa komunat e Junikut dhe Malishevës kanë shpallur gjendje të jashtëzakonshme për shkak të reshjeve të dendura dhe rrezikut nga përmbytjet.

Ekipet e emergjencës vazhdojnë të jenë të angazhuara në terren, ndërkohë që autoritetet kompetente po monitorojnë situatën në mënyrë të vazhdueshme.

Sipas raportimeve, rajonet më të prekura deri më tani janë Fushë Kosova, Drenasi, Malisheva, Rahoveci, Klina, Mitrovica, Vushtrria, Skenderaj dhe Gjakova. Në këto zona janë evidentuar vërshime në oborre, bodrume dhe segmente të caktuara rrugore. Në Gjakovë, për shkak të rrezikut të shtuar, është kërkuar evakuimi i mbi 20 familjeve, në koordinim me Forcën e Sigurisë së Kosovës (FSK).

Në komunat e tjera të vendit, gjendja vlerësohet si relativisht e qetë dhe stabile, megjithatë mbetet nën monitorim të vazhdueshëm nga Agjencia e Menaxhimit Emergjent përmes sistemit të komunikimit emergjent.

Si pasojë e situatës dhe për arsye sigurie, autoritetet kanë vendosur që procesi i nisjes së mësimit të shtyhet, ndërsa mësimi do të fillojë më 12 janar.

Lidhur me vërshimet, gjatë ditës së martë kanë reaguar përfaqësues të institucioneve shtetërore, si dhe subjekte politike që aktualisht janë në opozitë.

Presidentja e Kosovës, Vjosa Osmani, ka shprehur mirënjohje për të gjitha institucionet dhe qytetarët që, përballë reshjeve të dendura dhe vërshimeve, po veprojnë me përgjegjësi, profesionalizëm dhe solidaritet në mbrojtje të jetës dhe pronës.

“Sot gjatë ditës kam qenë në komunikim me kryetarët e komunave të prekura, të cilët po udhëheqin menaxhimin e situatës në terren, në koordinim të ngushtë dhe me mbështetjen e institucioneve qendrore,” ka deklaruar Osmani.

Nga ana tjetër, Partia Demokratike e Kosovës (PDK) u ka bërë thirrje institucioneve qendrore që të marrin përgjegjësi të plotë, duke aktivizuar të gjithë mekanizmat shtetërorë për menaxhimin e situatës emergjente.

Ndërkohë, kryetari i Aleancës për Ardhmërinë e Kosovës (AAK), Ramush Haradinaj, e ka cilësuar situatën si urgjencë kombëtare dhe ka kërkuar që institucionet qendrore dhe ato lokale t’i shumëfishojnë përpjekjet për përballimin e gjendjes së krijuar.

Në rajonin e Mitrovicës ka rënë sasia e ujit në të gjitha pikat kritike, duke rritur gjasën që të bie edhe sasia në lumin Lushta, përcjell albinfo.ch.

Lajmin e ka bërë të ditur mbrëmë pas mesnate, kryetari i Mitrovicës së Jugut, Faton Peci.
“Të dashur qytetarë, në këto momente, sasia e ujit në të gjitha pikat kritike ka rënie të dukshme, me tendencë të rënies edhe në lumin Lushta. I gjithë mekanizimi i Shtabit Emergjent do të jetë në dispozicion 24 orë”, tha Peci.