Vërshimet në Kosovë, dy komuna shpallin gjendje të jashtëzakonshme

Reshjet e dendura shkaktojnë përmbytje, shtyhet nisja e mësimit

Situata me vërshime në disa zona të Kosovës mbetet nën vëmendje edhe sot, ndërsa komunat e Junikut dhe Malishevës kanë shpallur gjendje të jashtëzakonshme për shkak të reshjeve të dendura dhe rrezikut nga përmbytjet.

Ekipet e emergjencës vazhdojnë të jenë të angazhuara në terren, ndërkohë që autoritetet kompetente po monitorojnë situatën në mënyrë të vazhdueshme.

Sipas raportimeve, rajonet më të prekura deri më tani janë Fushë Kosova, Drenasi, Malisheva, Rahoveci, Klina, Mitrovica, Vushtrria, Skenderaj dhe Gjakova. Në këto zona janë evidentuar vërshime në oborre, bodrume dhe segmente të caktuara rrugore. Në Gjakovë, për shkak të rrezikut të shtuar, është kërkuar evakuimi i mbi 20 familjeve, në koordinim me Forcën e Sigurisë së Kosovës (FSK).

Në komunat e tjera të vendit, gjendja vlerësohet si relativisht e qetë dhe stabile, megjithatë mbetet nën monitorim të vazhdueshëm nga Agjencia e Menaxhimit Emergjent përmes sistemit të komunikimit emergjent.

Si pasojë e situatës dhe për arsye sigurie, autoritetet kanë vendosur që procesi i nisjes së mësimit të shtyhet, ndërsa mësimi do të fillojë më 12 janar.

Lidhur me vërshimet, gjatë ditës së martë kanë reaguar përfaqësues të institucioneve shtetërore, si dhe subjekte politike që aktualisht janë në opozitë.

Presidentja e Kosovës, Vjosa Osmani, ka shprehur mirënjohje për të gjitha institucionet dhe qytetarët që, përballë reshjeve të dendura dhe vërshimeve, po veprojnë me përgjegjësi, profesionalizëm dhe solidaritet në mbrojtje të jetës dhe pronës.

“Sot gjatë ditës kam qenë në komunikim me kryetarët e komunave të prekura, të cilët po udhëheqin menaxhimin e situatës në terren, në koordinim të ngushtë dhe me mbështetjen e institucioneve qendrore,” ka deklaruar Osmani.

Nga ana tjetër, Partia Demokratike e Kosovës (PDK) u ka bërë thirrje institucioneve qendrore që të marrin përgjegjësi të plotë, duke aktivizuar të gjithë mekanizmat shtetërorë për menaxhimin e situatës emergjente.

Ndërkohë, kryetari i Aleancës për Ardhmërinë e Kosovës (AAK), Ramush Haradinaj, e ka cilësuar situatën si urgjencë kombëtare dhe ka kërkuar që institucionet qendrore dhe ato lokale t’i shumëfishojnë përpjekjet për përballimin e gjendjes së krijuar.

---