Archives

Rama: Kosova duhet të bëjë detyrat e veta për BE-në, jo të merret me Serbinë

Posted on by Drin Reçica

Kryeministri i Shqipërisë, Edi Rama, ka deklaruar se Kosova duhet të fokusohet tek kërkesat e Bashkimit Evropian për dialogun dhe integrimin, duke mos u ndalur tek qëndrimet e Serbisë, përcjell albinfo.ch.

Në konferencën “Shqipëria, Horizonti i Ri” të mbajtur në Vjenë, ku morën pjesë sipërmarrës nga mbi 25 vende të botës, Rama u pyet për Ballkanin e Hapur dhe për çështjet e pazgjidhura mes Kosovës e Serbisë.

Ai tha se është i trishtuar që nuk ka asnjë përparim në dialog, por nënvizoi se Kosova duhet të bëjë pjesën e saj.

“Kosova nuk duhet të mendojë Serbinë, nuk duhet të shohë Serbinë, nuk duhet t’ia dijë çfarë bën Serbia. Duhet të bëjë detyrat e veta dhe t’ia dorëzojë Bashkimit Evropian fletoren e plotë të punëve të shtëpisë. Ky proces nuk lidhet me pranimin e asaj që kërkon Serbia, por me përmbushjen e kushteve që kërkon BE-ja,” tha Rama.

Ai theksoi se dialogu i ndërmjetësuar nga BE-ja ka dështuar për shkak të formatit të gabuar, por insistoi që Kosova nuk duhet të humbasë kohë duke u marrë me Serbinë.

“Është në interesin e Kosovës të ecë përpara, pa u kushtëzuar me reagimet e Serbisë. Nëse nuk e bën këtë, do të vazhdojë të izolojë veten gjithnjë e më shumë, dhe kjo është për të ardhur keq,” shtoi ai.

Begaj njofton se në OKB takoi presidentin e Ganës për ta konfirmuar njohjen e Kosovës

Posted on by Drin Reçica

Presidenti i Shqipërisë, Bajram Begaj ka njoftuar se sot në Asamblenë e Kombeve të Bashkuara ka takuar presidentin e Ganës, John Dramani Mahama, për ta konfirmuar njohjen e Ganës për Kosovën, përcjell albinfo.ch.

Begaj në X shkroi se Shqipëria mbetet e përkushtuar ndaj forcimit të pozicionit ndërkombëtar të Kosovës.

“Sot në OKB, u takova me Presidentin e Ganës John Dramani Mahama për të diskutuar avancimin e bashkëpunimit tonë dypalësh dhe shumëpalësh, si dhe për të konfirmuar njohjen e Ganës për Kosovën”, shkroi në Begaj në X.

Osmani vlerëson Trumpin: Ndihmoi në parandalimin e përshkallëzimit të situatës në Kosovë

Posted on by Drin Reçica

Presidentja e Kosovës, Vjosa Osmani, ka lavdëruar rolin e presidentit amerikan, Donald Trump, në mbajtjen e stabilitetit në Ballkanin Perëndimor, përcjell albinfo.ch.

Në një intervistë për “Fox News”, gjatë vizitës së saj në Shtetet e Bashkuara, Osmani tha se administrata Trump ka kontribuar ndjeshëm në shmangien e përshkallëzimeve mes Kosovës dhe Serbisë.

Ajo rikujtoi se Kosova ka qenë cak i veprimeve agresive nga Serbia, duke përmendur sulmin e shtatorit 2023 dhe një tjetër tentativë destabilizuese në maj të këtij viti, të cilat, sipas saj, u penguan falë angazhimit të aleatëve të NATO-s.

“Megjithatë, ekziston një kërcënim i vazhdueshëm që vjen nga Serbia. Në maj pati një tjetër përpjekje për përshkallëzim, nëse mund ta quaj kështu, dhe kjo administratë ka bërë një punë të mrekullueshme për ta parandaluar. Pra, parandalimi dhe frenimi kanë qenë çelësi në rajonin tonë”, tha Osmani për mediumin amerikan.

Duke folur për udhëheqjen e Trumpit, ajo shtoi se ai gjithmonë ka vepruar me vendosmëri dhe qartësi.

“Ndërsa ai ngjitet sot në podiumin e Kombeve të Bashkuara, ne presim një mesazh të fuqishëm për paqen përmes forcës që është përcjellë në pjesën tonë të Evropës, ky është mesazhi i vetëm që e kuptojnë autokratët dhe udhëheqësit e çmendur në botë”, tha tutje Osmani.

Dy vjet nga rënia e heroit Afrim Bunjaku, organizohen homazhe dhe akademi përkujtimore

Posted on by Drin Reçica

Sot do të përkujtohet heroi i vendit, rreshteri Afrim Bunjaku, i cili u vra gjatë sulmit në Basnjkë më 24 shtatorit të vitit 2023, përcjell albinfo.ch.

Nën patronatin e ministrit të Punëve të Brendshme në detyrë, Xhelal Sveçlës, dhe drejtorit të Përgjithshëm të Policisë së Kosovës Kolonel, Gazmend Hoxha, do të organizohen aktivitete për shënimin e dy vjetorit të rënies heroike të Afrim Bunjaku.

Nga ora 10:30 do të bëhen homazhe te varri i heroit Afrim Bunjaku.

Më pas, krerët shtetëror së bashku me kabinetin qeveritar, ministrin e punëve të brendshme, drejtorin e përgjithshëm të Policisë së Kosovës, korin diplomatik dhe zyrtar të tjerë nga Policia e Kosovës do të bëjnë homazhe  te varri i heroit Afrim Bunjaku.

Kurse, nga ora 15:00 do të mbahet Akademia Përkujtimore në sallën e kuqe, në Pallatin e Rinisë në  Prishtinë.

Dy vjet nga sulmi terrorist në Banjskë

Posted on by Drin Reçica

Sot bëhen dy vjet kur në në fshatin Banjskë të Zveçanit, një grup terrorist, i prirë nga ish-politikani Millan Radoiçiq, sulmoi Policinë e Kosovës, përcjell albinfo.ch.

Mëngjesin e 24 shtatorit 2023, mbeti i vrarë rreshteri Afrim Bunjaku, u plagos polici Alban Rashiti e u lëndua një tjetër, në një sulm nga një grup i organizuar në Banjskë të Zveçanit.

Sulmi u dënua nga krerët e shtetit dhe ndërkombëtarët, duke bërë thirrje që autorët të dalin para drejtësisë.

I gjithë rasti ndodhi pasi në hyrje të fshatit Banjskë ishin vendosur dy kamionë pa targa, duke e bllokuar hyrjen përmes urës në atë vend. Aty patrulla policore që pa barrikadën njoftoi kolegët tjerë në bazë, e që mesin e zyrtarëve që iu bashkuan kolegëve në vendngjarje ishte edhe rreshteri Afrim Bunjaku, i cili u vra në krye të detyrës.

Përgjatë këtyre dy viteve  kanë ndodhur shumë zhvillime: Radoiçiq pranoi organizimin dhe pjesëmarrjen në sulm, ai u hetua në Beograd dhe në Prishtinë,  ku ndaj tij dhe 44 personave tjerë Prokuroria Speciale e Kosovës, ngriti aktakuzë për veprimtari terroriste.

Gati një vit pas sulmit, Prokuroria Speciale e Kosovës ngriti ditë më parë aktakuzë ndaj 45 personave për përfshirje në sulmin e armatosur terrorist në veri të Kosovës, në Banjskë  ku u vra rreshteri i policisë së Kosovës, Afrim Bunjaku.

Sipas aktakuzës, grupi terrorist me në krye Milan Radoicicin, synonin që përmes përdorimit të dhunës me armatim të rëndë, kanë tentuar të shkëpusin pjesën veriore të territorit të Republikës së Kosovës.

Tutje thuhet se si grup mirë i organizuar, këtë pjesë të territorit kanë tentuar t’ia bashkojnë Republikës së Serbisë, dhe si rezultat i dhunës së përdorur, ka vdekur zyrtari policor Afrim Bunjaku dhe është rrezikuar jeta e zyrtarëve të tjerë policorë dhe popullatës civile.

Grupi i përbërë prej 45 personave ngarkohet me “Veprat e rënda kundër rendit kushtetues dhe sigurisë së Republikës së Kosovës”.

Prokuroria Speciale ngarkon kreun e grupit, Milan Radoicic me veprën penale të “Lehtësimi dhe financimi në kryerjen e terrorizmit” pasi i njëjti nga viti 2017 e deri më 24 shtator 2023 në cilësinë e kreut të grupit terrorist të strukturuar, ka siguruar të ardhura në mënyrë të tërthortë.

Pjesa më e madhe e tyre janë përdorur për armatim të rëndë, uniforma ushtarake, mbështetje logjistike, pagesën e pjesëmarrësve të grupit, thuhet tutje në aktakuzë.

Radoicic ngarkohet edhe me shpëlarje të parave, pasi një pjesë të pasurive të paluajtshme e ka transferuar dhe tek personat e tretë, me qëllim të fshehjes ose maskimit të burimit të pasurisë.

Nga 45 personat e akuzuar, vetëm tre prej tyre janë të arrestuar nga autoritetet e Kosovës dhe mund të dalin para trupit gjykues. Vladimir Tolic, Blagoje Spasojevic dhe Dushan Maksimovic janë në paraburgim që nga 24 shtatorit i vitit 2023.

Kush janë të akuzuarit që ngarkohen bashkë me kreun e grupit kriminal Milan Radoiçiq?

Dispozitivi i parë i aktakuzës së PSRK-së ngarkon të akuzuarit: Milan Radoiçiç, Blagoje Spasojeviq, Vladimir Toliq, Dushan Maksimoviq, Vladimir Radivojeviq, Ugljesa Jarediq, Milorad Jevtiq, Vlastimir Andriq, Aleksandar Milosavljeviq, Lazar Smigiq, Veljko Djordjeviq, Vladimir Vuçetiq, Stefan Jovanoviq, Milovan Krstoviq, Uros Miliq, Trajko Vasiq, Danilo Vasiq, Vukasin Jarediq, Sasa Periq, Nemanja Stankoviq, Momçilo Vuçkoviq, Stefan Radojkoviq, Marjan Radojeviq, Marko Arsiq, Zarko Cvetkoviq, Krsto Damjanoviq, Stefan Milosavljeviq, Marko Saviq, Aleksandar Jevremoviq, Radosh Gvozdiq, Ivan Miliq, Gojko Zubaq, Nemanja Radivojeviq, Radak Adziq, Millos Milenkoviq, Dorde Baloviq, Danijel Dukiq, Danilo Virijeviq, Aleksandar Tanaskoviq, Millos Kragoviq, Miljan Nedeljkoviq, Nikola Iliq dhe Vladan Iliq.

Sipas këtij dispozitivi, më 24 shtator 2023, nga ora 01:00, në fshatin Banjskë të Komunës së Zveçanit, i pandehuri Milan Radoiçiç, në cilësinë e kreut të grupit terrorist të strukturuar, së bashku me pjesëmarrësit, në role të ndryshme, duke filluar nga roli i bllokimit të rrugëve, të trajnuar në mënyrë profesionale, ku pjesa më e madhe e grupit pasi që kanë hyrë në mënyrë të organizuar përmes rrugëve malore ilegalisht në territorin e Republikës së Kosovës nga Serbia, me dhjetëra vetura e disa prej tyre edhe të blinduara, të mbushura me armë të rënda, municion, raketahedhës, eksplozivë, uniforma të kamufluara ushtarake dhe pajisje logjistike ushtarake, fillimisht kanë bllokuar rrugën tek ura e fshatit me dy kamionë.

Më tej, sipas aktakuzës të këta anëtarë të këtij grupi kriminal janë fshehur dhe kanë zënë pozicionet e tyre dhe pasi që kanë ardhur zyrtarët policorë të Republikës së Kosovës për t’i hequr kamionët dhe liruar rrugën, në atë moment i kanë sulmuar me eksplozivë dhe armë të rënda.

Tek ura e fshatit ka mbetur i vrarë zyrtari policor Afrim Bunjaku, si dhe është plagosur zyrtari policor Alban Rashiti, e janë lënduar zyrtarë të tjerë policorë: Çlirim Shaqiri, Mirsad Kryeziu dhe Sedat Dushi.

Gjithnjë sipas aktakuzës, sulmi ka vazhduar deri në orën 15:00 kur shumica dërmuese e këtij grupi janë arratisur në drejtim të rrugëve malore për në Serbi, e gjithë kjo me qëllim që seriozisht të destabilizojnë dhe shkatërrojnë strukturat themelore politike, kushtetuese, ekonomike, shoqërore të Republikës së Kosovës.

Tentativa për të shkëputur pjesën veriore të territorit të Republikës së Kosovës

Në këtë dispozitiv, të gjithë të akuzuarit e lartpërmendur akuzohen se në kohë, vend dhe mënyrë, ku Milan Radoiçiç në cilësi të kreut të grupit të strukturuar me gjithë të akuzuarit tjerë, kanë vepruar sipas përgatitjeve dhe planit të mirë-organizuar paraprakisht.

Aktakuza thotë se përmes përdorimit të dhunës me armatim të rëndë, kanë tentuar që të shkëpusin pjesën veriore të territorit të Republikës së Kosovës, respektivisht komunat e banuara me shumicë serbe. Këtë pjesë të territorit të njëjtit kanë tentuar t’ia bashkojnë Republikës së Serbisë,

Prokuroria Speciale në cilësinë e provave ka marrë 66 intervista, 120 pajisje elektronike e sekuestruan 1266 armë.

Që nga shtatori i 2023 e tutje, Policia e Kosovës në dhjetëra raste ka kryer aksione në lokacione të ndryshme në komunat veriore duke gjetur një arsenal armësh që u përdorën e pritej të përdoreshin në sulmin e Banjskës.Armët, dyshohet se u futën në Kosovë nga rrugët ilegale, të cilat tashmë është njoftuar se veçse janë mbyllur në këto zona.

Provat që u konfiskuan në pronat e Millan Radojçiq e që janë përfshirë në akuzën për terrorizëm nga grupi terroristë i përbërë nga 44 serbët nga Prokuroria Speciale, ka edhe një propozim për konfiskim, ku thuhet: Të konfiskohen mjetet e veprës penale dhe dobia pasurore e veprës penale e të pandehurve, të cilat përbëhen nga: Dy pllako të antiplumbit me dy mbrojtës gjetur në vilën e të pandehurit Milan Radoiçqi tek Liqeni i Ujmanit në Zubin Potok.

“Router Hauwei AR160 me nr. serik 2150010238256490059YAR169Y – gjetur në vilën e të pandehurit Millan Radoiçiq tek Liqeni i Ujmanit – Zubin Potok; 26. Router Hauwei me nr. serik 2102351366DMH5000291 gjetur në vilën e të pandehurit Millan Radoiçiq tek Liqeni i Ujmanit – Zubin Potok; 27. Një thikë/hanxhar gjetur në vilën e të pandehurit Millan Radoiçiq tek Liqeni i Ujmanit – Zubin Potok; 28. DVR Hik Vision me nr. serik E71446939 gjetur në vilën e të pandehurit Millan Radoiçiq tek Liqeni i Ujmanit – Zubin Potok; 29. Një DVR me nr. serik 3208H11609080013, gjetur në lokalin (Restorantin Grey) e të pandehurit Millan Radoiçiq; 30. Katër USB gjetur në banesën (Pent House) e të pandehurit Milan Radoiçiq; 31. Pesë gëzhoja të armës gjetur në banesën (Pent House) e të pandehurit Milan Radoiçiq; 32. Një kamerë GO PRO SSD gjetur në banesën (Pent House) e të pandehurit Milan Radoiçiq; 33. Një Dron me nr. serik MR15025 gjetur në banesën (Pent House) e të pandehurit Milan Radoiçiq; 34. Një (1) Video kamerë Sony me kartelë SSD gjetur në banesën (Pent House) e të pandehurit Milan Radoiçiq; 35. Një DVR, lloji “TVT” me nr. serik 3316HD1612100008 gjetur në banesën (Pent House) e të të pandehurit Milan Radoiçiq; 36. Një Laptop “ACER” me nr. serik NHQ1LEX029712099D966600 gjetur në zyre të lokalit (Restorantit Grey) të pandehurit Milan Radoiçiq; 37. Një fletore me disa fletë me shënime gjetur në zyre të lokalit (Restorantit Grey) të pandehurit Milan Radoiçiq; 38. Material ngjyrë argjendi (aliazh) gjetur në zyre të lokalit (Restorantit Grey) të pandehurit Milan Radoiçiq”.

Sipas aktakuzës, të cilën Prokuroria Speciale e Kosovës e ngriti kundër 45 personave më 11 shtator sipas Urdhrit ndalues përfundimtar të dt.03.11.2023 ishte Villa tek Ujmani në Zubin Potok me objektet përcjellëse, lidhur me të pandehurin Millan Radoiçiq; Barka/Anija me targa BO-380-BG, në Villen tek Ujmani në Zubin Potok me objektet përcjellëse, lidhur me të pandehurin Millan Radoiçiq; Motor me katër rrota me targa ÇU-AAH-21 në Villen tek Ujmani në Zubin Potok me objektet përcjellëse, lidhur me të pandehurin Milan Radoiçiq; Një veturë Mercedes me targa “BG-1769-CL” ngjyrë e zezë dhe çelësi i kësaj veture, gjetur në garazhën e banesës “Pent House” me adresë në “Çika Jovina” në Mitrovicë të Veriut, lidhur me të pandehurin Millan Radoiçiq; Një veturë Mercedes me targa “BG-1882-CB” ngjyrë e zezë dhe çelësi i kësaj veture, gjetur në garazhën e banesës “Pent House” me adresë në Rr.“Çika Jovina” në Mitrovicë të Veriut, lidhur me të pandehurin Milan Radoiçiq; Një (motor) 40 – ngjyrë e kuqe, gjetur në në garazhën e banesës “Pent House” me adresë në Rr.“Çika Jovina” në Mitrovicë të Veriut, lidhur me të pandehurin Millan Radoiçiq,

Banesë “Penthouse” në Rr.”Çika Jovina” në Mitrovicë të Veriut lidhur me të pandehurin Millan Radoiçiq; Lokali “Restorant Grey” duke përfshirë aneksin – zyrën e Restorantit, me adresë në Rr.“Çika Jovina” në Mitrovicë të Veriut lidhur me të pandehurin Millan Radoiçiq.

Oficeri i FSK-së, Nëntoger Enis Cikaqi, diplomon në SHBA

Posted on by Drin Reçica

Nëntoger Enis Cikaqi ka përfunduar me sukses kursin “Air Defense Artillery Basic Officer Leader Course (ADA BOLC)” në Fort Sill, Oklahoma, ShBA, duke u bërë oficeri i parë nga Kosova që diplomon në këtë program prestigjioz, përcjell albinfo.ch.

Ky arritje tregon përkushtimin dhe profesionalizmin e oficerëve të FSK-së, të cilët po përfaqësojnë denjësisht Republikën e Kosovës në programe ndërkombëtare trajnimi ushtarak. Pjesëmarrja dhe sukseset në kurse të tilla të specializuara jo vetëm që forcojnë aftësitë individuale të oficerëve, por kontribuojnë edhe në zhvillimin dhe ngritjen e kapaciteteve të Forcës së Sigurisë së Kosovës.

Forca e Sigurisë së Kosovës mbetet e përkushtuar në mbështetjen e oficerëve të saj për zhvillim profesional dhe avancim të standardeve të mbrojtjes dhe sigurisë së vendit.

Profesori shqiptar në mesin e 2% të shkencëtarëve më të cituar në botë

Posted on by Drin Reçica

Një arritje e jashtëzakonshme për Universitetin e Prishtinës dhe shkencën shqiptare! Profesori Avni Berisha nga Fakulteti i Shkencave Matematike-Natyrore është renditur ndër 2 për qind të shkencëtarëve më të cituar në botë, sipas listës së publikuar nga Universiteti i Stanfordit më 19 shtator 2025, transmeton albinfo.ch.

Ky vlerësim ndërkombëtar fuqizon jo vetëm reputacionin e profesorit Berisha, por edhe të fakultetit dhe vetë Universitetit të Prishtinës, duke dëshmuar nivelin e lartë të kërkimit shkencor që zhvillohet në Kosovë.

Renditja e Universitetit të Stanfordit, e realizuar në bashkëpunim me Elsevier, përfshin të dhëna nga mbi 100 mijë shkencëtarë të platformës “Scopus”, duke analizuar ndikimin e citimeve në 22 fusha dhe 174 nënfusha shkencore.

Profesori Berisha ka qenë pjesë e kësaj liste prestigjioze edhe vitin e kaluar, duke treguar qëndrueshmëri dhe një ndikim të vazhdueshëm në komunitetin shkencor global.

Kjo arritje është një dëshmi e kontributit të çmuar të shkencëtarëve shqiptarë në arenën ndërkombëtare dhe një motivim i fuqishëm për gjeneratat e reja që ndjekin rrugën e shkencës dhe kërkimit. /Albinfo.ch

Të rinjtë shqiptarë në Suedi pushtojnë toplistat e Spotify

Posted on by Drin Reçica

Në një studio të vogël në qytetin Höör të Suedisë, dy të rinj të diasporës sonë, Engjell Morina dhe Ilir Isufi, së bashku me mikun e tyre suedez Filip Nilsson, po krijojnë muzikë që po korr sukses të madh në skenën suedeze, transmeton albinfo.ch.

Kënga “Ay Ay”, e interpretuar nga reperi kosovaro-suedez Nuqi, ka ndezur atmosferën në festivalin e madh të Malmös – Malmöfestivalen, ku mijëra pjesëmarrës kënduan së bashku. Ky moment i paharrueshëm shënon një nga sukseset e para të producentëve të rinj shqiptarë në Suedi.

Morina, Isufi dhe Nilsson tashmë kanë futur projektet e tyre në toplistat e Spotify, duke dëshmuar talentin, energjinë dhe përkushtimin e rinisë sonë në diasporë. Për ta, ky është vetëm fillimi i një rrugëtimi që synon majat e industrisë muzikore në Suedi dhe më gjerë.

Ky sukses në zhanrin hip hop është një shembull i fuqisë së diasporës shqiptare, që përmes artit dhe kulturës po tregon se është një zë i rëndësishëm në skenën ndërkombëtare. /Albinfo.ch 

https://www.skd.se/artikel/i-hoor-skapas-hits-tva-hiphoplatar-pa-spotifys-topplistor-i-sommar/

 

Miss Amerika 2025, Samantha Shkreli Sarelli, në një event me Presidenten Vjosa Osmani

Posted on by Drin Reçica

Modelja dhe Missi me origjinë shqiptare, Samantha Shkreli Sarelli, e cila pak muaj më parë u kurorëzua si Miss Amerika duke fituar titullin prestigjioz “The Miss Globe USA 2025”, ka organizuar së fundmi një event të veçantë me miq dhe të ftuar të nderit, shkruan albinfo.ch.

Sarelli, e cila në vitin 2020 mbante edhe titullin “Former Miss Connecticut Teen USA”, po shënon hapa të rëndësishëm në karrierën e saj modeluese.

Ngjarja mori edhe më shumë vëmendje pasi pjesë e saj ishte edhe Presidentja e Republikës së Kosovës, Vjosa Osmani, e cila ndodhet për vizitë në Shtetet e Bashkuara të Amerikës. Osmani u prit ngrohtësisht nga Samantha dhe të pranishmit, duke e kthyer këtë mbrëmje në një moment simbolik të krenarisë kombëtare dhe fuqizimit të grave shqiptare në arenën ndërkombëtare.

“Ishte nder të presim mbrëmjen duke festuar Presidenten e Republikës së Kosovës Vjosa Osmani. Ajo është një model i mahnitshëm për gratë e reja në mbarë globin. Faleminderit si gjithmonë ekipit tim @shoqataulqini_usa dhe të gjithëve që ndihmuan në realizimin e eventit”, – u shpreh Samantha Shkreli Sarelli pas përfundimit të eventit.

Ky aktivitet shënon një tjetër hap të rëndësishëm në angazhimin e Miss Amerikës 2025, jo vetëm në botën e modës, por edhe në përfaqësimin e vlerave dhe kulturës shqiptare në arenën ndërkombëtare.

Samantha, e njohur për aktivitetin e saj në fushën e modelimit, thekson se roli i saj shkon përtej bukurisë. “Titulli im nuk ka të bëjë vetëm me bukurinë dhe modelimin. Ka të bëjë me ndikimin. Shumë njerëz mendojnë se kjo ka të bëjë vetëm me pamjen, por ka të bëjë edhe me ndihmën ndaj të tjerëve,” shprehet ajo për platformën Albinfo.ch. 

Ajo ishte e ftuar edhe në Shtëpinë e Bardhë në Washington DC, ku mori pjesë për shkak të angazhimit të saj në luftën kundër trafikimit të qenieve njerëzore dhe promovimin e të drejtave të grave.

 

 

 

 

ChatGPT vendos kufij për të rinjtë

Posted on by Alb

OpenAI po punon për një sistem të parashikimit të moshës në ChatGPT, i cili synon të sigurojë një përvojë të përshtatshme për përdoruesit nën 18 vjeç. Në raste të caktuara, mund të kërkohet edhe verifikim identiteti.

Ky sistem automatizuar do të vlerësojë nëse një përdorues është nën 18 vjeç dhe më pas do të ofrojë një përvojë të përshtatur për moshën. Nëse mosha nuk mund të përcaktohet saktë, OpenAI mund të kërkojë dokument identifikimi për të siguruar përdorimin e duhur të platformës.

CEO i OpenAI, Sam Altman, theksoi se ChatGPT është menduar për përdorues mbi 13 vjeç. Ai shpjegoi se mosha e një përdoruesi do të përcaktohet bazuar në mënyrën e përdorimit të ChatGPT. “Në rast dyshimi, do të ofrojmë një përvojë të përshtatshme për ata nën 18 vjeç. Në disa situata, mund të kërkohet edhe verifikim identiteti. Ky është një kompromis për privatësinë, por i nevojshëm për siguri,” tha Altman.

Ai shtoi se përdoruesit do të mund të bashkëveprojnë me ChatGPT sipas dëshirës, brenda kufijve të sigurisë. Versioni aktual i chatbot-it nuk është krijuar për të qenë flirtues dhe nuk duhet të japë udhëzime për vetëvrasje. Megjithatë, nëse një përdorues i rritur kërkon të shkruajë një histori imagjinare që përfshin këtë temë, ChatGPT mund të ndihmojë me atë kërkesë.

Kur përdoruesi është nën 18 vjeç, funksionalitetet e lidhura me flirtin ose vetëvrasjen do të çaktivizohen. Në rast se një përdorues i ri shpreh mendime vetëvrasëse, sistemi do të përpi

 

Puna nga shtëpia: Këshilli Kombëtar kërkon të lehtësojë rregullat

Posted on by Alb

Këshilli Kombëtar ka kërkuar më shumë fleksibilitet në punën nga shtëpia. Ata që punojnë shpesh nga shtëpia e dinë që fleksibiliteti u jep mundësi të përfshijnë gjëra personale si lavanderia, shëtitjet apo marrja e fëmijëve nga çerdhet.

Megjithatë, kompensimi i punës së humbur më vonë mund të jetë stresues. Aktualisht, punonjësit mund të punojnë vetëm brenda një periudhe 14-orëshe. Për shembull, kush fillon punën në ora 7 të mëngjesit nuk mund të punojë pas orës 21:00. Ata që duan të kompensojnë punën e humbur të dielën duhet të marrin një leje të veçantë, transmeton albinfo.ch.

Këshilli Kombëtar ka miratuar një propozim të anëtarit të Këshillit të Shteteve nga FDP, Thierry Burkart, me 119 vota pro, 63 kundër dhe 5 abstenime.

Punë deri në 17 orë

Propozimi lejon që puna nga shtëpia të zgjasë 17 orë në vend të 14, ndërkohë që periudha e pushimit do të ulet nga 11 në 9 orë. Gjithashtu, do të sigurohet e drejta për të mos qenë e disponueshme gjatë periudhave të caktuara.

Këshilli Federal mbështeti gjithashtu propozimin. Vetëm Partia Socialdemokrate (SP) dhe e Gjelbërat ishin kundër, duke shqetësuar për përkeqësim të mbrojtjes së punonjësve.

Propozimi tani i shkon Këshillit të Shteteve për shqyrtim.

Atentati ndaj Trump: Ryan Routh shpallet fajtor dhe dënohet me burgim të përjetshëm

Posted on by Alb

Ryan Routh është gjetur fajtor për përpjekje për të vrarë presidentin amerikan Donald Trump në fushën e tij të golfit në West Palm Beach. 59-vjeçari përballej me pesë akuza, përfshirë tentativën për vrasje të një kandidati presidencial, mbajtje armësh pa leje gjatë një akti dhune dhe sulm ndaj një agjenti të Shërbimit Sekret.

Sipas raportimeve të The Guardian, prokurorët thanë se Routh kishte blerë një armë të klasifikuar si ushtarake, kishte ndjekur lëvizjet e Trump dhe kishte përdorur më shumë se 12 telefona të përkohshëm për të planifikuar atentatin. Ai kishte vizituar fushën e golfit të presidentit 17 herë për ta vëzhguar dhe më parë ishte përpjekur të rekrutonte luftëtarë nga Afganistani, Moldavia dhe Tajvani për të luftuar në Ukrainë kundër forcave ruse.

Gjatë gjyqit, dy dëshmitarë deklaruan se Routh kishte dërguar pesë muaj para ngjarjes një kuti, e mbushur me tela, fishekë dhe një letër 12-faqëshe ku shkruhej: “Kjo ishte një tentativë për të vrarë Donald Trump, por dështova. Dhurova gjithçka që kisha. Tani është radha juaj për të përfunduar punën.”

Ngjarja ndodhi më 15 shtator 2024, kur Routh u kap me një pushkë në shkurre, teksa Trump dhe grupi i tij i afroheshin vendit të ngjarjes. Pas diskutimeve të shkurtra, juria e shpalli fajtor për të gjitha akuzat. Ai tani përballet me burgim të përjetshëm. Ky incident ndodhi vetëm nëntë javë pas një tjetër tentative për vrasje ndaj Trump gjatë një mitingu në Butler, Pennsylvania, ku presidenti pësoi një lëndim të lehtë nga një plumb në vesh.

Tre shqiptarë përgjegjës për 40 vjedhje në Zvicër, dalin para gjykatës

Posted on by Alb

Tre burra nga Shqipëria dyshohen se kanë kryer 40 vjedhje në të gjithë Zvicrën dhe kanë përfituar rreth 500,000 franga. Tani ata gjenden para Gjykatës Rajonale të Berner Oberland në Thun.

Sipas prokurorisë, të akuzuarit, të moshës 27 deri 38 vjeç, kanë kryer vjedhjet gjatë periudhës tetor 2023 – tetor 2024, duke vepruar nga rajoni i Liqenit të Gjenevës deri në Winterthur.

Ata kanë vjedhur bizhuteri dhe para në dorë, ndërsa dëmet materiale arrijnë mbi 75,000 franga. Hetimet tregojnë se grabitësit nuk hezituan të hyjnë në shtëpi edhe kur dritat ishin ndezur, banorët ose qentë ishin të pranishëm, dhe shpesh vizitonin disa prona në të njëjtin lagje ose ktheheshin në zona ku kishin vepruar më parë, transmeton albinfo.ch.

Kapja në St-Imier

Në fund të tetorit 2024, policia i arrestoi ata në St-Imier, kantoni Bern. Gjatë kontrollit, policia gjeti mjete për vjedhje dhe sende të vjedhura në makinën e tyre. Prej atëherë, tre burrat ndodhen në paraburgim.

Njëri nga të akuzuarit ka një histori të mëparshme kriminale: në vitet 2012 dhe 2022, ai dyshohet për nëntë vjedhje të tjera, me fitim mbi 100,000 franga.

Tani, tre burrat përballen me akuza për vjedhje të organizuar dhe do të përgjigjen para Gjykatës Rajonale të Berner Oberland.

 

Më shumë vende studimi për mjekësi në Cyrih

Posted on by Alb

Zyra e Arsimit e Kantonit të Cyrihut ka njoftuar një zgjerim të numrit të vendeve të studimit në Fakultetin e Mjekësisë të Universitetit të Cyrihut: nga 430 vendet aktuale, numri pritet të rritet në 700 në vit.

Siç deklaroi Drejtoresha e Arsimit të Cyrihut, Silvia Steiner, në një konferencë për shtyp, zgjerimi i kapaciteteve do t’i kushtojë Kantonit të Cyrihut gati gjysmë miliardi franga zvicerane gjatë fazës së zgjerimit deri në vitin 2036. Po kërkohet bashkëfinancim nga qeveria federale dhe, nëse është e nevojshme, edhe nga kantonet e tjera.

Silvia Steiner theksoi: “Ne kemi një nga sistemet më të mira shëndetësore në botë, dhe kujdesi mjekësor është i sigurt. Megjithatë, ka një mungesë të konsiderueshme të mjekëve të trajnuar në Zvicër. Kjo mungesë kompensohet duke rekrutuar specialistë të huaj të trajnuar jashtë vendit.”

Sipas Departamentit të Arsimit, rreth 40 për qind e mjekëve që ushtrojnë profesionin aktualisht vijnë nga jashtë, konkretisht dy nga pesë. “Ne duam të ndryshojmë këtë,” tha Steiner. “Synojmë të formojmë më shumë mjekë brenda Zvicrës.” Me këtë zgjerim, Kantonit të Cyrihut i takon roli i rëndësishëm në përpjekjen për të luftuar mungesën e mjekëve, pasi studimet parashikojnë një deficit prej 5,500 deri në 8,700 mjekëve në gjithë Zvicrën deri në vitin 2040.

Zgjerimi i infrastrukturës është i nevojshëm

Me rritjen e numrit të vendeve të studimit, programi mjekësor do të rishikohet gjithashtu. “270 vendet e reja nuk mund të përballohen me format aktuale të mësimdhënies apo me infrastrukturën ekzistuese,” shpjegon Steiner. “Prandaj, duhet të investojmë dhe të ripërpunojmë të gjithë programin mjekësor. Kurrikula duhet të jetë e orientuar ndaj praktikës, digjitale dhe teknologjikisht e avancuar, duke ruajtur cilësinë e lartë të studimeve.”

Prioritet do të vendoset gjithashtu në fusha ku mungesa e mjekëve është më e theksuar ose pritet të ndodhë në të ardhmen, si në mjekësinë familjare ose psikiatri.

Fillimi në vitin 2030

Zgjerimi i kapaciteteve kërkon hapësira shtesë mësimore prej rreth 24,000 metra katrorë dhe dhjetë profesura të reja me gjithsej rreth 140 pozicione me kohë të plotë. Programi i parë i ri mjekësor, me 700 vende në vend të 430, pritet të nisë në vitin 2030.

 

Shkatërrohet rrjeti sirian: Paratë e drogës u konvertuan në ar dhe u transportuan edhe në Kosovë

Posted on by Alb

Prokurorët italianë njoftuan se kanë shkatërruar një rrjet kriminal të udhëhequr nga shtetas sirianë, i akuzuar për pastrimin e parave nga trafiku i drogës në Itali dhe Francë. Sipas hetuesve, paratë e fituara nga droga u kthyen në shufra ari, të cilat më pas u transportuan edhe drejt Kosovës, si dhe në vende të tjera si Maqedonia e Veriut, Turqia dhe Maroku, përcjell albinfo.ch.

Policia italiane arrestoi pesë persona në rajonet veriore të Piedmontit dhe Lombardisë dhe sekuestruan 17 milionë euro. Hetimi u realizua nga një ekip i përbashkët që përfshinte policinë tatimore italiane dhe xhandarmërinë franceze në Marsejë, nën koordinimin e Drejtorisë Kombëtare Kundër Mafias në Itali dhe prokurorisë në Marsejë, me mbështetjen e Eurojust dhe Europol.

Gjatë një periudhe gjashtëmuajshe, të dyshuarit mblodhën mbi 17 milionë euro nga shitja e drogës, kryesisht në Francë, dhe i transportuan ato drejt zonës pranë Piedmontit në kufi me Francën. Në këtë zonë, në bashkëpunim me tre kompani që merreshin me shkrirjen e metaleve të çmuara, paratë u konvertuan në shufra dhe fletë ari me vlerë të barabartë monetare.

Prokurorët e përshkruan këtë si rastin e parë ku hetuesit kanë arritur të ndjekin rrjedhën e parave të drogës që prodhoheshin jashtë vendit dhe më pas shndërroheshin në ari – një formë më e lehtë për transport. Hetuesit kanë identifikuar gjithashtu një rrjet të gjerë sirianësh të përfshirë në këtë operacion.

Sipas autoriteteve, xhandarmëria franceze ka kryer gjithashtu arrestime të tjera për persona të përfshirë në mbledhjen e të ardhurave nga droga në Francë.

Bankomatet dhe tërheqjet e parave po zvogëlohen në Zvicër për shkak të përdorimit më të ulët të parasë në dorë

Posted on by Alb

Me botën që po digjitalizohet gjithnjë e më shumë, bankomatet dhe makinat e tërheqjes së parasë po bëhen gjithnjë e më të rralla. Disa banka po e reduktojnë ose po e heqin fare këtë shërbim, ndërsa të tjera vazhdojnë ta ofrojnë, me kosto operative që shkojnë nga 2 deri në 10 franga për çdo tërheqje.

Me rritjen e përdorimit të kartave bankare, aplikacionit Twint dhe pagesave pa kontakt, disa banka kanë hequr mundësinë e tërheqjes ose depozitimit të parave në sportel. Kjo është e vërtetë për shumicën e degëve të Raiffeisen dhe gjysmën e degëve të UBS, transmeton albinfo.ch.

Disa banka kantonale vazhdojnë me sportelet

Megjithëse kërkesa për shërbime me para në dorë ka rënë, disa banka kantonale kanë vendosur t’i mbajnë sportelet hapur. Por kjo është e kushtueshme, shpjegon për rts Gregory Baumann, përgjegjës për kontrollin e menaxhimit në Bankën Kantonale.

“Kostoja kryesore e një sporteli sot është paga e punonjësve”, thekson ai. Përveç kësaj, përfshihen edhe shpenzimet për menaxhimin e parasë dhe për sistemet IT. Në total, kjo përfaqëson 5 deri në 10 franga për çdo depozitë ose tërheqje.

Bankomatet, gjithnjë e më pak fitimprurëse

Një tërheqje ose depozitë në bankomat kushton mesatarisht 2 franga në shpenzime operative. Ky është një nga arsyet pse numri i bankomateve është ulur në zonat më pak të frekuentuara – nga 7,300 në vitin 2019 në 6,200 në vitin 2024, sipas të dhënave të Bankës Kombëtare të Zvicrës (SNB).

Ndërkohë që zviceranët po përdorin më pak para në dorë, mirëmbajtja e një bankomati është gjithnjë e më e shtrenjtë. “Llogaritet se kostoja vjetore për një bankomat është rreth 30,000 franga”, thotë Virgile Perret nga Observatoire de la Finance. “Kjo rëndon sidomos mbi bankat komerciale, të cilat mbulojnë pjesën më të madhe të këtyre shpenzimeve, pasi shërbimi po bëhet gjithnjë e më pak fitimprurës.”

Megjithatë, edhe pse përdorimi i parasë po bie, 95% e zviceranëve mbeten të lidhur me paratë në dorë, sipas një sondazhi të SNB-së.

Primet e sigurimit shëndetësor në Zvicër rriten me 4.4% në vitin 2026

Posted on by Alb

Primet e sigurimit shëndetësor në Zvicër do të rriten sërish në vitin 2026, me një mesatare prej 4.4%. Rritjet e njëpasnjëshme po i shtyjnë qytetarët të kërkojnë modelet më të lira, por ekspertët paralajmërojnë se këto zgjedhje shpesh kufizojnë ndjeshëm lirinë e pacientëve.

Nëse dëshironi të zgjidhni vetë mjekun e familjes, të përcaktoni specialistin që do t’ju ndjekë për trajtime kronike apo të shmangni telefonatat në qendra këshillimi para një vizite, është e rëndësishme të jeni të kujdesshëm kur zgjidhni siguruesin e ri.

Disa modele janë dukshëm më të lira, por vijnë me kufizime të forta. Pikërisht për këtë arsye, Federata e Konsumatorëve frankofonë (FRC) në bashkëpunim me RTSinfo dhe emisionin “On en parle” kanë krijuar një mjet krahasimi ku qytetarët mund të shohin jo vetëm çmimet, por edhe kushtet e sigurimit shëndetësor të detyrueshëm.

Për të përdorur kalkulatorin, nevojiten të dhëna bazë si: kodi postar ose komuna e banimit, mosha e të siguruarit, shuma e franshizës, modeli i sigurimit dhe nëse përfshihet ose jo mbulimi i aksidenteve.

Reagime dhe shqetësime

Ministrja e Shëndetësisë, Elisabeth Baume-Schneider, e ka quajtur rritjen e primave një “problem madhor” dhe ka kërkuar vazhdimin e reformave. Në diskutim janë edhe masa të tjera, si pagesa alternative e mjekëve apo negociatat me industrinë farmaceutike për uljen e çmimeve të barnave.

Çfarë do të thotë kjo për qytetarët?

Rritja e re prek drejtpërdrejt buxhetin familjar dhe nxit nevojën për krahasime më të kujdesshme. Ekspertët sugjerojnë që qytetarët të mos shohin vetëm çmimin, por edhe shërbimet dhe kufizimet që përfshin secili model sigurimi.

Për herë të parë në Kosovë e Ballkan, kryhen operacione të rralla për sindromën MRKH në QKUK

Posted on by Alb

Në Klinikën e Obstetrikës dhe Gjinekologjisë të Qendrës Klinike Universitare të Kosovës (QKUK), janë realizuar për herë të parë në Kosovë dhe në Ballkan dy operacione të rralla tek pacientet me sindromën Mayer-Rokitansky-Küster-Hauser (MRKH).

Ndërhyrjet u kryen nga Prof. Dr. Alban Y. Neziri, në bashkëpunim me drejtorin e klinikës, Dr. Zef Ndreaj, dhe ekipin profesional të KOGj-së.

Pacientet e operuara vuajnë nga aplazia e mitrës dhe vaginës, një gjendje e njohur si sindroma MRKH, e cila është anomali kongjenitale që shkakton moszhvillimin e këtyre organeve gjatë fazës embrionale.

Operacionet u realizuan duke përdorur metodën Wharton-Sheares-George për krijimin e një neovagine, një teknikë e specializuar që ndihmon në përmirësimin e cilësisë së jetës së pacienteve.

Ky sukses shënon një arritje të rëndësishme për shëndetësinë në Kosovë, duke hapur mundësi të reja për trajtime të avancuara, madje edhe mundësinë e transplantimit të mitrës në të ardhmen në qendra të specializuara evropiane.

Prof. Dr. Alban Y. Neziri u shpreh se ky është një hap i madh për mjekësinë kosovare.

“Jam i nderuar që së bashku me kolegët e QKUK-së dhe me mbështetjen e drejtorit të klinikës, Dr. Zef Ndreaj, arritëm të realizojmë me sukses këto ndërhyrje të ndërlikuara. Ky është një shembull se si me bashkëpunim dhe përkushtim mund të arrijmë standarde të reja në shëndetësinë tonë”, tha ai, transmeton albinfo.ch.

SHSKUK ka falënderuar Prof. Dr. Nezirin, Dr. Ndrejajn dhe gjithë stafin e KOGj-së për profesionalizmin dhe kontributin në këtë arritje të veçantë.

 

Sa është e gatshme Shqipëria të përdorë teknologjinë në turizëm

Posted on by BR

Një studim gjithëpërfshirës mbi gatishmërinë teknologjike në sektorin e mikpritjes shqiptare sapo është publikuar në revistën shkencore ndërkombëtare “Tourism and Hospitality” (MDPI), e renditur me faktor impakti 3.7, ndër më të lartët në fushën e turizmit dhe mikpritjes.

Akademia e Shkencave përgëzoi sot anëtaren e saj akademike Kozeta Sevrani, institucionet dhe partnerët e përfshirë.

“Kjo arritje e spikatur jo vetëm i shërben kërkimit shkencor, por edhe krijon ura të reja bashkëpunimi midis politikës publike, industrisë dhe universiteteve”, theksoi ASH në një postim në rrjetet sociale, transmeton albinfo.ch.

Ky studim, i cili përfshin 1821 struktura të licencuara hoteliere dhe akomoduese në Shqipëri, përfaqëson kontributin më të madh empiriko-statistikor deri më sot tek ne mbi këtë tematikë.

Rezultatet e tij ndikojnë jo vetëm në imazhin ndërkombëtar të turizmit shqiptar, por edhe në politikëbërje, strategji investimi dhe ndërveprime akademiko-industriale në nivel rajonal dhe global.

Punimi është rezultat i një partneriteti ndërinstitucional mes Fakultetit të Ekonomisë të Universitetit të Tiranës, INSTAT, AKSHI dhe aktorëve të industrisë, duke demonstruar se ndërthurja e akademisë, shtetit dhe biznesit mund të prodhojë evidenca të matshme e të dobishme për zhvillimin ekonomik dhe konkurrueshmërinë ndërkombëtare.

Gjetjet kryesore dhe treguesit analitikë tregojnë se në Shqipëri ka një gatishmëri të lartë për implementimin teknologjisë IA në strukturat hotelier, por barrierë mbetet financimi. Vetëm 37,2% e strukturave përdorin sisteme të menaxhimit hotelier (PMS). Më pak se 10% aplikojnë teknologji të avancuara, si chatbot, revenue management ose sisteme inteligjente të automatizimit. Ndërsa 75% e të anketuarve i perceptojnë teknologjitë smart si mjete që rrisin efikasitetin operacional, kursimin e energjisë dhe cilësinë e përvojës së klientit.

Analiza tipologjike e bizneseve nxjerr tre grupe kryesore: Liderë Teknologjikë (17,7%) – përqafues aktivë të inovacionit; Përdorues Selektivë (43,5%) – të kufizuar në përdorime të pjesshme; Skeptikë (38.8%) – me rezistencë ndaj transformimit digjital.

Në Shqipëri, sipas studimit, teknologjia përdoret në pastrim (Robotët në pastrimin e dyshemesë, shërbim..etj), çelësat inteligjentë të dyerve, kamerat inteligjente të sigurisë, sensorët për kursimin e energjisë, si edhe komunikimi online me klientët, duke automatizuar proceset e vlerësimit të klientëve, si edhe përgjigjet ndaj pyetjeve të tyre. Kjo ka ndihmuar në ndërlidhjen mes paraqitjes online të strukturave hoteliere dhe platformave të tjera të turizmit dhe udhëtimeve.

Aktualisht, është në zhvillim faza e dytë e studimit, e fokusuar në pritshmëritë dhe përvojën e klientëve ndaj teknologjive smart.

Ky studim pritet të furnizojë politikëbërësit dhe industrinë me të dhëna të vlefshme për përputhjen e shërbimeve shqiptare me standardet ndërkombëtare të turizmit të digjitalizuar dhe të qëndrueshëm.

Zvicra është më e mira në botë në ruajtjen e talenteve

Posted on by BR

Zvicra ka mbrojtur pozicionin e saj në krye të Renditjes Botërore të Talenteve IMD 2025, e cila është hartuar nga Instituti Ndërkombëtar për Zhvillimin e Menaxhimit (IMD) me seli në Lozanë.

Sipas një njoftimi për shtyp, nga 69 ekonomi të hetuara, Zvicra del si vendi me aftësinë më të theksuar për të zhvilluar, tërhequr dhe mbajtur kapitalin njerëzor të nevojshëm për të fuqizuar rritjen e qëndrueshme.

Të dhënat statistikore dhe përgjigjet e anketave të ofruara nga një total prej 6,192 drejtuesish u përdorën për vlerësimet, transmeton albinfo.ch.

Sipas një raporti të lëshuar nga shkolla e biznesit që mbulon renditjen e këtij viti, një arsye për dominimin e Zvicrës gjatë dekadës së fundit është “efektiviteti i forcës institucionale, sistemeve të forta arsimore dhe kornizave të qëndrueshme të politikave që ajo ka në vend”. Megjithatë, edhe Zvicra përjeton sfida në rritje në lidhje me gjetjen e talenteve të kërkuara në dritën e teknologjive dhe Inteligjencës Artificiale në zhvillim të vazhdueshëm. “Edhe ekonomitë kryesore më të qëndrueshme sot përballen me presione në rritje për të adresuar dobësitë strukturore, të tilla si boshllëqet e pjesëmarrjes gjinore dhe nën-përfaqësimi në fushat STEM, të cilat mund të sfidojnë performancën e tyre të ardhshme”, siç paralajmëron në raport Fabian Grimm, Specialist i Kërkimeve në Qendrën Botërore të Konkurrencës.

Lidhur me trendin më të rëndësishëm të parë nga anketa aktuale, studiuesit kanë identifikuar se, në mes të klimës së paparashikueshme gjeopolitike aktualisht, profesionistët e kualifikuar po i japin më shumë vlerë pagës sesa aspekteve të tilla si cilësia e jetës, gjuha dhe një mjedis i përshtatshëm kulturor. Këta faktorë ishin ende faktorë kyç në vendimet e zhvendosjes para pandemisë COVID-19.

Sot, shumica e të anketuarve duket se vlerësojnë sigurinë financiare dhe përfitimet materiale, të cilat autorët e renditjes ia atribuojnë një sërë krizash në vitet e fundit, duke filluar nga luftërat në Evropë dhe Lindjen e Mesme deri te përshpejtimi i inflacionit dhe rritja e çmimeve të ushqimit dhe energjisë.

Luksemburgu, Islanda, Hong Kongu, Holanda dhe Suedia zënë vendet pas Zvicrës. Austria vjen në vendin e 10-të, ndërsa Gjermania dhe Franca renditen përkatësisht në vendin e 13-të dhe të 26-të.

Trump e ripërsërit se ndali luftën mes Kosovës dhe Serbisë

Posted on by BR

Presidenti i SHBA-ve, Donald Trump ka përsëritur sërish se u ka dhënë fund shtatë luftërave gjatë mandatit të tij të dytë.

Trump para OKB-së të martën tha se njerëzit i kishin thënë se këto konflikte ishin “të pafundme”.

Ai shtoi se konfliktet midis Kamboxhias dhe Tajlandës; Kosovës dhe Serbisë; Pakistanit dhe Indisë; Izraelit dhe Iranit; Egjiptit dhe Etiopisë; Armenisë dhe Azerbajxhanit; dhe “luftën e egër dhe të dhunshme” midis Republikës Demokratike të Kongos dhe Ruandës, transmeton albinfo.ch.

“Luftërat” që ai renditi ishin midis: Izraelit dhe Iranit, Pakistanit dhe Indisë, Ruandës dhe Republikës Demokratike të Kongos (RDK), Tajlandës dhe Kamboxhias, Armenisë dhe Azerbajxhanit, Egjiptit dhe Etiopisë dhe Serbisë dhe Kosovës, tha Trump.

Ndër të tjera ai tha se asnjë president tjetër nuk ka “bërë kurrë diçka të ngjashme”.

https://www.facebook.com/share/v/1D1XfdwQjj/

“Kosova është shteti më pro-amerikan në botë”

Posted on by BR

Presidentja e Kosovës, Vjosa Osmani sot në një paraqitje në programin “Fox and Friends” në FOX News theksoi se Kosova është shteti më pro amerikan në botë.

Osmani theksoi se kështu është që nga viti 1999 kur ushtarët amerikanë shpëtuan qytetarët e Kosovës dhe se Kosova sot është e lirë dhe sovrane sepse SHBA-të nuk qëndruan duarkryq dhe nuk i mbyllën sytë para gjenocidit.

“Kosova është shteti më pro-amerikan në botë dhe ne e mbajmë këtë si një nder të madh. Kështu ka qenë që nga viti 1999, kur ushtarët amerikanë erdhën për të na shpëtuar. Sot ekzistojmë si komb i lirë dhe sovran sepse Shtetet e Bashkuara nuk qëndruan duarkryq, nuk mbyllën sytë para vuajtjeve tona gjatë gjenocidit, por erdhën në ndihmë dhe besuan në të drejtën tonë të dhënë nga Zoti për të qenë të lirë si komb. Prandaj, sot mbi 97% e qytetarëve të Kosovës janë pro-amerikanë. Ne besojmë në lidershipin amerikan dhe vazhdojmë të qëndrojmë krah për krah me Shtetet e Bashkuara, tani edhe duke mbrojtur vende të tjera që kanë nevojë për ndihmën tonë”, tha ajo, transmeton albinfo.ch.

Duke folur për situatën e sigurisë në Kosovë dhe rajon, e para e shtetit tha se Serbia herë pas here dëshiron të krijojë probleme, gjersa rikujtoi se në të kaluarën ky shtet shkaktoi konflikte në Ballkanin Perëndimor.

“Siç e dini, kemi një fqinj që herë pas here dëshiron të krijojë probleme. Serbia në të kaluarën shkaktoi një numër konfliktesh në Ballkanin Perëndimor sepse drejtohej nga kasapi i Ballkanit, Millosheviqi… Çështja është se ende ka njerëz në udhëheqjen e Serbisë që duan të kapen pas së kaluarës dhe të na kthejnë të gjithëve aty, ndërkohë që ne duam të shohim nga e ardhmja. Presidenti Trump na ka ndihmuar shumë për të mbështetur dhe ruajtur paqen, për të shpëtuar jetë. Dhe kjo ka qenë thelbësore”, tha ajo, transmeton Telegrafi.

Tutje, e para e shtetit theksoi se viteve të fundit ka pasur përshkallëzime, ndërsa përmendi aktin e agresionit nga Serbia në shtator 2023.

“Ne kemi pasur disa përshkallëzime vitet e fundit. Për shembull, në shtator 2023 pati një akt agresioni nga Serbia kundër Republikës së Kosovës. Ne arritëm ta zmbrapsim atë me mbështetjen e aleatëve tanë të NATO-s. Megjithatë, ekziston një kërcënim i vazhdueshëm nga Serbia. Në majin e kaluar, kishte sërish një përpjekje për përshkallëzim, nëse mund ta quaj kështu. Dhe kjo administratë ka bërë një punë të shkëlqyer për të parandaluar që gjërat të përkeqësohen”, tha Osmani.

Duke marrë parasysh situatën globale, e para e shtetit u pyet tutje se çfarë dëshiron sot të dëgjojë nga presidenti amerikan, Donald Trump i cili do të jetë në sesionin e 80-të të Asamblesë së Përgjithshme të OKB-së.

“Presidenti ka qenë gjithmonë një lider që flet me qartësi, forcë dhe bindje. Prandaj, ndërsa del në skenë sot në Kombet e Bashkuara, presim një mesazh të fuqishëm për paqe përmes forcës, i cili ka sjellë rezultate në pjesën tonë të Evropës, sepse ky është i vetmi mesazh që kuptojnë autokratët dhe liderët e pamëshirshëm anembanë botës që duan të vrasin dhe të shkaktojnë vuajtje. Presidenti Trump, siç e thashë, ka qenë shumë i suksesshëm në parandalimin e përshkallëzimeve të mëtejshme dhe të luftërave të reja. Mendoni pak: ne jemi një vend ku çdo brez para fëmijëve tanë ka kaluar një luftë; gjyshërit tanë kaluan një luftë; prindërit tanë, ne, kemi kaluar një luftë gjenocidale. Ndërsa tani fëmijët tanë mund të flenë pa zhurmën e armëve dhe pa frikën me të cilën jemi rritur ne si fëmijë të luftës, falë lidershipit amerikan… Ne mbështetemi tek kjo formulë e ‘paqes përmes forcës’ që të vazhdojë”, tha ajo.