Një zyrtar i lartë izraelit ka deklaruar për Reuters se lideri suprem i Iranit, Ali Khamenei, ka vdekur dhe trupi i tij është gjetur, por ende nuk ka konfirmim zyrtar nga Irani.

Ndërkohë, pak me herët, kryeministri izraelit Benjamin Netanyahu deklaroi se ka “shenja të shumta” që tregojnë se Khamenei mund të jetë vrarë gjatë sulmeve të përbashkëta SHBA–Izrael.

Netanyahu tha se është shkatërruar kompleksi ku ndodhej Khamenei dhe se janë eliminuar edhe zyrtarë të lartë të Gardës Revolucionare iraniane dhe programit bërthamor. Ai paralajmëroi se në ditët në vijim do të goditen mijëra objektiva të tjerë.

Nga ana tjetër, mediat iraniane cituan zyrtarë të komunikimit të zyrës së liderit suprem duke thënë se “armiku po zhvillon luftë psikologjike” dhe se publiku duhet të jetë i kujdesshëm.

Irani ende nuk ka dhënë konfirmim zyrtar për fatin e Khameneit. Situata mbetet e tensionuar pas sulmeve dhe raportimeve për goditje edhe në Izrael dhe në shtetet e Gjirit, ndërsa qytetarët iranianë janë raportuar të largohen nga qytetet nga frika e përshkallëzimit të konfliktit.

Një burim i medias shtetërore iraniane pranë zyrës së Khameneit thotë: “Mund t’ju them me besim se udhëheqësi i revolucionit është i palëkundur dhe i vendosur në komandë”.

Ministria e Punëve të Jashtme në Katar ka paralajmëruar se vendi rezervon të drejtën e plotë për t’u përgjigjur në përputhje me të drejtën ndërkombëtare dhe në një mënyrë proporcionale me agresionin, në mbrojtje të sigurisë dhe interesave të tij kombëtare.

Nga ministria kanë konfirmuar angazhimin e Katarit për dialog me Iranin dhe u bë thirrje për ndërprerjen e menjëhershme të çdo veprimi përshkallëzues.

Njoftimi synon të shpreh solidaritetin e vendit me Kuvajtin, Emiratet e Bashkuara Arabe, Jordaninë dhe Bahreinin, duke dënuar shkeljet e sovranitetit të tyre dhe duke theksuar rëndësinë e mbrojtjes së stabilitetit rajonal, transmeton albinfo.ch.

Bëhet e ditur se mbrojtja ajrore e Katarit ka kapur me sukses disa raketa përpara se ato të hynin në hapësirën ajrore të Katarit.

Kryeministri i Britanisë së Madhe, Keir Starmer ka njoftuar se aeroplanët britanikë “janë në qiell sot” në Lindjen e Mesme “si pjesë e operacioneve të koordinuara mbrojtëse rajonale për të mbrojtur njerëzit tanë, interesat tona dhe aleatët tanë”.

Më herët ishte raportuar se Mbretëria e Bashkuar nuk ishte e përfshirë në operacionet e përbashkëta SHBA-Izrael kundër Iranit.

Bëhet e ditur se asnjë bazë ushtarake e Mbretërisë së Bashkuar, përfshirë bazën në Diego Garcia, nuk u përdor nga aeroplanët amerikanë për të nisur sulmet kundër Iranit.

“Më herët këtë mëngjes, Shtetet e Bashkuara dhe Izraeli goditën objektiva në Iran. Që atëherë, Irani ka nisur sulme të pakontrolluara në të gjithë rajonin. E di që populli britanik dhe komunitetet në të gjithë vendin tonë do të jenë thellësisht të shqetësuara për atë që kjo do të thotë për sigurinë dhe stabilitetin, si dhe për fatin e njerëzve të pafajshëm në të gjithë rajonin, që për shumë prej nesh përfshin miqtë dhe anëtarët e familjes. Pra, ndërsa situata po evoluon shumë shpejt, dua të paraqes përgjigjen tonë. Mbretëria e Bashkuar nuk luajti asnjë rol në këto sulme, por prej kohësh e kemi bërë të qartë se regjimi në Iran është krejtësisht i neveritshëm. Ata kanë vrarë mijëra njerëz nga populli i tyre, kanë shtypur brutalisht disidentët dhe janë përpjekur të destabilizojnë rajonin. Edhe në Mbretërinë e Bashkuar, regjimi iranian përbën një kërcënim të drejtpërdrejtë për disidentët dhe për komunitetin hebraik”, ka thënë ai, transmeton albinfo.ch.

Tutje, ai u shpreh se vetëm gjatë vitit të kaluar, ata kanë mbështetur më shumë se 20 sulme potencialisht vdekjeprurëse në tokën e Mbretërisë së Bashkuar.

“Pra, është e qartë se atyre nuk duhet t’u lejohet kurrë të zhvillojnë një armë bërthamore. Ky mbetet qëllimi kryesor i Mbretërisë së Bashkuar dhe aleatëve tanë, përfshirë SHBA-në. I dënoj sulmet e sotme të Iranit ndaj partnerëve në të gjithë rajonin, shumë prej të cilëve nuk janë palë në këtë konflikt. Ne u ofrojmë atyre mbështetjen dhe solidaritetin tonë si pjesë e angazhimeve tona për sigurinë e aleatëve tanë në Lindjen e Mesme. Ne kemi një gamë të gjerë aftësish mbrojtëse në rajon, të cilat i kemi forcuar kohët e fundit. Forcat tona janë aktive dhe aeroplanët britanikë janë në qiell sot si pjesë e operacioneve të koordinuara mbrojtëse rajonale për të mbrojtur popullin tonë, interesat tona dhe aleatët tanë. Siç ka bërë Britania më parë, në përputhje me ligjin ndërkombëtar, ne kemi rritur mbrojtjen për bazat dhe personelin britanik në nivelin më të lartë. Gjithashtu, po kontaktojmë shtetasit e Mbretërisë së Bashkuar në rajon dhe po bëjmë gjithçka që mundemi për t’i mbështetur ata”, u shpreh ndër të tjera ai.

“Kam folur sot me udhëheqës nga E3 dhe nga i gjithë rajoni. Është jetike që të parandalojmë përshkallëzimin e mëtejshëm dhe të kthehemi në një proces diplomatik. Ne duam të shohim paqe dhe siguri dhe mbrojtjen e jetës së civilëve. Irani mund t’i japë fund kësaj tani. Ata duhet të përmbahen nga sulme të mëtejshme, të heqin dorë nga programet e tyre të armëve dhe të ndalojnë dhunën dhe shtypjen e tmerrshme kundër popullit iranian, i cili meriton të drejtën për të përcaktuar të ardhmen e vet. Në përputhje me qëndrimin tonë të kahershëm, kjo është rruga drejt uljes së tensioneve dhe kthimit në tryezën e negociatave. Faleminderit”, përfundoi deklaratën e tij kryeministri britanik.

I dyshuari, i frymëzuar nga ISIS, planifikonte sulm me eksploziv ndaj Qendrës së Luftës së Përbashkët në Stavanger, përcjell albinfo.ch.

Autoritetet në Norvegjia kanë arrestuar një 17-vjeçar që dyshohet se po planifikonte një sulm terrorist të frymëzuar nga xhihadizmi ndaj një objekti të NATO në vend.

Sipas transmetuesit publik norvegjez NRK, i dyshuari – i lindur në Norvegji – kishte shprehur mbështetje për grupin Shteti Islamik (ISIS) dhe ishte parë në shkollë me flamurin e këtij grupi.

Adoleshenti u arrestua nga shërbimi i sigurisë së brendshme, Policiets sikkerhetstjeneste (PST), i cili është përgjegjës për luftën kundër terrorizmit. Ai është vendosur në paraburgim të përkohshëm për dy javë.

PST konfirmoi arrestimin për agjencinë AFP. “Ai dyshohet sipas nenit të Kodit Penal që lidhet me përgatitjen e një akti terrorist”, deklaroi Line Nyvoll Nygaard, zyrtare e lartë e agjencisë. Duke iu referuar hetimit në vazhdim, autoritetet nuk dhanë detaje të tjera.

Avokati i të riut, Knut Lerum, ka bërë të ditur se klienti i tij i mohon akuzat.

Sipas dokumenteve të cituara nga NRK, 17-vjeçari dyshohet se planifikonte të shpërthente eksplozivë në Qendrën e Luftës së Përbashkët të NATO-s në Jåttå, Stavanger, në jugperëndim të Norvegjisë.

Hetimet lidhur me rastin janë në vijim, ndërsa autoritetet kanë theksuar se ndërhyrja është bërë në kohë për të parandaluar një kërcënim të mundshëm ndaj sigurisë publike./Albinfo.ch