Pas humbjes dramatike me rezultat 4:3 ndaj Kosovës, portieri i Sllovakisë, Martin Dubravka, ka pranuar se ekipi i tij nuk arriti të përballojë intensitetin dhe ritmin e lartë të “Dardanëve”, sidomos në pjesën e dytë të ndeshjes, përcjell albinfo.ch.

Sllovakia e mbylli pjesën e parë me epërsi 2:1, duke lënë përshtypjen se kishte kontroll mbi rrjedhën e lojës. Megjithatë, gjithçka ndryshoi pas pushimit, kur Kosova u rikthye fuqishëm, përmbysi rezultatin dhe siguroi një fitore historike në Bratislavë, duke kaluar në finalen e “play-offit” për Botërorin 2026.

Intensiteti i lartë, presioni i vazhdueshëm dhe efikasiteti i Kosovës në fazën sulmuese bënë diferencën në momentet vendimtare të sfidës.

Në deklaratën e tij pas ndeshjes, Dubravka nuk e fshehu zhgënjimin, duke e cilësuar pjesën e dytë si shumë larg nivelit që kërkohet në një ndeshje të tillë.

“Ne patëm një pjesë të parë shumë të mirë, por pjesa e dytë ishte vërtet e keqe. Pasi Kosova barazoi sërish, ne nuk arritëm ta mbanim ritmin me të”, ka deklaruar Dubravka.

Ai shtoi se kjo humbje do t’i mbetet gjatë në mendje, veçanërisht për faktin se për lojtarët më të vjetër kjo ishte një nga mundësitë e fundit për të ëndërruar Botërorin.

“Jam i trishtuar, do të më mbetet peng për një kohë të gjatë. Për ne lojtarët më të vjetër, ishte një nga rastet tona të fundit për të luajtur në Kupën e Botës. Por ky është realiteti”, u shpreh ai.

Kosova, ndërkohë, do të luajë të martën në Prishtinë finalen vendimtare të “play-offit” ndaj Turqisë, për një vend në Kampionatin Botëror 2026./Albinfo.ch.

Kombëtarja e Kosovës po vazhdon të shkruajë histori në futbollin ndërkombëtar, pas fitores së madhe ndaj Sllovakisë në gjysmëfinalen e “play-offit” për kualifikim në Kupën e Botës 2026, përcjell albinfo.ch.

“Dardanët” triumfuan në udhëtim në Bratisllavë me rezultat 4:3, duke siguruar kalimin në finalen vendimtare të play-offit dhe duke u afruar vetëm një hap larg kualifikimit historik në Kampionatin Botëror.

Ky sukses i Kosovës ka marrë vëmendje edhe në mediat ndërkombëtare. Gazeta e njohur spanjolle “Marca” i ka kushtuar një artikull të veçantë fitores së Kosovës, duke e cilësuar rrugëtimin e saj si të jashtëzakonshëm.

“Kosova, një nga shtetet më të reja në botë dhe që nuk njihet nga Spanja, e mposhti Sllovakinë dhe do të luajë finalen për një vend në Kupën e Botës kundër Turqisë. FIFA e njohu si përfaqësuese zyrtare… më pak se 10 vite më parë!”, ka shkruar “Marca”.

Tani, Kosovës i mbetet vetëm ndeshja finale, e cila do të zhvillohet të martën në stadiumin “Fadil Vokrri” në Prishtinë, ku “Dardanët” do të përballen me Turqinë.

Turqia në gjysmëfinale eliminoi Rumaninë me rezultat minimal 1:0, ndërsa përballja në Prishtinë pritet të jetë vendimtare për një vend në Botërorin 2026. /Albinfo.ch

Kombëtarja e Kosovës ka shënuar një fitore historike ndaj Sllovakisë, duke siguruar kualifikimin në finalen e “play-offit” për Kampionatin Botëror 2026, përcjell albinfo.ch.

“Dardanët” triumfuan të enjten mbrëma në Bratisllavë me rezultat 4:3, në një ndeshje dramatike që i afroi edhe më shumë drejt ëndrrës për pjesëmarrje në Botëror.

Pas këtij suksesi të madh, reagimi nuk ka munguar as nga FIFA. Faqja zyrtare e Kupës së Botës ka publikuar një postim në platformën “X”, duke vlerësuar rrugëtimin e Kosovës dhe duke e cilësuar atë vetëm një hap larg kualifikimit.

“Vetëm edhe një hap për Kosovën, për t’u kualifikuar në Botëror”, thuhet në postimin e FIFA World Cup në “X”.

Kosova tani do ta zhvillojë ndeshjen finale të play-offit të martën mbrëma në stadiumin “Fadil Vokrri”, ku do të përballet me Turqinë për një vend në Kampionatin Botëror 2026./Albinfo.ch

Përzgjedhësi i Kombëtares së Kosovës, Franco Foda, ka vlerësuar lart paraqitjen e “Dardanëve” pas fitores dramatike ndaj Sllovakisë me rezultat 4:3, në gjysmëfinalen e play-offit për kualifikim në Kupën e Botës, përcjell albinfo.ch.

Në konferencën për media pas ndeshjes, Foda përgëzoi futbollistët për besimin dhe luftën deri në fund, duke theksuar se fitorja ishte e merituar.

“Dua ta falënderoj skuadrën për përfaqësimin. Lojtarët kanë besuar për 90 minuta dhe nuk janë dorëzuar. E merituam fitoren. Sonte do të festojmë dhe që nga nesër do të përgatitemi për finale ndaj Turqisë. Kosova e meriton këtë”, deklaroi ai.

Foda komentoi edhe faktin se ndeshja prodhoi shtatë gola, duke pranuar se mbrojtja duhet analizuar me kujdes para përballjes vendimtare.

“Kemi pranuar tre gola sonte. Sonte festojmë, por nesër do të analizojmë sepse kemi marrë gola të lehtë. Duhet ta dimë se nuk mund të shënojmë çdo ndeshje katër gola”, u shpreh ai.

Ai foli edhe për atmosferën që pritet të martën në stadiumin “Fadil Vokrri”, ku Kosova do ta luajë finalen ndaj Turqisë, duke thënë se interesi i tifozëve është jashtëzakonisht i madh.

“Të martën luajmë ndeshje finale. Do të jenë 13 mijë persona, por po të kishim një stadium me 100 mijë ulëse do të mbushej i tëri. Jemi afër të shkruajmë historinë, por duhet ta ruajmë qetësinë në këtë ndeshje kaq të madhe kundër Turqisë”, tha Foda, duke shtuar se populli kosovar është shumë emocional dhe kjo vërehet edhe tek lojtarët në fushë.

Trajneri gjerman tregoi gjithashtu se në pushimin mes pjesëve ka kërkuar më shumë qetësi dhe ka bërë disa ndryshime taktike që, sipas tij, ndikuan pozitivisht në rikthimin e Kosovës.

“Fillimisht kam kërkuar nga ta të ruajnë qetësinë dhe kam kërkuar dy ndryshime taktike. Mendoj se në pjesën e dytë bëmë më mirë dhe rikthyem rezultatin. Nuk kemi qenë keq në aspektin e lojës dhe e dëshmuam edhe një herë se jemi skuadër që mund të rikthejmë rezultate”, theksoi Foda.

Kosova tani është vetëm një hap larg kualifikimit historik, ndërsa finalja ndaj Turqisë pritet të zhvillohet të martën në Prishtinë./Albinfo.ch

Gjykata Federale ka vendosur se ndalimi i demonstratës në autostradë në Lausanne në prill 2024 shkelte lirinë e tubimit, shprehjes dhe informacionit. Demonstrata ishte planifikuar midis La Bourdonnette dhe La Maladière dhe kishte për qëllim të shprehë kundërshtimin ndaj zgjerimit të disa seksioneve të autostradës.

Shoqata për Transportin dhe Mjedisin (ATE) kishte apeluar vendimin e Zyrës Federale të Rrugëve (FEDRO), i cili ishte konfirmuar më parë nga Gjykata Administrative Federale. Pesë gjyqtarë të Gjykatës Federale arritën në përfundimin se ndalimi kishte shkelur parimin e proporcionalitetit dhe se demonstrata kishte një ndikim të rëndësishëm publik dhe politik.

Gjykata vuri në dukje se vendndodhja e demonstratës nuk është e parëndësishme dhe se trafiku i lartë nuk mund të justifikojë ndalimin. Për më tepër, prania e një klinike pranë vendit të ngjarjes nuk e bën të pamundur organizimin e saj.

Megjithatë, Gjykata konfirmoi ligjshmërinë e sistemit të autorizimit paraprak për demonstrata, duke mos cenuar lirinë e tubimit. Demonstrata ishte planifikuar të përkonte me përvjetorin e 60-të të seksionit të autostradës Lausanne–Gjenevë.

Në minutën e 72-të, Kreshnik Hajrizi ka shënuar golin e katërt për Kosovën, duke thelluar avantazhin në 4:2 ndaj Sllovakisë Pas golit të shpejtë të Besnik Asanit dhe të Florent Muslisë, ky moment ka ndezur stadiumin dhe tifozët dardanë, duke dhënë një ndjenjë krenarie dhe triumfi për ekipin e Kosovës.

Loja po vazhdon të jetë dramatike, por tani Kosova kontrollon ndeshjen dhe po i afrohet një fitoreje të rëndësishme në kualifikimet për Kupa e Botës 2026.

Pas një gjysme të parë dramatike, ku Sllovakia kishte shkuar në pushim me avantazh 2:1 dhe Kosova kishte rikthyer barazimin qysh në minutën e 47 me golin e Besnik Asanit, Florent Muslia ka shënuar në minutën e 59, duke kaluar Kosovën në avantazh 3:2.

Loja po vazhdon me tension të madh ku çdo pasim dhe çdo përpjekje e të dyja ekipeve mund të ndryshojë rezultatin.

Qysh në minutën e 47-të, pas fillimit të pjesës së dytë, Besnik Asani ka shënuar golin që rikthen rezultatin 2:2 ndaj Sllovakisë.

Ky gol i shpejtë pas pushimit jep një mundësi më të madhe ekipit kosovar dhe mban gjallë shpresat për një fitore eventuale në këtë përballje dramatike të kualifikimeve për Kupën e Botës 2026.

Në ndeshjen gjysmëfinale të “play off”-it për kualifikueset e Botërorit 2026, Shqipëria ka kaluar në avantazh ndaj Polonisë. Goli u realizua në minutën e 43 nga Hoxha, pas një gabimi të mbrojtjes polake, duke i dhënë kuqezinjve epërsinë për të shkuar në pushim.

Shqipëria mbylli pjesën e parë me rezultatin 1-0, duke siguruar një start pozitiv në këtë sfidë vendimtare.

Në minutën e 45-të të ndeshjes, Sllovakia ka shënuar golin e dytë, duke rikthyer epërsinë me rezultat 2:1 ndaj Kosovës. Me këtë gol, skuadra mysafire shkon në pushim me avantazh, duke e bërë gjysmën e parë të ndeshjes mjaft dramatike dhe të tensionuar për tifozët dardanë.

Pas golit të barazimit të Kosovës në minutën e 21-të, ky moment rikthen presionin mbi ekipin dardan dhe hap një gjysmë të dytë sfiduese ku çdo veprim do të jetë vendimtar për rezultatin final.

Kombëtarja e Kosovës ka arritur ta barazojë rezultatin në minutën e 21‑të, duke sjellë gëzim për tifozët dardanë në këtë përballje të rëndësishme në fazën e “play‑off”-it për “Kualifikimet e Kupës së Botës 2026”

Lojtarët dhanë maksimumin për të rikthyer ndeshjen në nivel dhe tani sfida mbetet e hapur deri në fund.

Ky gol barazues në minutën e 21‑të i ka dhënë një motiv ekipit të Kosovës ndërsa ata synojnë të vazhdojnë luftën për një vend në finale dhe, potencialisht, një vend në Botëror.

Sllovakia ka marrë epërsinë shumë herët në përballjen ndaj Kosovës, duke shënuar që në minutën e 6-të të ndeshjes.

Autori i golit ishte Martin Valjent, i cili i dha avantazhin vendasve me një realizim të shpejtë, duke i vënë “Dardanët” në pozitë të vështirë që në fillim të takimit.

Kombëtarja e Kosovës ka filluar ndeshjen në udhëtim ndaj Sllovakisë, e vlefshme për gjysmëfinalen e ‘play-off’-it për kualifikim në Kupën e Botës 2026.

‘Dardanët’ hynë në këtë përballje me dy mungesa të rëndësishme, kapitenin Amir Rrahmani dhe mesfushorin Leon Avdullahu.

Përzgjedhësi Franco Foda i ka qëndruar besnik formacionit që e çoi ekipin deri në ‘play-off’, duke u besuar sërish lojtarëve që mbajtën barrën kryesore gjatë kualifikueseve.

Në repartin defensiv nga minuta e parë është aktivizuar Kreshnik Hajrizi, ndërsa në mesfushë, në mungesë të Avdullahut, ka startuar Veldin Hoxha.

Në sulm, si zakonisht, prijnë Vedat Muriqi dhe Fisnik Asllani, të cilët mbështeten nga Florent Muslija në një rol më të avancuar.

Formacionet zyrtare:

Sllovakia: Dubravka, Valjent, Vavro, Obert, Hancko, Bero, Lobotka, Duda, Sauer, Strelec, Haraslin.

Kosova: Muric, Dellova, Hajrizi, Hajdari; Vojvoda, Hoxha, Rexhbecaj, Muslija, Gallapeni; Asllani, Muriqi.

Kuqezinjtë do të ndeshen me Poloninë në Varshavë, në kuadër të gjysmëfinales së “play-off”-it për Kupën e Botës 2026. Kjo sfidë konsiderohet një nga më të rëndësishmet për ekipin shqiptar.

Trajneri Sylvinho ka vendosur për 11-shen startuese, ku disa lojtarë të njohur do ta nisin ndeshjen nga stoli. Pavarësisht formës së mirë, Ernest Muçi nuk është përfshirë në formacionin titullar, njësoj si Armando Broja dhe Anis Mehmeti.

Nga minuta e parë do të luajë Arbër Hoxha, ndërsa në repartin ofensiv starton edhe Nedim Bajrami.

Formacioni i Shqipërisë: Strakosha; Hysaj, Gjimshiti (kapiten), Ajeti, Mitaj; Shehu, Asllani; Bajrami, Laçi, Hoxha; Uzuni.