Rusia duhet të pranojë një armëpushim me Ukrainën kur presidenti rus, Vladimir Putin të takohet me homologun amerikan, Donald Trump në Alaskë, deklaroi kancelari gjerman Friedrich Merz përpara këtij takimi historik, përcjell albinfo.ch.

Merz tha se takimi mes Trumpit dhe Putinit përfaqëson një “mundësi” për paqe dhe i bëri thirrje diktatorit rus të heqë dorë nga të gjitha parakushtet për një armëpushim dhe më pas të takohet me homologun ukrainas, Volodymyr Zelensky.

“Qëllimi duhet të jetë një samit në të cilin merr pjesë edhe presidenti Zelensky. Atje duhet të arrihet një marrëveshje për armëpushim. Ukraina ka nevojë për garanci të forta sigurie. Çështjet territoriale mund të zgjidhen vetëm me pëlqimin e ukrainasve”, deklaroi lideri gjerman, raporton cnn.

Kremlini më parë ka kërkuar që Kievi të dorëzojë territore të mëdha në këmbim të përfundimit të luftës, e cila filloi kur Rusia pushtoi Ukrainën në shkurt të vitit 2022.

Liderët evropianë janë të tensionuar përpara takimit të Trump me Putinin. Edhe pse kohët e fundit Trump ka sinjalizuar mbështetje për Ukrainën, Evropa ka frikë se Putini, një ish-agjent i KGB-së, do të arrijë ta kthejë presidentin amerikan që ta shohë luftën sipas kushteve të tij.

“Presidenti Trump tani mund të ndërmarrë një hap të rëndësishëm drejt paqes. Ai meriton falënderime për këtë iniciativë dhe për bashkërendimin e ngushtë gjatë ditëve të fundit”, tha Merz.

Ndryshe, Trump dhe Putin pritet të takohen sonte në Alaska me fillim në ora 2100, sipas kohës sonë lokale.

Derisa presidenti i Rusisë, Vladimir Putin, dhe presidenti i Shteteve të Bashkuara, Donald Trump, përgatiten të takohen në Alaskë për një takim shumë të rëndësishëm për të biseduar për përfundimin e luftës gati katërvjeçare në Ukrainë, një ndjenjë pasigurie i ka kapluar kryeqytetet evropiane, veçanërisht Kievin, shkruan rel, përcjell albinfo.ch.

Takimi i sotëm mes dy liderëve, i pari që nga kthimi i Trumpit në Shtëpinë e Bardhë në janar, mund të riformësojë jo vetëm kufijtë e ardhshëm të Ukrainës, por edhe sigurinë evropiane, pa i pyetur Kievin apo Brukselin.

Trump u shpreh se, nëse ai nuk do të ishte president, Putini “me shumë gjasa do të kishte marrë nën kontroll gjithë Ukrainën”. Ai shtoi: “Por unë jam president, dhe ai nuk do të guxojë të luajë me mua”.

I pyetur për pritshmëritë nga takimi me Putinin, Trump tha se do ta kuptojë që në minutat e para nëse do të kenë një takim të mirë apo jo. “ Nëse jo, do të përfundojë shumë shpejt,” tha ai.

Qëllimi i takimit, sipas Trump, është ” të vendoset baza” për një tjetër takim mes tij, Putinit dhe presidentit ukrainas Volodymyr Zelensky.

Më herët gjatë ditës, në një intervistë për Fox News Radio, Trump tha se, nëse takimi me Putinin rezulton i suksesshëm, ai do të telefonojë Zelenskyn për të organizuar një tjetër takim. Megjithatë, ai shtoi se ekziston “një shans 25% që ky takim të mos jetë i suksesshëm”.

Në përfundim, Trump theksoi se për të arritur një marrëveshje përfundimtare do të nevojitet “kompromis nga të dyja palët” sa i përket kufijve midis Rusisë dhe Ukrainës.

Një nga shqetësimet kryesore është largimi gradual i linjave ajrore me kosto të ulët nga aeroportet gjermane. Kompani si Ryanair dhe EasyJet kanë zvogëluar ndjeshëm numrin e avionëve me bazë në Gjermani, duke i transferuar ata në vende të tjera evropiane me kushte më të favorshme. Ndërsa dikur në vend ishin rreth 190 avionë të bazuar, sot kanë mbetur vetëm afërsisht 130,  një rënie prej thuajse një të tretës.

Megjithëse trafiku i pasagjerëve ka filluar të rikuperohet gradualisht, sektori i aviacionit në Gjermani vazhdon të ndihet nga pasojat e pandemisë dhe sfidat ekonomike. Statistikat tregojnë se në gjysmën e parë të këtij viti, numri i udhëtarëve ka arritur rreth 100 milionë, por kjo mbetet shumë nën nivelin e vitit 2019, para krizës shëndetësore globale.

Ky trend ka pasoja të rëndësishme ekonomike. Çdo avion me rreze të mesme veprimi mbështet qindra vende pune dhe sjell miliona euro në ekonominë kombëtare. Ulja e pranisë së linjave ajrore jo vetëm që dobëson lidhjet ndërkombëtare të Gjermanisë, por shkakton edhe humbje të drejtpërdrejta për bizneset dhe komunitetet lokale që varen nga aviacioni.

Përfaqësuesit e industrisë e lidhin këtë situatë me taksat dhe tarifat e larta, që bëjnë që një fluturim tipik brenda Evropës të kushtojë rreth 35 euro për pasagjer,  një nivel që ekspertët e konsiderojnë jo konkurrues. Ata kërkojnë reforma dhe lehtësim fiskal për të parandaluar humbjen e mëtejshme të sektorit.

Edhe pse orari i fluturimeve dimërore, i cili nis në fund të tetorit, parashikon një rritje të lehtë të kapacitetit në aeroportet gjermane, pritshmëritë për një rikuperim të plotë mbeten të moderuara. Fluturimet brenda vendit, që zakonisht kanë rol kyç në sistemin e transportit gjerman, kanë pësuar goditje të forta, duke arritur vetëm gjysmën e niveleve të para-pandemisë.

Në të njëjtën kohë, vendet e tjera evropiane po rikuperohen më shpejt. Sipas të dhënave të fundit, kapaciteti i tyre do të kalojë madje nivelet para pandemisë, duke treguar se Gjermania ka nevojë për politika më të favorshme për linjat ajrore.

Aviacioni mbetet vendimtar për lëvizshmërinë, turizmin dhe zhvillimin ekonomik. Pa mbështetje strategjike, Gjermania rrezikon të humbasë pozicionin e saj si një nga qendrat kryesore të trafikut ajror në Evropë.

Evropa Jugore po përballet me një verë të jashtëzakonshme të nxehtë dhe shkatërrimtare. Portugalia, Greqia, Italia dhe sidomos Spanja, ku është shënuar viktima e tretë, vazhdojnë të luftojnë me flakët në mes të një vale të gjatë të të nxehtit.

Kryeministri spanjoll, Pedro Sánchez, shprehu keqardhjen për vdekjen e një vullnetari 36-vjeçar në rajonin e Kastiles dhe Leónit, duke theksuar se “ kërcënimi mbetet ekstrem ”. Spanja ndodhet në ditën e dymbëdhjetë të alarmit për të nxehtë, ndërsa banorët dhe zjarrfikësit janë të rraskapitur.

Njëmbëdhjetë zjarre janë të klasifikuara në nivelin 2 nga 4. Zjarri në Zamora po shkakton shqetësim të madh, ndërsa Ministri i Brendshëm Fernando Grande-Marlaska ka kërkuar ndihmën e Bashkimit Evropian me dy avionë “ Canadair ”. Franca iu përgjigj thirrjes duke dërguar dy avionë të specializuar.

Më shumë se 10,000 të evakuuar dhe 157,000 hektarë të djegur

Që nga nisja e zjarreve, mbi 10,700 persona janë evakuuar. Sipas sistemit evropian EFFIS, që nga fillimi i vitit në Spanjë janë djegur mbi 157,000 hektarë tokë dhe janë regjistruar 200 zjarre. Vetëm në gusht, i cili tashmë renditet muaji i dytë më i keq ndonjëherë, janë djegur mbi 115,000 hektarë.

Rajonet më të prekura përveç Kastiles dhe Leónit janë Galicia, Valencia dhe Extremadura. Rreth 15 rrugë janë të mbyllura për shkak të flakëve.

Portugalia dhe Greqia në alarm

Në Portugali, rreth 15 mjete ajrore po luftojnë katër zjarre të mëdha në veri dhe qendër të vendit. Vetëm në Arganil po punojnë mbi 800 zjarrfikës, ndërsa zjarri në Trancoso po vazhdon prej ditësh.

Në Greqi, ku prej qershorit janë djegur mbi 20,000 hektarë, zjarri që kërcënonte qytetin e Patrasit është vendosur nën kontroll, por vatra të shpërndara mbeten aktive. Mbi 600 ekipe dhe afro 30 avionë po punojnë në disa fronte, përfshirë ishujt Zakynthos dhe Chios.

E nxehtë ekstreme në Itali

Edhe pse këtë verë ka shpëtuar pjesërisht nga zjarret, Italia po përballet me temperatura përvëluese. Roma, Venecia dhe 14 qytete të tjera janë në alarm të kuq, me temperatura deri në 39°C në Firence dhe 38°C në Milano. Pavarësisht kësaj, rreth 12 milionë automjete pritet të jenë në rrugë për pushimet e 15 gushtit.

Pas të nxehtit, stuhi në Francë

Franca po hyn në ditën e shtatë të valës së të nxehtit, me temperatura ende të larta në jug dhe lindje, megjithëse alarmi i kuq është hequr për disa rajone. Mbrëmë vendin e goditën stuhi të forta, ndërsa një tjetër front stuhish pritet sot në rajonet Doubs dhe Jura. Për fundjavën e 15 gushtit parashikohen sërish temperatura deri në 40°C në jugperëndim.

Sipas një studimi të Institutit Copernicus, sipërfaqja e djegur nga zjarret në Evropë është dyfishuar në gati 20 vite, e nxitur nga thatësira ekstreme dhe valët e shpeshta të të nxehtit