Archives

BBC shkruan për agroturizmin dhe kulinarinë shqiptare: Recetat e gjysheve, pasuri që po trashëgohet brez pas brezi

Posted on by albinfo.ch

BBC i ka kushtuar një artikull të posaçëm agroturizmit dhe kulinarisë shqiptare, duke treguar se si recetat tradicionale janë ruajtur dhe transmetuar brez pas brezi. Sipas medias britanike, Shqipëria po i rikthehet rrënjëve të saj të kuzhinës falë gjysheve kuzhiniere, të cilat u mësojnë të rinjve teknikat e gatimit të pjatave të hershme.

Në artikull theksohet se vendi ka kaluar dy periudha “amnezie kulinare” gjatë 80 viteve të fundit.

E para lidhet me periudhën komuniste (1946–1991), kur vendi u izolua plotësisht: librat e gatimit u dogjën, importet u ndaluan, udhëtimet jashtë vendit u kufizuan, ushqimi u kolektivizua dhe mungesat ishin të përhapura.

E dyta pasoi me rënien e komunizmit, kur rreth 710,000 shqiptarë, rreth 20% e popullsisë  emigruan midis viteve 1989-2001. Me kohën, shumë prej tyre humbën lidhjen me recetat e vendit të origjinës, duke adoptuar kultura të reja gastronomike.

BBC thekson se, si pasojë e këtyre dy periudhave, në fillim të shekullit XXI shumë shqiptarë brenda dhe jashtë vendit kishin harruar si të gatuanin kuzhinën tradicionale, përveç grave të brezave më të vjetër, të cilat ruajtën njohuritë dhe ritualet e përgatitjes së saj.

Sic raporton Top Channel, kryeministri i Shqipërisë, Edi Rama reagoi ndaj këtij shkrimi, duke theksuar rëndësinë e trashëgimisë culinare në zhvillimin e sektorit të agroturizmit:

“Rrjeti i njohur mediatik BBC i ka kushtuar një artikull agroturizmit dhe kulinarisë shqiptare, përmes seksionit BBC Travel, duke veçuar recetat tradicionale të gjysheve shqiptare që po trashëgohen brez pas brezi dhe që janë një pikë e fortë e sipërmarrjeve të reja të agroturizmit të hapura në vendin tonë.”

Artikulli i BBC-së vjen në një moment kur agroturizmi shqiptar po përjeton rritje të ndjeshme, duke u shndërruar në një prej shtyllave të promovimit të kulturës, turizmit dhe identitetit gastronomik të vendit.

 

Sieh dir diesen Beitrag auf Instagram an

 

Ein Beitrag geteilt von BBC Travel (@bbc_travel)

Qeveria në detyrë në Kosovë: Çfarë u miratua sot në Prishtinë

Posted on by Drin Reçica

Ndahen mbi 4 milionë euro për pagat e 700 punëtorëve të RTK-së

Qeveria në detyrë e Kosovës në mbledhjen e sotme ka marrë vendim për ndarjen e 4 milionë e 480 mijë euro për ekzekutimin e pagave për 700 punëtorët e RTK-së, të cilët tash e disa ditë janë në grevë.

Kryeministri në detyrë Albin Kurti tha se ky është ipmrovizim i detyruar.

“Siç e ka paralajmëruar këtë të hënën në konferencë ministri Hekuran Murati kemi shqyrtuar disa opsione për të dalë nga kjo situatë. Sot këto mjete po ndahen nga kategoria e kursimeve, kjo zgjidhje e sotshme apo më mirë të themi kjo mënyrë e tanishme është vetëm një improvizim i detyruar pas përpjekeve tona të vazhdueshme në Kuvendin e Kosovës për të miratuar aty buxhetin për RTK-në”, tha Kurti.

Kurse ministri në detyrë i Financave, Hekuran Murati bëri të ditur se këto mjete janë marrë si kursime nga projektet ekzistuese.

“Ndarja e 4 milionë e 480 mijë euro për RTK të cilat është dashur të kursehen ose merren si kursime nga projekte ekzistuese në kuadër të organizatave tjera buxhetore për shkak se në Kuvend u refuzua të krijohet Komisioni për Buxhet dhe të votohej buxheti për RTK. Në pamundësi që të sigurohen pagat e punëtorëve tash e sa kohë nga ana e Kuvendit si themelues i RTK-së na është dashur neve si Qeveri të marrim këtë hap improvizues që të gjendet një zgjidhje emergjente dhe të sigurohen pagat për transmetuesin publik”, tha Murati.

“Made in Kosova”, Kurti: Ndërtimi i fabrikës së municioneve do të përfundojë vitin e ardhshëm

Kryeministri në detyrë, Albin Kurti deklaroi se fabrika e municioneve do të përfundojë vitin e ardhshëm.

Këtë deklaratë, ai e bëri para kabinetit qeveritar në mbledhjen e sotme, ku theksoi se me vendimin e sotëm për shpronësimin e pronave të paluajtshme për ndërtimin e zonës industriale të mbrojtjes në Jahoc të Gjakocës, do të hapet rruga për ndërtimin e fabrikës së municioneve.

Kurti tha se ky miratimi i këtij vendimi do të bëhet në mbledhjen e sotme, pikërisht në Ditën e Forcës.

“Është kërkesa për shpronësim të pronave të paluajtshme, shoqërore të KBI Ereniku për ndërtimin e zonës industriale të mbrojtjes në Jahoc të Gjakovës. Me miratimin e saj, hapim rrugë në terren ndërtimit të fabrikës së municioneve, të parës së llojit të saj në Republikën e pavarur që do t’i shërbejë ushtrisë sonë, do ta rris sigurinë tonë dhe do t’i ngris edhe më tej kapacitetet tona mbrojtëse. Këtë vendim edhe më veçantë e bën fakti që po e miratojmë pikërisht në Ditën e Forcës”, deklaroi Kurti.

Ndërtimi i kësaj fabrike, Kurti theksoi se do të përfundojë brenda vitit të ardhshëm.

“Ndërtimi i kësaj fabrike për të cilën tashmë kemi kontratë të nënshkruar me prodhuesin turk MKE do të përfundojë brenda vitit të ardhshëm. Municionet e para nga kjo fabrikë do të dalin në fundin e vitit 2026. Përveç fabrikës së municionit, kjo zonë industriale do të shërbejë edhe për investitorë të tjerë me të cilët jemi në kontakt dhe do të prodhojnë lloje të ndryshme të produkteve ushtarake, dronët ushtarak dhe civil ‘Made in Kosova’.

Kurti premton 1 milion euro shpërblim nëse Kosova kualifikohet në Botëror

Qeveria e Kosovës ndanë 250 mijë euro për ekipin kombëtar pas kalimit në ‘play-off’

Kryeministri në detyrë Albin Kurti ka premtuar 1 milion euro shpërblim në rast se Përfaqësuesja e Kosovës do të kualifikohet në Botërorin 2026.

Gjatë mbledhjes së Qeverisë në detyrë të enjten, Kurti bëri të ditur se kanë ndarë 250 mijë euro për suksesin historik të Kosovës për kualifikim në plejof të Botërorit. E 500 mijë euro do të ndahen nëse e kalojmë Sllovakinë. 

“Në fazën e radhës hyjmë me plot vetëbesim. Në rast të fitores ndaj Sllovakisë zotohemi për shpërblim 500 mijë euro. Në rast të kualifikimit në Botëror zotohemi për 1 milionë euro shpërblim”, ka thënë Kurti.

Kosova më 26 mars do të luajë në Bratislavë kundër Sllovakisë.

Në rast fitoreje, do ta luajë ndeshjen vendimtare për kualifikim në Botëror në Prishtinë me fituesin e ndeshjes Turqi – Rumani.

Qeveria gjithashtu ndau mbi 23 mijë euro për arritjet e klubit të futsallit, Prishtina 01, në Ligën e Kampionëve. 

Votimi jashtë vendit, planifikohet të organizohet në 50 përfaqësi diplomatike

Posted on by Drin Reçica

Në kuadër të përgatitjes së zgjedhjeve të parakohshme për Kuvendin e Kosovës, Komisioni Qendror i Zgjedhjeve ka marrë vendim për miratimin e Qendrave të Votimit për votimin jashtë vendit, i cili do të mbahet më 27 dhjetor 2025, një ditë para ditës së zgjedhjeve në Kosovë, përcjell albinfo.ch.

Referuar vendimit të KQZ-së, procesi i votimit planifikohet të organizohet në 50 përfaqësi diplomatike me gjithsej 66 vendvotime të vendosura në 36 shtete të botës. Megjithatë, kjo listë u tha se do të mund të rishikohet nga KQZ, varësisht nga numri i votuesve që do të regjistrohen për të votuar në përfaqësi diplomatike.

Gjithashtu, KQZ ka caktuar numrin maksimal 950 votues që mund të regjistrohen për të votuar në një vendvotim në përfaqësi diplomatike. Sipas vendimit të KQZ-së, numri maksimal i votuesve që mund të regjistrohen për të votuar në këto përfaqësi diplomatike është 62,700 votues.

Po ashtu, sipas vendimit të KQZ-së, Qendra të Votimit do të hapen edhe në hapësira shtesë, jashtë përfaqësive diplomatike, sipas propozimit nga Ministria e Punëve të Jashtme dhe Diasporës.

“Lokacionet shtesë përfshijnë 10 Qendra të Votimit (Gjermani 5; Zvicër 3, Mbretëri e Bashkuar 1 dhe ShBA 1) me gjithsej 43 vendvotime dhe me numër maksimal të votuesve që mund të regjistrohen për të votuar 40,850 votues. Në përgjithësi, numri i Qendrave të Votimit për votimin jashtë Kosovës, të miratuara nga KQZ është 60, me gjithsej 109 vendvotime. Ndërkaq, numri maksimal i votuesve që mund të regjistrohen për të votuar në këto Qendra të Votimit është 103,550”, thuhet në njoftim.

KQZ sqaron se kufizimi i numrit maksimal të votuesve që mund të regjistrohen vlen vetëm për votimin në përfaqësi diplomatike, ndërkaq numri i votuesve që mund të regjistrohen për votim përmes postës është i pakufizuar.

Në rast të plotësimit të numrit maksimal të votuesve në përfaqësi diplomatike, sipas parimit të kohës së aplikimit, aplikuesi do të udhëzohet për regjistrim për mënyrat e tjera të votimit përmes postës.

Periudha e regjistrimit të votuesve jashtë Kosovës ka filluar më 26 nëntor dhe do të përfundojë më 6 dhjetor 2025.

lexoni po ashtu:

Sot fillon afati 11-ditor për regjistrimin e votuesve jashtë Kosovës

lexoni po ashtu:

Krasniqi: Mijëra fletëvotime nga diaspora rrezikojnë të mos arrijnë në kohë në Kosovë

 

Dr. Florim Cuculi: Rasti i Shpat Kasapit na kujton rrezikun e heshtur të trashëgimisë kardiake

Posted on by Drin Reçica

Vdekja e papritur e këngëtarit të njohur shqiptar, Shpat Kasapi, në moshën vetëm 40-vjeçare, ka shkaktuar tronditje të madhe tek publiku. Ky lajm bëhet edhe më i rëndë kur kujtohet se edhe babai i tij ka humbur jetën në rrethana të ngjashme, po ashtu në moshë të re, si pasojë e një infarkti kardiak.

Ndërkohë, për kardiologun nga Zvicra, Dr. Florim Cuculi, ky rast nuk është vetëm një humbje e dhimbshme, por edhe një kujtesë e qartë se sëmundjet e zemrës shpesh kanë rrënjë të thella gjenetike, të cilat nuk duhet të neglizhohen kurrë,  transmeton albinfo.ch. 

Sipas tij, shumë njerëz gabimisht besojnë se mënyra e shëndetshme e jetesës është e mjaftueshme për të mbrojtur zemrën. Por realiteti shpesh është më kompleks. Predispozitat gjenetike mund të jenë më të forta se çdo përpjekje individuale për kujdes, dhe rreziku i trashëguar mbetet i pranishëm pavarësisht ushtrimeve fizike, ushqimit të balancuar apo mungesës së faktorëve të tjerë të rrezikut. Prandaj, një histori familjare me sëmundje kardiake, veçanërisht kur bëhet fjalë për raste të infarktit në moshë të re, duhet të merret si një sinjal serioz paralajmërues.

Dr. Cuculi thekson se ekzaminimet e hershme janë thelbësore. Vizitat periodike te kardiologu, analizat laboratorike dhe vlerësimet e rrezikut mund të zbulojnë probleme të fshehura që përndryshe do të mbeteshin të panjohura deri në momentin kritik. Shumë tragjedi si kjo do të mund të parandaloheshin ose të paktën të vonoheshin ndjeshëm, nëse kontrolli mjekësor do të ishte bërë në kohë.

Ai apelon që askush të mos presë shfaqjen e simptomave për të kujdesur për zemrën. Kur dhimbja shfaqet, shpesh është vonë. Ndaj kontrolli proaktiv është çelësi. “Koha më e mirë për ta bërë këtë është tani”, thekson ai, duke u bërë thirrje të gjithëve që kanë raste të tilla në familje të veprojnë menjëherë.

Rasti i Shpat Kasapit është një kujtesë e rëndë dhe e dhimbshme, por njëkohësisht edhe një mesazh i fuqishëm për të gjithë: shëndeti kardiak nuk duhet lënë asnjëherë pas dore. Kujdesuni për zemrën tuaj, sepse ajo nuk flet shumë, por kur flet, flet vonë.

Kurti dhe Hajdari vizitojnë Konventën e Drurit 2025: Fokus në inovacion dhe eksport

Posted on by Drin Reçica

Ministrja e Industrisë, Ndërmarrësisë dhe Tregtisë, Rozeta Hajdari, së bashku me kryeministrin Albin Kurti, mori pjesë sot në hapjen e edicionit të 8-të të Konventës vjetore të Industrisë së Drurit, e cila po konsolidohet si platforma kryesore e bashkëpunimit dhe inovacionit në këtë sektor në Kosovë, përcjell albinfo.ch.

Në fjalimin e saj, Hajdari theksoi se industria e drurit dhe mobilerisë është një ndër sektorët më të qëndrueshëm dhe më kreativ të ekonomisë së vendit, duke ndërthurur mjeshtërinë tradicionale me teknologji të avancuar, dizajn dhe potencial të lartë eksporti.

Ajo u shpreh se përmes programeve mbështetëse të MINT-it, të zbatuara nga KIESA, është mundësuar transformimi teknologjik i shumë ndërmarrjeve, duke përfshirë automatizimin industrial, inovacionin, certifikimin dhe pjesëmarrjen në panaire ndërkombëtare, me eksport kryesisht drejt Evropës dhe SHBA-së.

“Industria e drurit dhe mobilerisë është një nga kontribuuesit më të rëndësishëm në uljen e deficitit tregtar dhe ofron mundësi të mëdha punësimi, posaçërisht për të rinjtë dhe profesionistët e zanateve,” deklaroi Hajdari, duke nënvizuar rëndësinë e arsimit profesional dhe bashkëpunimit me bizneset për krijimin e një fuqie punëtore të aftë dhe konkurruese.

Ministrja foli edhe për rëndësinë e zhvillimit të qëndrueshëm, duke theksuar nevojën e shfrytëzimit të kujdesshëm të resurseve natyrore, rigjenerimit të pyjeve dhe zbatimit të standardeve të gjelbra në mbarë zinxhirin e prodhimit.

Ajo përmendi studimet e MINT-it që identifikojnë produktet e drurit si një nga grupet kryesore me potencial për rritjen e vlerës së shtuar vendore, si dhe rolin e këtij sektori në industrinë qarkore përmes riciklimit dhe ripërdorimit të materialeve.

“Konventa e Drurit 2025 është një mundësi unike për shkëmbim idesh dhe krijimin e partneriteteve të reja për zhvillimin e një industrie konkurruese, të gjelbër dhe të qëndrueshme,” theksoi ministrja, duke shprehur urimin që ngjarja të sjellë frymëzim dhe hapa të rinj konkretë në këtë drejtim.

Në fund, Hajdari falënderoi Shoqatën e Përpunuesve të Drurit për mirënjohjen që i është ndarë, duke vlerësuar kontributin e aktorëve të sektorit në zhvillimin ekonomik të vendit.

Një në tre shqiptarë planifikon emigrimin, puna dhe jetesa më e mirë arsyet kryesore

Posted on by Drin Reçica

Në Shqipëri, njerëzit me synime migrimi në të ardhmen e afërt ose të largët përbëjnë 33% të popullsisë, një nga nivelet më të larta në rajonin e CESEE (Europa Qendrore, Lindore dhe Juglindore) dhe një tregues i qartë i presionit të vazhdueshëm demografik që vendi po përjeton.

Kjo shifër përfshin ata që planifikojnë të largohen brenda një viti, ata që konsiderojnë emigrimin në dekadën e ardhshme, si dhe një pjesë të konsiderueshme të individëve që nuk e përjashtojnë kategorikisht mundësinë e emigrimit. Diferenca me vendet e Europës Qendrore është e ndjeshme: në Çeki dhe Hungari, vetëm 7% e popullsisë raporton synime të tilla.

Të dhënat vijnë nga raporti i vitit 2024 e OeNB Euro Survey, i cili mat rregullisht qëndrimet ndaj migrimit në vendet e Europës Qendrore, Lindore dhe Juglindore. Sondazhi i fundit tregon se, megjithëse dëshira për emigrim në afatin e afërt ka rënë në shumicën e vendeve krahasuar me vitet para pandemisë, Shqipëria dhe Maqedonia e Veriut mbeten përjashtime të dukshme.

Në vitin 2024, 10% e shqiptarëve dhe 11% e qytetarëve të Maqedonisë së Veriut shprehnin synim për t’u larguar brenda një viti, nivelet më të larta në rajon. Vendet e tjera si Serbia, Rumania, Bosnja dhe Hercegovina, Bullgaria dhe Polonia shënojnë shifra më të ulëta, nga 2% deri në 5%, ndërsa Hungaria dhe Çekia raportojnë më pak se 2%.

Në vitin 2019, para pandemisë, mesatarisht 7% e banorëve në vendet e CESEE planifikonin të emigronin brenda vitit të ardhshëm, ndërsa kjo shifër ra në 5% në vitin 2021 dhe 4.5% në vitin 2024. Megjithatë, Shqipëria vazhdon të qëndrojë dukshëm mbi mesataren rajonale.

Sondazhi i 2024 përfshiu edhe një pyetje mbi mundësinë e emigrimit brenda dhjetë viteve të ardhshme, për të matur hapjen më të gjerë të popullsisë ndaj migrimit. Në të gjithë rajonin, rreth 10% e popullsisë e konsideron të mundshme emigrimin gjatë dekadës së ardhshme. Një tjetër 8.5% deklaron “nuk e di”, çka tregon se nuk e përjashtojnë këtë mundësi. Në Shqipëri, të dyja këto grupe, së bashku me synimet afatshkurtra, e çojnë totalin e popullsisë me prirje emigrimi në 33%.

Sa i përket arsyeve për emigrim të paraqitura në grafikun 11, shumica e njerëzve deklarojnë se duan të emigrojnë për arsye të lidhura me punësimin (46%). Kjo pasohet nga kushtet më të mira të jetesës jashtë vendit si arsyeja e dytë kryesore (26%). Kështu, përmirësimet në kushtet e tregut të punës dhe në shërbimet publike, si arsimi ose kujdesi shëndetësor, mund të jenë kyçe për të reduktuar më tej synimet për migrim në vendet e CESEE ose për të nxitur kthimin e njerëzve.

Në Shqipëri, dy arsyet kryesore që nxisin emigrimin janë kërkimi për mundësi më të mira punësimi dhe dëshira për kushte më të mira jetese.

Në vitin 2024, të anketuarve iu kërkua të tregonin nëse kishin jetuar më parë jashtë vendit. Grafiku 12 tregon se pjesa e këtyre të kthyerve është e konsiderueshme në vendet e CESEE, duke arritur mesatarisht 14%. Hungaria ka pjesën më të ulët me diferencë, me rreth 7% të popullsisë që ka jetuar jashtë.

Në shumicën e vendeve, kjo pjesë varion midis 11% dhe 16%. Në Shqipëri, një nivel befasues i popullsisë prej 28% deklaron se ka jetuar më parë jashtë vendit.

Sa i përket kohëzgjatjes së qëndrimit jashtë, qëndrimet afatshkurtra më pak se një vit janë të zakonshme. Ato përbëjnë 35% të të gjitha qëndrimeve nëpër vende, por pjesët variojnë nga rreth 25% në Bosnje dhe Hercegovinë deri në rreth 50% në Çeki.

Çekia dallohet si vend me shumë pak të kthyer që kanë kaluar më shumë se tre vjet jashtë (rreth 20%). Në kontrast, Bosnja dhe Hercegovina ka më shumë të kthyer që kanë kaluar më shumë se tre vjet jashtë (rreth 50%), e ndjekur nga Bullgaria, Shqipëria dhe Serbia (rreth 40%).

Një zvicerane vdes nga sulmi i peshkaqenit në Australi

Posted on by albinfo.ch

Një grua e re zvicerane u plagos për vdekje në një sulm peshkaqeni në brigjet lindore të Australisë. Peshkaqeni sulmoi edhe partnerin e saj, i cili, sipas policisë, u dërgua në spital në gjendje kritike, transmeton albinfo.ch.

Viktimat ishin turistë zviceranë, siç konfirmoi policia lokale për agjencinë e lajmeve Keystone-SDA, duke mbështetur një artikull në gazetën australiane “Sydney Morning Herald”.

Të dy ishin në të njëzetat, shkruan tutje policia në një deklaratë. Burri u dërgua në Spitalin John Hunter me lëndime të rënda në këmbë. Gruaja vdiq në vendngjarje.

Ekspertët tani do të përcaktojnë specien e peshkaqenit përgjegjës për sulmin, vazhdon deklarata.

Incidenti ndodhi në Crowdy Bay pranë kampingut Kylies Beach, rreth 350 kilometra në veri të Sidneit, përcjell albinfo.ch. Rajoni është mjaft i izoluar, por është shumë i njohur për vendasit dhe vizitorët për shkak të bukurisë së tij piktoreske.

Sulmi i peshkaqenit ndaj dy personave, tepër i rrallë

Një biolog detar ka thënë për gazetën Australian Guardian se është e rrallë që një peshkaqen të sulmojë më shumë se një person – megjithatë, kjo ndodh kur kafshët gjuajnë dhe përpiqen të mbajnë larg rivalët.

Tri specie vendase në rajon janë veçanërisht të rrezikshme për njerëzit: peshkaqenët tigër, peshkaqenët dem dhe peshkaqenët e bardhë të mëdhenj.

Dita e Forcës, FSK hap sot dyert për qytetarët

Posted on by Drin Reçica

Forca e Sigurisë së Kosovës sot organizon “Ditën e Forcës – Ditën e Hapur”, nga ora 09:00 deri në ora 14:00, përcjell albinfo.ch.

Në kazermën “Adem Jashari “ në Prishtinë nga ora 09:30 do të jenë të pranishëm edhe udhëheqësit e lartë shtetërorë, mysafirë e ambasadorë të vendeve mike.

“Të gjithë qytetarët janë të mirëseardhur të vizitojnë kazermat e Forcës së Sigurisë së Kosovës në: Prishtinë, Prizren, Pomozotin, Istog, Ferizaj, Mitrovicë dhe Gjilan”, thuhet në njoftim.

Në të gjitha kazermat e Forcës së Sigurisë së Kosovës, qytetarët do të kenë mundësi të shohin kapacitetet ushtarake të cilat do të jenë të ekspozuara në këtë ditë feste.

Në “Ditën e Forcës” presidentja e vendit, Vjosa Osmani, kryeministri në detyrë, Albin Kurti, kryekuvendari, Dimal Basha dhe ministri në detyrë i Mbrojtjes, Ejup Maqedonci vizituan kazermën duke parë nga afër pajisjet ushtarake të FSK-së.

Mes tjerash edhe fëmijët të cilët kishin mundësi të vizitonin kazermën me brohoritje përqafuan dhe shkëmbyen fotografi me liderët e vendit.

Pse Memli Krasniqi nuk do të garojë për deputet në zgjedhjet e 28 dhjetorit?

Posted on by Drin Reçica

Ish-kryetari i PDK-së, Memli Krasniqi, ka njoftuar se në zgjedhjet e 28 dhjetorit nuk do të jetë në garë për deputet, përcjell albinfo.ch.

Megjithatë, ai tha se do të jetë në shërbim të PDK-së dhe ka marrë përsipër që të udhëheqë fushatën zgjedhore të partisë, si shef i Shtabit Qendror Zgjedhor.

“Sot, me vendim të Kryesisë së Partisë Demokratike të Kosovës, kam marrë përsipër përgjegjësinë për të udhëhequr fushatën zgjedhore të partisë, si Shef i Shtabit Qendror Zgjedhor, në rrugën tonë drejt fitores më 28 dhjetor. Këto zgjedhje janë mundësi për t’i rikthyer vendit normalitetin, stabilitetin dhe zhvillimin. PDK hyn në këtë proces më e përgatitur, e bashkuar dhe shumë e gatshme për t’i dhënë vendit drejtimin që meriton. Në këtë fushatë, do të jem plotësisht në shërbim të fushatës sonë, të ekipit, të strukturave dhe të fitores sonë të përbashkët. Prandaj, pas shtatë mandateve si deputet i Kuvendit të Kosovës, këtë herë kam vendosur që të mos jem pjesë e listës tonë zgjedhore”, shkroi Krasniqi në Facebook.

Ish-kreu i PDK-së i cili së fundmi dha dorëheqje nga udhëheqja e kësaj partie tha se vendimi për të mos garuar për deputet është i qellimshëm dhe sipas tij i lejon t’i përkushtohet “tërësisht organizimit dhe udhëheqjes së fushatës dhe mbështetjes së plotë për Kryetarin dhe kandidatin tonë për Kryeministër, Bedri Hamza”.

Më 17 nëntor, Bedri Hamza u zgjodh kryetar i PDK-së, pas dorëheqjes së Memli Krasniqit. Zgjedhja e Hamzës u bë me shumicë votash në Konventën Zgjedhore të PDK-së, në të cilën nuk pati kundërkandidat.

Hamza është edhe kandidat për kryeministër në zgjedhjet e jashtëzakonshme nacionale të 28 dhjetorit.

Deshishku me Austrinë sonte në finalen e Kupës së Botës U17

Posted on by Drin Reçica

Futbollisti i talentuar, Hasan Deshishku, si pjesë e Kombëtares së Austrisë U17,  sonte do të luaj në finale të Kampionatit Botëror U17 që po mbahet në Katar. Austria U17 të hënën e eliminoi në gjysmëfinale Italinë U17 duke e mposhtur me rezultatin, 2:0.Dy golat për Austrinë U17 i realizoi Johannes Moser, shkruan albinfo.at. 

Deshishku, talenti shqiptar, është prej lojtarëve më të mirë tek Austria, që ka arritur sukses historik. Të enjten Austria do të luajë me Portugalinë në finale të Kampionatit Botëror. Dhe shpresat për sukses të Austrisë do të jenë edhe te shkëlqimi i Deshishkut në sulm.

Ndeshja Portugali – Austri U17  do të zhvillohet nga ora 17:00., drejpërdrejt në ORF1, raporton albinfo.at

Hasan Deshishku është i lindur në Austri, por është djalë i familjes Deshishku nga Barileva e Prishtinës. Babai i tij u largua nga Kosova në fillim të viteve nëntëdhjetë dhe u vendos në Austri.

Deshishku aktualisht luan tek ekipi “Austria Wien”. Shquhet për numrin e madh të golave që i shënon. Për skuadrën U16 i kishte 35 gola në 31 paraqitje. Për përfaqësuesen U15 të Austrisë e ka shënuar një gol në katër paraqitje. Për U16 të Austrisë ka dy gola në pesë paraqitje. Dhe për U17 tani ka arritur në shifrën e shtatë golave në 18 paraqitje. Tani ai ka arritur që të jetë i padiskutueshëm  startues në përfaqësuesen e Austrisë ku sonte pritet të luan edhe në finalen e Kampionatit Botëror.

Finalja e Kupës së Botës U17 ka zgjuar interesim të madh nga mediat dhe tifozët austriakë, por sigurisht edhe nga komuniteti shqiptar në Austri, të cilët presin një fitore historike nga Kombëtarja e Austrisë dhe ndonjë gol nga Hasan Deshishku.

Kosova ekspozon artin dhe krenarinë kombëtare në Romë, Milano e Napoli

Posted on by Drin Reçica

Siç ka shkruar platforma Albinfo.ch, gjatë muajit nëntor, Ambasada e Kosovës në Itali organizoi ekspozitën “Bellezze del Kosovo – Bukuritë e Kosovës”, një përmbledhje vizuale që prezanton bukuritë, historinë dhe krenarinë kombëtare të Kosovës.

Ekspozita u shfaq në qytete të ndryshme italiane, përfshirë Romën, Milanon dhe Napolin, duke ofruar vizitorëve një udhëtim përmes peizazheve natyrore, trashëgimisë kulturore dhe momenteve të rëndësishme për vendin.

Një ndër pikat më të veçanta ishte fotografia e realizuar nga Agon Dana, ku shfaqeshin Kryemjeshtri Driton Kuka dhe kampionet olimpike të xhudos: Majlinda Kelmendi, Distria Krasniqi, Nora Gjakova dhe Laura Fazliu. Kjo imazh thekson sukseset sportive të Kosovës dhe pasqyron pjesën e ekspozitës që i dedikohet arritjeve kombëtare.

Ekspozita ka për qëllim të promovojë vlerat artistike dhe sportive të vendit tonë dhe të forcojë lidhjet kulturore mes Kosovës dhe Italisë. “Bukuritë e Kosovës” ofron një platformë për njohjen dhe vlerësimin e pamjeve, historisë dhe arritjeve të vendit, duke afruar komunitetet shqiptare jashtë atdheut me kulturën dhe identitetin e tyre.

https://www.facebook.com/share/1CSx9uMMy9/?mibextid=wwXIfr

Roma mirëpret ekspozitën “Bukuritë e Kosovës”

Krasniqi: Mijëra fletëvotime nga diaspora rrezikojnë të mos arrijnë në kohë në Kosovë

Posted on by Drin Reçica

Anëtari i Lëvizjes Vetëvendosje në Komisionin Qendror të Zgjedhjeve, Alban Krasniqi, ka ngritur shqetësimin se votat e diasporës mund të mos arrijnë në Kosovë brenda afateve ligjore për zgjedhjet e 28 dhjetorit. Ai ka theksuar se vonesat në dërgimin e zarfeve nga Sekretariati i KQZ-së rrezikojnë që mijëra votues jashtë vendit të mbesin pa të drejtë vote, përcjell albinfo.ch.

Krasniqi ka bërë të ditur se sipas vlerësimeve logjistike, procesi i dërgesave postare kërkon së paku 10 ditë, derisa dërgimi i materialit për votim pritet të nisë me vonesë. Për këtë arsye, sipas tij, ekziston rreziku që deri në 80 për qind të fletëvotimeve të mos arrijnë në kohë dhe të mos hapen fare.

Ai e ka cilësuar këtë situatë si të dhimbshme dhe si një shkelje të të drejtës së qytetarëve për të votuar, duke kërkuar që institucioni të marrë përgjegjësitë e nevojshme dhe të reflektojë për të mos përsëritur gabimet. Sipas tij, buxheti për procesin e dërgimit të fletëvotimeve deri te votuesit jashtë vendit kap shifrën rreth 3.7 milionë euro, por kjo nuk garanton suksesin nëse nuk respektohen afatet.

Krasniqi ka shtuar për koha.net se si zgjidhje e mundshme po propozohet fillimi më i hershëm i votimit përmes postës, në mënyrë që votat e mërgatës të kenë kohë të kthehen dhe të numërohen.

Kurti u bën thirrje mërgimtarëve: Regjistrohuni për të votuar më 28 dhjetor

Posted on by Drin Reçica

Kryeministri në detyrë, Albin Kurti publikoi mbrëmë një video dhe mesazh për të gjithë qytetarët e Kosovës që jetojnë jashtë vendit, duke i nxitur që të regjistrohen për të votuar në zgjedhjet e 28 dhjetorit, edhe nëse nuk kanë mundësi të udhëtojnë në Kosovë, përcjell albinfo.ch.

“Të dashur bashkatdhetarë, ju që nuk keni planifikuar të udhëtoni për Kosovë për zgjedhjet e 28 dhjetorit, ky është linku për regjistrim për votim nga jashtë vendit: diaspora.kqz-ks.org/sq/AbroadVoter” — ishte thirrja e tij.

Sipas Komisioni Qendror i Zgjedhjeve (KQZ), periudha për regist­rimin e votuesve jashtë Kosovës filloi më 26 nëntor dhe përfundon më 6 dhjetor 2025.

Votuesit jashtë vendit do të kenë mundësi të votojnë ose fizikisht në përfaqësi diplomatike të Kosovës, ose përmes postës sipas mënyrës që zgjedhin gjatë regjistrimit.

Apeli i Kurtit është pjesë e një fushate më të gjerë për të mobilizuar diasporën, me qëllim që qytetarët jashtë vendit të mos mbeten jashtë procesit zgjedhor dhe të ushtrojnë të drejtën e tyre për të votuar.  /Albinfo.ch

Video e plotë

Manifestim festiv për 28 Nëntorin në Shkollën Shqipe Ostermundigen Bern

Posted on by Drin Reçica

Me rastin e 28 Nëntorit, Ditës së Flamurit dhe Pavarësisë së Shqipërisë, Shkolla Shqipe Ostermundigen në Bern organizoi një manifestim madhështor, ku u bashkuan nxënës, prindër dhe familjarë për të nderuar njërën nga datat më të shënuara të kombit shqiptar, transmeton albinfo.ch.

Fëmijët e shkollës, përmes një programi të pasur artistik, sollën këngë, poezi, valle dhe interpretim artistik që shfaqën dashurinë dhe krenarinë e tyre për atdheun. Atmosfera festive u ndez nga ngjyrat kuqezi dhe emocionet që përcillnin secilin numër artistik.

Në këtë aktivitet na nderoi me pjesëmarrjen e saj edhe koordinatorja e kantonit të LAPSH Bern, znj. Saime Isufi, e cila përgëzoi punën e palodhshme të shkollës dhe rëndësinë e ruajtjes së gjuhës e identitetit shqiptar në diasporë.

Një falënderim i veçantë u drejtua për Kryesinë e Këshillit të Prindërve për mbështetjen e pakursyer: z. Hajrulla Berisha, kryetar, znj. Arbnora Zubaku, arkëtare, si dhe anëtaret znj. Jetmira Berisha dhe znj. Mizi Beluli. Përkushtimi i tyre është një shtyllë e rëndësishme në suksesin e aktiviteteve të shkollës.

Ky manifestim jo vetëm që kremtoi Ditën e Flamurit, por edhe forcoi lidhjen e brezave të rinj me rrënjët dhe vlerat kombëtare, duke dëshmuar rolin thelbësor të Shkollës Shqipe Ostermundigen Bern në ruajtjen e identitetit shqiptar në Zvicër.

Zvicra nis një plan ambicioz për përmirësimin e cilësisë së ujit

Posted on by Alb

Cilësia e ujit të pijshëm, ujërave nëntokësorë dhe ujërave të liqeneve dhe lumenjve duhet të përmirësohet në Zvicër. Këshilli Federal hapi të mërkurën një konsultim mbi një projekt-ligj në këtë drejtim. Afati i konsultimit zgjat deri më 12 mars 2026.

Mbrojtja e ujit është thelbësore për njerëzit, kafshët, bujqësinë dhe ekonominë, theksoi Ministri i Mjedisit, Albert Rösti, në një deklaratë për mediat në Bernë. Është e domosdoshme që këto ujëra të jenë sa më pak të ndotura.

Projekti përfshin disa ndryshime. E para ka të bëjë me vlerat kufizuese për substancat aktive që përdoren në pesticidet. Aktualisht, këto vlera janë përcaktuar për 19 substanca nga perspektiva ekotoksikologjike.

Këshilli Federal po shton shtatë substanca të tjera në listë, të cilat janë zbuluar në ujërat zviceranë vitet e fundit në përqendrime që nuk garantojnë më mbrojtjen e bimëve dhe kafshëve. Megjithatë, ai nuk vendos vlera kufizuese për tre substanca të tjera që nuk mund të zëvendësohen për mbrojtjen e kulturave bujqësore.

Qeveria ka vlerësuar interesat e prodhimit ushqimor kundrejt mbrojtjes së burimeve ujore për substancat që nuk kanë alternativë, komentoi ministri. Por ai shtoi se nuk ka “arsye për t’u shqetësuar” për ujin e pijshëm që mund të mos jetë i pastër. “Sasia është minimale.”

Nëse këto vlera tejkalohen, kantonet duhet të ndërmarrin masa. Në rast të tejkalimeve të përsëritura dhe të mëdha, Konfederata duhet të rishikojë regjistrimin e pesticideve përkatëse dhe të sigurojë mbrojtjen e duhur të bimëve dhe kafshëve që jetojnë në ujë.

Trajtimi i ujërave të ndotura dhe kanalizimet

Një ndryshim i dytë kërkon që kantonet dhe komunat të pajisin impiantet e trajtimit të ujërave të ndotura deri në vitin 2050, në mënyrë që të lëshojnë më pak përbërës nitrogjeni dhe përbërës organikë në ujë dhe të emetojnë më pak oksid azoti, i cili është i dëmshëm për klimën, në atmosferë.

Financimi aktual për masat e heqjes së elementëve gjurmë duhet gjithashtu të rregullohet. Qëllimi është mbrojtja e njerëzve dhe mjedisit nga ndikimet negative dhe parandalimi i tejkalimit të vlerave kufizuese, sipas Këshillit Federal. Zvicra ka 700 impiante trajtimi ujërash, të cilave i janë lidhur praktikisht të gjithë banorët.

Një tjetër ndryshim ka të bëjë me detyrimin e fermave bujqësore për t’u lidhur me sistemin publik të kanalizimeve. Aktualisht, përjashtim kanë vetëm ato që kanë një numër të madh lopësh ose derrash, dmth tetë lopë qumështi ose 60 derrash për rritje.

Tani përjashtimi do të zgjerohet edhe për fermat me kafshë të tjera. Konkretisht, kjo korrespondon me rreth 50 dele, 800 pula vezë ose pesëmbëdhjetë kuaj.

 

Këshilli Federal vendos objektiva për kontrollin e kostove të kujdesit shëndetësor

Posted on by Alb

Për herë të parë, Këshilli Federal do të vendosë objektiva për rritjen maksimale të kostove të kujdesit shëndetësor për periudhën 2028–2031. Qëllimi është të mbahet nën kontroll shpenzimi i sigurimeve shëndetësore të detyrueshme, një shqetësim kryesor për qytetarët zviceranë, transmeton albinfo.ch.

Ligji i ri, që hyn në fuqi më 1 janar, është miratuar si kundërpropozim ndaj iniciativës për kontrollin e kostove. Një komision i posaçëm do të monitorojë zhvillimet dhe do të rekomandojë masa për të siguruar arritjen e objektivave.

Para se të përcaktojë objektivat, Këshilli Federal do të konsultohet me siguruesit, përfaqësuesit e të siguruarve, kantonet dhe ofruesit e shërbimeve, për të siguruar kujdes shëndetësor cilësor dhe ekonomik.

Të shtëna armësh pranë Shtëpisë së Bardhë në SHBA, dy ushtarë të Gardës Kombëtare të lënduar

Posted on by Alb

Të mërkurën, dy anëtarë të Gardës Kombëtare u qëlluan në afërsi të Shtëpisë së Bardhë, raporton media ndërkombëtare. Gjendja e tyre nuk është konfirmuar menjëherë, sipas një zyrtari të zbatimit të ligjit, raportojnë mediat ndërkombëtare, transmeton albinfo.ch.

Mjetet e emergjencës u panë duke u nisur drejt zonës, ndërsa Task Forca e Përbashkët e Uashingtonit njoftoi se po merrej me incidentin e raportuar. Megjithatë, një zëdhënës nuk pranoi të konfirmonte ose të mohojë nëse ndonjë ushtar i Gardës Kombëtare ishte prekur nga të shtënat.

Departamenti i Policisë Metropolitane po monitoronte situatën, por nuk dha detaje shtesë. Një zëdhënëse e kryebashkiakes Muriel Bowser tha se udhëheqësit lokalë po ndiqnin ngjarjen nga afër.

Presidenti Donald Trump ishte në fushën e tij të golfit në West Palm Beach kur ndodhën të shtënat. Sekretarja e Shtypit e Shtëpisë së Bardhë, Karoline Leavitt, tha se Shtëpia e Bardhë ishte e informuar dhe po monitoronte situatën.

Qindra anëtarë të Gardës Kombëtare nga Distrikti dhe shtete të tjera kanë patrulluar kryeqytetin, pas urdhërit të presidentit Trump në gusht për të mobilizuar forcat policore lokale dhe për të dërguar trupa nga tetë shtete dhe Distrikti i Columbias.

 

Mbahen takimet poetike të Nëntorit në Lucern

Posted on by albinfo.ch

Lidhja e Krijuesve Shqiptarë në Mërgatë me datë 28 NËNTOR 2025 do të jetë në Garanë të Kërçovës, ku do të përurohet Monumenti i Gjergj Kastriotit, ndaj për këtë arsye Takimet e Nëntorit këtë vit do të mbahen në Luzern të Zvicrës me 14 dhjetor 2025 me përkrahje të MISIONIT KATOLIK SHQIPTARË -Luzern, SHHB NËNË TEREZA të Zvicrës si dhe Shoqata “Sali Çekaj” Zvicër

Programi: Orë Letrare me temë PJETËR BOGDANI si dhe Buzmi Bujar.

Ardhja juaj nderon artin e kulturës arbërore!

14 dhjetor 2025 E DJELË : ORA 15hoo

Adresa: Rodteggstrasse 6

6005 Luzern

Albin Kurti nominohet nga Vetëvendosje si kandidat për kryeministër

Posted on by Alb

Albin Kurti është zgjedhur kandidat për kryeministër nga Lëvizja Vetëvendosje (LVV) për zgjedhjet e jashtëzakonshme që do të mbahen më 28 dhjetor 2025 në Kosovë. Nominimi u bë gjatë mbledhjes së Këshillit të Përgjithshëm të partisë.

Nënkryetari i LVV-së, Glauk Konjufca, gjatë fjalës së tij theksoi se Kurti është kryeministri më i suksesshëm në historinë e Kosovës dhe lideri më meritor i partisë. Ai shtoi se Kurti është “lider i vërtetë i transformimit social dhe personi më i votuar nga populli në historinë e demokracisë sonë”.

Konjufca gjithashtu kritikoi partitë opozitare, duke thënë se qëllimi i tyre ka qenë të bllokojnë Qeverinë dhe ta dobësojnë LVV-në. Ai theksoi se opozita nuk prezantoi asnjë program konkret për qeverisje, por përpiqej vetëm që të pengonte kryeministrin në detyrë.

Delegatët e LVV-së votuan unanimisht për nominimin e Kurtit. Zgjedhjet e jashtëzakonshme u shpallën pas dështimit për formimin e Qeverisë së Kosovës.

Shoqata “Atdheu” në Thun, manifestim kushtuar 28 Nëntorit – Ditës së Flamurit.

Posted on by albinfo.ch
Shoqata Kulturore “Atdheu” në Thun organizon më 29 nëntor 2025 manifestimin festiv me rastin e 28 Nëntorit – Ditës së Flamurit.
Ngjarja do të zhvillohet në Bärensaal, Frutigenstrasse 68d, 3604 Thun, duke filluar nga ora 19:00.

Programi i mbrëmjes do të sjellë një atmosferë të pasur artistike me muzikë live nga këngëtari Alban Luzha, si dhe numra të përgatitur nga vajzat e shoqatës. Qëllimi i aktivitetit është forcimi i bashkësisë shqiptare në Zvicër dhe ruajtja e traditave tona kulturore.

Hyrja është 10 franga, ndërsa fëmijët deri në moshën 15 vjeç dhe anëtarët e shoqatës hyjnë falas.

Për më shumë informacione: 079 778 30 12.

Studim i ri: Zviceranët konsumojnë shumë më tepër kripë se sa rekomandohet

Posted on by Alb

Një studim i fundit në Zvicër tregon se popullsia konsumon dukshëm më shumë kripë sesa rekomandohet nga Organizata Botërore e Shëndetësisë. Ndërsa kufiri ditor duhet të jetë maksimumi 5 gramë, zviceranët konsumojnë mesatarisht 8.7 gramë në ditë – pothuajse dyfishin e sasisë së lejuar. Vetëm 14% e të rriturve arrijnë të qëndrojnë brenda normës së OBSH-së.

Sipas studimit të drejtuar nga prof. Murielle Bochud nga Unisanté në Lozanë, konsumimi i tepërt i kripës rrit ndjeshëm tensionin e gjakut, një faktor i rëndësishëm rreziku për sëmundjet kardiovaskulare. Të dhënat tregojnë se 24% e personave mbi 15 vjeç kanë hipertension, ndërsa kjo përqindje ngjitet në 56% për moshat mbi 60 vjeç.

Kripa fshihet kryesisht në ushqimet e përpunuara

Rreth 75% e kripës që konsumojmë nuk vjen nga kriposja në tavolinë, por nga produktet e përpunuara si buka, ushqimet e gatshme, salcat industriale, sallamet, pica apo lazanja. Specialistët rekomandojnë konsum të shtuar të frutave e perimeve të freskëta dhe produkteve sa më pak të përpunuara.

Konsumatorët e ndërgjegjshëm përballen me vështirësi

Personat që përpiqen të ulin kripën ndeshen me sfida të mëdha, pasi shumë produkte kanë përmbajtje të lartë kripë, ndërsa etiketat shpesh janë të vështira për t’u interpretuar. Megjithatë, ekspertët theksojnë se gatimi në shtëpi dhe zgjedhja e produkteve të freskëta janë mënyra më të mira për të ulur ndjeshëm sasinë e kripës.

Industria ushqimore heziton të veprojë

Pavarësisht përpjekjeve të autoriteteve zvicerane për të bindur industrinë ushqimore të ulë përmbajtjen e kripës në produkte, shumica e kompanive nuk kanë pranuar të nënshkruajnë objektivat e propozuara. Kompanitë arsyetojnë se reduktimi i kripës mund të ndikojë në shijen e produkteve dhe konkurrencën në treg.

Rreziqet për shëndetin janë të mëdha

Sipas të dhënave ndërkombëtare, mbi 800 persona në Zvicër vdesin çdo vit si pasojë e konsumit të tepërt të kripës. Për këtë arsye, specialistët këshillojnë përdorimin e kripës së jodizuar dhe uljen graduale të konsumit, që mund të përmirësojë ndjeshëm shëndetin kardiovaskular dhe atë të veshkave.

 

Një platformë kriptomonedhash paditet për rolin e saj të supozuar në sulmet e 7 tetorit

Posted on by Alb

Familjet e viktimave të sulmeve të 7 tetorit në Izrael kanë depozituar këtë javë një padi kundër platformës së këmbimit të kriptomonedhave Binance, duke e akuzuar atë se ka lehtësuar transaksione financiare ndërmjet Hamasit dhe organizatave të tjera islamiste.

Padia, e dorëzuar në Shtetet e Bashkuara, nuk e akuzon Binance vetëm për lehtësimin e transaksioneve për Hamasin; ajo e mban kompaninë përgjegjëse për sulmet e 7 tetorit dhe ato që pasuan, duke argumentuar se ajo ka kontribuar drejtpërdrejt dhe materialisht në to.

Paditësit – mes tyre më shumë se 300 amerikanë që kanë humbur të afërm, apo kanë familjarë të plagosur ose rrëmbyer nga Hamasi – synojnë gjithashtu edhe themeluesin e platformës. Ata dyshojnë se ai krijoi me qëllim një sistem që i shmanget ligjeve kombëtare përmes një “selie lëvizëse”, duke mundësuar pastrim parash dhe duke tërhequr terroristë, trafikantë dhe mashtrues.

Sanksione të mëparshme

Kjo nuk është hera e parë që Binance dhe themeluesi i saj, Changpeng Zhao, akuzohen për krijimin e një mekanizmi financimi në favor të Hamasit dhe Xhihadit Islamik Palestinez.

Para këtij rasti të ri, një hetim i autoriteteve amerikane kishte zbuluar se platforma ishte përdorur për pastrim parash, çka çoi në vitin 2023 në një gjobë prej më shumë se 4 miliardë dollarësh dhe në dënimin me burg të themeluesit të saj.

Falja presidenciale e diskutueshme

Në tetor 2025, presidenti amerikan Donald Trump i dha Changpeng Zhao-së një falje, duke deklaruar se ai kishte qenë viktimë e luftës së administratës Biden kundër kriptomonedhave – pa përmendur lidhjet e tij me Binance.

Disa muaj më herët, fondi emirates MGX kishte kryer një transaksion duke përdorur një monedhë digjitale të krijuar nga kompania World Liberty Financial, e mbështetur nga familja Trump, për të blerë një pjesë prej 2 miliardë dollarësh në Binance.