Archives

Zjarret në jug të Francës mbyllin Aeroportin e Marsejës

Posted on by albinfo.ch

Zjarre të fuqishme kanë përfshirë jugun e Francës, duke detyruar autoritetet të marrin masa urgjente për mbrojtjen e jetës dhe pronës. Aeroporti Marsejë-Provence u mbyll të martën pasdite, pasi flakët nga një zjarr i përhapur me shpejtësi në Pennes-Mirabeau, një qytet fqinj i Marsejës, u afruan rrezikshëm pranë infrastrukturës ajrore. Zjarri, që shkaktoi evakuimin e dy komplekseve banesore, nisi nga një automjet në flakë, shkruan RTS, transmeton albinfo.ch.

Një azil pleqsh, “L’Oustau Mira Beü”, gjithashtu u vu në rrezik, por autoritetet thanë se ndërtesa është nën mbrojtje të përforcuar nga zjarrfikës të stacionuar aty. Ndërkohë, kushtet në terren janë jashtëzakonisht të pafavorshme, me erëra deri në 75 km/h, temperatura të larta dhe lagështi të ulët që e përshpejtojnë përhapjen e flakëve.

Përballë kësaj situate, 168 zjarrfikës dhe një flotë ajrore me pesë avionë Canadair, dy Dash dhe tre helikopterë janë angazhuar për të frenuar zjarrin që ka djegur të paktën 30 hektarë pyll deri më tani.

Një tjetër vatër e madhe zjarri është regjistruar pranë qytetit Narbonne, ku pesë zjarrfikës janë plagosur lehtë gjatë përballjes me flakët. Sipas autoriteteve të departamentit të Aude, që prej së hënës, më shumë se 1,000 zjarrfikës, përfshirë edhe ekipe nga vende të tjera si Rumania, janë mobilizuar për të luftuar flakët që kanë përfshirë mbi 2,000 hektarë pyll, transmeton albinfo.ch.

Komandanti i shërbimit të zjarrfikësve të Aude paralajmëroi se dita do të jetë “shumë e vështirë” për zjarrfikësit, të cilët janë të rraskapitur nga puna e natës dhe përballen me rrezik të lartë përhapjeje të zjarrit.

Për të lehtësuar situatën në rrugë dhe për të shmangur ndalimet e rrezikshme të automjeteve, autostrada A9, një arterie kyçe që lidh Francën me Spanjën dhe që ishte mbyllur që nga e hëna, u rihap të martën në mëngjes, megjithëse me bllokime të gjata trafiku.

Rreth 150 persona u strehuan në qendrën e ekspozitës së Narbonne, ndërsa të tjerë u vendosën përkohësisht në salla sportive dhe palestra në qytete përreth. Disa banorë kaluan natën në makinat e tyre për shkak të pamundësisë për të lëvizur në autostradë.

Sipas prefektit të Aude, gjashtë shtëpi janë prekur pjesërisht nga flakët, ndërsa pesë civilë, përfshirë një fëmijë, kanë marrë trajtim mjekësor për shkak të ekspozimit ndaj zjarrit dhe tymit.

Masat e izolimit vazhdojnë të jenë në fuqi në zona si Peyriac-de-Mer dhe Prat-de-Cest në komunën Bages, në jug të Narbonne. Autoritetet shpresojnë që deri në fund të ditës të arrijnë të përmbajnë plotësisht flakët, transmeton albinfo.ch.

Zvicra kryeson në Evropë për kujdesin ndaj fëmijëve nga gjyshërit

Posted on by albinfo.ch

Zvicra renditet në krye të vendeve evropiane për sa i përket kujdesit për fëmijët të ofruar nga gjyshërit, duke reflektuar një model unik të përfshirjes familjare në jetën e përditshme të më të vegjëlve. Sipas të dhënave të fundit të Zyrës Federale të Statistikave (FSO), rreth një e treta e fëmijëve në Zvicër marrin kujdes të rregullt nga gjyshërit, një normë dukshëm më e lartë krahasuar me vendet e tjera të Evropës, shkruan SRF, transmeton albinfo.ch.

Në vitin 2023, gjyshërit zviceranë dhanë rreth 157 milionë orë kujdesi për nipërit dhe mbesat e tyre, veçanërisht për ata nën moshën katër vjeç. Kjo mbështetje është bërë një komponent kyç në sistemin e kujdesit për fëmijët në vend, duke plotësuar boshllëqet që lihen nga strukturat zyrtare të kujdesit ditor dhe oraret shkollore të pjesshme.

Ndryshe nga vendet e tjera perëndimore ku kujdesi për fëmijët është më shumë i institucionalizuar, Zvicra mbështetet fort në rrjetin familjar, me një rol të rëndësishëm për të moshuarit në jetën aktive të familjes. Përveç gjyshërve, 10 për qind e fëmijëve kujdesen nga të afërm të tjerë ose fqinjë, ndërsa kujdesi nga dado, au pair apo personel tjetër i jashtëm mbetet relativisht i ulët, vetëm 3 për qind, transmeton albinfo.ch.

Kombinimi i kostove të larta të kujdesit të organizuar dhe orarit të shkurtër shkollor në shumë kantone zvicerane ka bërë që shumë familje të mbështeten te gjyshërit për fleksibilitet dhe siguri.

Kjo përfshirje e lartë e gjyshërve jo vetëm që ndihmon familjet, por edhe forcon lidhjet ndërbreznore, duke u dhënë të moshuarve një rol aktiv dhe të vlefshëm në shoqëri. Në të njëjtën kohë, ekspertët paralajmërojnë për nevojën që ky kujdes të mos jetë i detyrueshëm apo i mbingarkuar për të moshuarit, sidomos ata në moshë të thyer ose me gjendje të cenueshme shëndetësore, transmeton albinfo.ch.

Gjermania thyen rekordin e tifozëve në Kampionatin Evropian për femra

Posted on by albinfo.ch

Mbështetja për kombëtaren e femrave të Gjermanisë ka arritur përmasa rekord në Kampionatin Evropian 2025. Plot 15,787 bileta janë shitur për tifozët gjermanë për ndeshjen ndaj Danimarkës që zhvillohet sot në orën 18:00 në St. Jakob-Park në Bazel, duke vendosur një rekord të ri historik për praninë e tifozëve gjermanë në një ndeshje ndërkombëtare femrash jashtë vendit, shkruan Blick, transmeton albinfo.ch.

Ky numër është tri herë më i madh se rekordi i mëparshëm prej 5,000 tifozësh që ndoqën finalen e Euro 2022 mes Gjermanisë dhe Anglisë në Londër.

Stadiumi, me një kapacitet të reduktuar prej 34,250 vendesh për turneun, do të jetë i mbushur pothuajse gjysmë me tifozë gjermanë, një atmosferë e paprecedentë për kombëtaren e femrave.

“Jemi të emocionuar që kaq shumë njerëz kanë ardhur për të parë ndeshjen e parë. Me 16,000 tifozë gjermanë në stadium, tani mund të presim me padurim një turmë fantastike,” tha mesfushorja Sjoeke Nüsken në konferencën për shtyp para ndeshjes, transmeton albinfo.ch.

Policia e Cyrihut: 48 incidente të dhunës së tifozëve në nëntë muaj, shumica të lidhura me FC Zurich

Posted on by albinfo.ch

Pas nëntë muajsh nga krijimi i Task Forcës “Sport”, Policia Kantonale e Cyrihut ka bërë publik vlerësimin e saj të parë, duke dhënë një pasqyrë shqetësuese mbi shkallën e dhunës në ngjarjet sportive në kanton. Që nga tetori 2024, janë trajtuar 48 incidente të lidhura me futbollin dhe hokejin në akull, 30 prej tyre të lidhura me FC Zurich, shkruan 20minuten, transmeton albinfo.ch.

Task Forca, e krijuar me qëllim për të luftuar dhunën e tifozëve, ka për detyrë të identifikojë autorët, të koordinojë hetimet dhe të forcojë ndjekjen penale të tyre. Sipas autoriteteve, rezultatet e para tregojnë qartë nevojën për këtë mekanizëm të ri sigurie.

Një nga rastet më të rëndësishme përmendet sulmi ndaj mbështetësve të Grasshopper Club (GC) në një palestër në tetor 2024, për të cilin hetimet e koordinuara nga Task Forca dhe Prokuroria e Winterthur/Unterland çuan në arrestimin e katër personave në maj 2025.

Në total, 38 persona të moshës nga 14 deri në 36 vjeç janë arrestuar gjatë kësaj periudhe. 15 prej tyre akuzohen për vepra penale të grabitjes, ndërsa në 26 raste janë vendosur zona përjashtimi dhe detyrim raportimi për të parandaluar incidente gjatë ngjarjeve sportive, transmeton albinfo.ch.

Gjatë kontrolleve dhe bastisjeve të shtuara, policia ka sekuestruar më shumë se 600 artikuj, nga të cilët mbi 200 ishin të rrezikshëm, si piroteknikë të ndaluar, thika dhe shkopinj. Këto sekuestrime janë kryer në stacione treni, qendra transporti dhe në banesa private, si pjesë e një strategjie më të gjerë parandaluese.

Në deklaratën e saj, Policia Kantonale e Cyrihut njoftoi se për të ruajtur suksesin e deritanishëm dhe për të siguruar qëndrueshmëri, Task Forca “Sport” do të bëhet pjesë e operacioneve të rregullta policore në fazën e ardhshme, transmeton albinfo.ch.

Raportimet: Xhaka në Juventus?

Posted on by albinfo.ch

Pas dështimit të transferimit të mundshëm te Milani, kapiteni i kombëtares së Zvicrës, Granit Xhaka, është përfolur sërish për një lëvizje drejt Serie A, kësaj here te Juventusi. Sipas të përditshmes italiane Gazzetta dello Sport, klubi torinez e ka futur 32-vjeçarin në listën e objektivave të merkatos verore, raporton albinfo.ch.

Çmimi i mundshëm i transferimit për mesfushorin e Bayer Leverkusenit mendohet të jetë midis 12 dhe 15 milionë euro, një shumë e arsyeshme për përvojën dhe nivelin që ofron Xhaka, i cili sezonin e kaluar shkëlqeu në Bundesliga dhe në Europa League nën drejtimin e Xabi Alonsos.

Megjithatë, një lëvizje e tillë varet nga e ardhmja e Douglas Luiz, i cili pritet të largohet nga Juventusi. Vetëm pas shitjes së brazilianit, Juventusi mund të konkretizojë interesimin për Xhakën.

Në listën e dëshirave të kampionëve italianë të rekordeve ndodhet edhe mesfushori i Newcastle United, Sandro Tonali, i cili thuhet se është përpara Xhakës në prioritetet e klubit. E megjithatë, përvojat e Xhakës në Premier League, Bundesliga dhe turnetë ndërkombëtarë e bëjnë atë një alternativë të fortë dhe të gatshme për të përforcuar mesfushën e “Zonjës së Vjetër”, raporton albinfo.ch.

Presidentja Osmani kërkon transparencë dhe drejtësi pas vdekjes së 27-vjeçarit gjatë ndërhyrjes së policisë

Posted on by albinfo.ch

Presidentja e Kosovës, Vjosa Osmani, ka reaguar pas rastit të rëndë që ka tronditur opinionin publik, ku një i ri 27-vjeçar dyshohet se ka humbur jetën gjatë një ndërhyrjeje të Policisë së Kosovës, raporton albinfo.ch.

Në një deklaratë publike, Osmani e cilësoi ngjarjen si të rëndë dhe tronditëse, duke theksuar se për këtë rast kërkohet “transparencë e plotë, përgjegjësi institucionale dhe drejtësi e pakompromis”.

“Të gjitha rrethanat e këtij rasti duhet të hetohen menjëherë, në mënyrë të pavarur dhe profesionale,” u shpreh ajo. Presidentja shtoi se “çdo zyrtar që mund të ketë shkelur ligjin apo tejkaluar kompetencat duhet të vihet përpara drejtësisë pa asnjë vonesë”.

Osmani përmbylli reagimin e saj me mesazhin e qartë se “askush nuk është mbi ligjin”, raporton Albinfo.ch.

Kori “Siparantum” sjell medalje të argjendtë për Kosovën

Posted on by albinfo.ch

Kultura muzikore e Kosovës ka shënuar edhe një sukses të rëndësishëm në arenën ndërkombëtare. Kori “Siparantum” ka fituar medaljen e argjendtë në garën prestigjioze Grand Prix of Nations, në kuadër të European Choir Games 2025, të mbajtur në Danimarkë, raporton albinfo.ch.

Lajmin e ka bërë të ditur ministri në detyrë i Kulturës, Rinisë dhe Sportit, Hajrullah Çeku, i cili përmes një postimi publik shprehu mirënjohjen dhe krenarinë për këtë arritje. “Ky është një tjetër sukses që e vendos Kosovën në skenën ndërkombëtare të muzikës korale,” shkroi Çeku, duke falënderuar në veçanti dirigjentin Memli Kelmendi dhe gjithë ekipin e korit për përkushtimin e tyre artistik.

Kori “Siparantum”, i njohur për interpretimet e tij profesionale dhe nivelin e lartë artistik, ishte në mesin e koreve më të mira nga mbarë bota në këtë garë, duke e përfaqësuar Kosovën me dinjitet dhe pasion.

Ky çmim konfirmon ngritjen e vazhdueshme të skenës muzikore të Kosovës dhe rëndësinë që arti dhe kultura kanë në promovimin e vendit në botë, raporton albinfo.ch.

Halili+Partner Ingenieure nga Zvicra vlerësohet në Oman me vendin e dytë

Posted on by albinfo.ch

Komuna e Maskatit ka shpallur fituesit e Konkursit të Dizajnit 2025 , një iniciativë globale që synon të rimendojë hapësirat urbane duke nderuar identitetin oman. Këto mendje krijuese përfaqësojnë një vizion të ri për kryeqytetin, ku inovacioni bashkëjeton me traditën, raporton albinfo.ch.

Një vizion largpamës për zhvillimin urban në kryeqytetin Maskat u prezantua përmes Konkursit të Dizajnit 2025 të Komunës së Maskatit.

Ndër pjesëmarrësit më të spikatur të këtij konkursi ishte edhe kompania e inxhinierisë së ndërtimit nga Zvicra, Halili+Partner Ingenieure,  e udhëhequr nga Bensik Halili, e cila arriti të sigurojë vendin e dytë në këtë garë ndërkombëtare, duke dëshmuar nivel të lartë profesionalizmi dhe kreativiteti.

Projekti që zuri vendin e dytë në garën MUSKATA ishte realizuar nga ekipi ndërkombëtar:

BMA – BESIAN MEHMETI ARCHITECTS
Shkup, Maqedonia e Veriut
Lead and Design Architect

MORF ARCHITECTURE
Tokio, Japoni
Urban Designers

1MOKU ARCHITECTS
Tokio, Japoni / Barcelona, Spanjë
Landscape Architects

HALILI+PARTNER INGENIEURE
Cyrih, Zvicër / Balzers, Lihtenshtajn
Structural Engineers

 

Pas përzgjedhjes fillestare në Top 20, kompania kaloi në Top 10 dhe më pas në Top 5 finalistët, të cilët prezantuan dje projektet e tyre para jurisë ndërkombëtare në Maskat.

Sot, juria shpalli tre fituesit kryesorë, duke vlerësuar zgjidhjet më të mira për zhvillimin e ardhshëm urban të qytetit, me fokus në identitetin oman, dizajnin bashkëkohor dhe qëndrueshmërinë.

Në një deklaratë ekskluzive nga Omani, Besnik Halili u shpreh: “Ishte një nder i madh të përfaqësojmë Zvicrën në këtë konkurs të nivelit të lartë. Fakti që arritëm në Top 5 dhe më pas siguruam vendin e dytë, për ne është një konfirmim i përkushtimit dhe vizionit tonë për një arkitekturë që ndërthur teknologjinë, kulturën dhe respektin për vendin ku ndërtohet. Ky është vetëm fillimi.”

Besniku është inxhinier i ndërtimit dhe kompania e tij, Halili+Partner Ingenieure, është e specializuar në fushën sizmike. Konstruksionet që ai projekton garantojnë një qëndrueshmëri të lartë të objekteve në rast të aktivitetit sizmik. Studimet e tij rigoroze, veçanërisht në fushën sizmike, të përfunduara me master në Universitetin e Maqedonisë “Kiril dhe Metodi” në Shkup, një vend i njohur për rrezikshmërinë e lartë të tërmeteve, i ka avancuar me specializim në Universitetin e Lucernit në Zvicër, raporton albinfo.ch.

Ceremonia e ndarjes së çmimeve të Konkursit të Dizajnit 2025 të Komunës së Maskatit është zhvilluar të martën, nën patronazhin e Lartësisë së Tij, Sayyid Dr. Kamil Fahad al Said, Zëvendëssekretar i Përgjithshëm në Zyrën e Zëvendëskryeministrit për Këshillin e Ministrave.

E iniciuar nga Komuna e Maskatit, kjo garë ndërkombëtare synon të vendosë standarde të reja për zhvillimin urban, përmes pasurimit të peizazhit urban të qytetit, ruajtjes së trashëgimisë kulturore dhe ngritjes së profilit të Maskatit si një destinacion global i rëndësishëm.

Ngjarja ka mbledhur një grup të zgjedhur ekspertësh nga juria vlerësuese, si dhe disa CEO të kompanive të mëdha të zhvillimit të pasurive të paluajtshme në Sultanat.

Konkursi i Dizajnit të Komunës së Maskatit shërben si një platformë e rëndësishme për shkëmbimin e ideve vizionare, me pjesëmarrjen e pesë firmave ndërkombëtare të njohura të arkitekturës. Çdo firmë ka prezantuar konceptin e saj për një ndërtesë qytetare me funksione të shumëfishta, që ndërthur identitetin oman me dizajnin bashkëkohor urban global dhe përfshin teknologjitë më të avancuara të qëndrueshmërisë, raporton albinfo.ch.

albinfo.ch

lexoni po ashtu:

Me specialistin e fushës sizmike, inxhinierin e ndërtimit, Besnik Halili

Vlerësim i lartë për kompaninë „Halili + Partner“ të inxhinierit Besnik Halili

 

Aktgjykimi i Apelit të Speciales për Pjetër Shalën do të shpallet më 14 korrik

Posted on by albinfo.ch

Gjykata e Apelit në Dhomat e Specializuara të Kosovës në Hagë do të shpallë të dielën, më 14 korrik, në orën 11:30, aktgjykimin ndaj Pjetër Shalës në lidhje me apelimin e dënimit për krime lufte, raporton albinfo.ch.

Seanca do të jetë publike dhe e transmetueshme drejtpërdrejt në gjuhët shqipe, serbe dhe anglishte në faqen zyrtare të gjykatës, me një vonesë prej 10 minutash, si dhe e hapur për publikun në sallën përkatëse.

Shala ishte shpallur fajtor më 16 korrik 2023 për krime lufte, përfshirë ndalim arbitrar, torturë dhe vrasje të paligjshme, dhe ishte dënuar me 18 vjet burgim. Më 2 shtator 2024, mbrojtja e tij kishte dorëzuar apel ndaj këtij aktgjykimi, duke kundërshtuar gjetjet e gjykatës së shkallës së parë.

Sipas Prokurorisë, krimet për të cilat Shala u shpall fajtor ndodhën midis 17 majit dhe 5 qershorit 1999, në Fabrikën e Metalit në Kukës, në veri të Shqipërisë, ku ai dhe pjesëtarë të tjerë të Ushtrisë Çlirimtare të Kosovës (UÇK) dyshohet se kishin ndaluar dhe trajtuar në mënyrë çnjerëzore persona që dyshoheshin si bashkëpunëtorë të forcave serbe apo që nuk mbështesnin UÇK-në, raporton albinfo.ch.

Viktimat, që nuk kishin marrë pjesë aktive në luftime, ishin, sipas aktakuzës, rrahur me mjete të ndryshme, kërcënuar me vdekje, poshtëruar, marrë në pyetje dhe, në disa raste, ishin detyruar të japin deklarata apo informacione nën trysni.

Gjykata e shkallës së parë kishte konstatuar se Shala kishte marrë pjesë drejtpërdrejt në krime, kishte dështuar të parandalonte keqtrajtimet dhe kishte ndihmuar apo inkurajuar të tjerët në kryerjen e tyre. Në procesin gjyqësor morën pjesë tetë viktima të përfaqësuar ligjërisht, raporton albinfo.ch.

Avokati i Popullit nis hetimet për vdekjen e Agon Zejnullahut

Posted on by albinfo.ch

Institucioni i Avokatit të Popullit në Kosovë ka nisur procedurat hetimore për të vlerësuar nëse në rastin e vdekjes së 27-vjeçarit Agon Zejnullahu në Lipjan ka pasur shkelje të të drejtave të njeriut. Zejnullahu ndërroi jetë në orët e para të së hënës, pak pasi ishte arrestuar nga policia, nën dyshimet se po sulmonte automjete dhe kalimtarë, raporton albinfo.ch.

Familja e të ndjerit ka pretenduar se ai ka vdekur si pasojë e dhunës së ushtruar nga zyrtarët policorë gjatë arrestimit. Në lidhje me këtë rast, është rekomanduar suspendimi i pesë zyrtarëve të Policisë së Kosovës, të cilët janë ndaluar për 48 orë nën dyshimin për veprën penale “vrasje nga pakujdesia”.

Në një reagim zyrtar të martën, Avokati i Popullit theksoi se ushtrimi i forcës përtej asaj që është e domosdoshme përbën një shkelje të rëndë të të drejtave themelore të njeriut, të garantuara si me Kushtetutën e Republikës së Kosovës, ashtu edhe me instrumentet ndërkombëtare për të drejtat e njeriut, përfshirë Konventën Evropiane për të Drejtat e Njeriut.

“Policia ka për detyrë mbrojtjen e qytetarëve dhe ruajtjen e rendit publik, por gjithmonë në përputhje me ligjin dhe me respekt të plotë për dinjitetin njerëzor. Çdo tejkalim i autorizimeve ligjore dhe çdo formë dhune apo keqtrajtimi janë të papranueshme dhe duhet të trajtohen me përgjegjësi të plotë”, thuhet në reagimin e Avokatit të Popullit.

Institucioni ka paralajmëruar se do të monitorojë nga afër veprimet e të gjitha institucioneve përgjegjëse për rastin, përfshirë Policinë e Kosovës dhe Inspektoratin Policor të Kosovës (IPK). Njëkohësisht, Avokati i Popullit ka kërkuar transparencë të plotë nga ana e autoriteteve përgjegjëse për të siguruar që publiku dhe familjarët të informohen drejt dhe në kohë për të gjitha zhvillimet dhe gjetjet rreth rastit, raporton albinfo.ch.

Mijëra njerëz marshojnë në kujtim të viktimave të gjenocidit të Srebrenicës

Posted on by albinfo.ch

Rreth 7,000 persona janë nisur të martën në një marshim paqeje treditor përmes pyjeve të Bosnjës lindore, për të përkujtuar viktimat e masakrës së Srebrenicës të vitit 1995, gjenocidi i vetëm i njohur zyrtarisht në Evropë që nga Lufta e Dytë Botërore, shkruan AP, transmeton albinfo.ch.

Ky marshim vjetor prej 100 kilometrash ndjek rrugën e kundërt të asaj që ndoqën mijëra burra dhe djem boshnjakë myslimanë 29 vjet më parë, teksa përpiqeshin të iknin nga Srebrenica, e cila në atë kohë ishte shpallur “zonë e sigurt” nga Kombet e Bashkuara, por u pushtua nga forcat serbe të Bosnjës. Mijëra prej tyre u kapën, u ndanë nga familjet dhe u ekzekutuan në mënyrë sistematike.

Në mesin e pjesëmarrësve të këtij viti është edhe Amir Kulagić, një i mbijetuar i rrugëtimit të vitit 1995, i cili këtë herë ndodhet aty për të mbështetur të birin dhe nipin e tij. “Vështirësia ime zgjati shtatë ditë e tetë netë,” kujton Kulagić me lot në sy. Për shkak të problemeve shëndetësore, ai nuk mund t’i bashkohej marshit këtë vit, por ndjehet krenar që familja e tij po e vazhdon rrugën e kujtesës dhe rezistencës, transmeton albinfo.ch.

Ndërkohë, Nirha Music, një shtetase amerikane e lindur pas luftës nga një nënë që i mbijetoi masakrës, marshon për herë të parë. “Po ecim për të parë se çfarë ka kaluar populli ynë. Nuk është e lehtë. E vetmja gjë që mund të mendoj është se kështu ishte kur na vrisnin dhe na mblidhnin për të na vrarë,” thotë ajo.

Pjesa më e madhe e viktimave të masakrës u ndoqën nëpër pyje dhe u vranë pa mëshirë. Trupat e tyre u hodhën në varreza masive, të cilat më vonë u zhvendosën për të fshehur gjurmët e krimit. Çdo vit, më 11 korrik, dita kur nisën vrasjet, bëhet rivarrosja e viktimave të identifikuara rishtas në varrezën përkujtimore në Potocari, afër Srebrenicës.

Deri më sot janë gjetur dhe varrosur mbetjet e mbi 6,700 viktimave. Shtatë viktima të tjera të identifikuara së fundmi përmes analizave të ADN-së do të rivarrosen këtë të premte.

Masakra e Srebrenicës është shpallur gjenocid nga Gjykata Ndërkombëtare për Krime në Ish-Jugosllavi dhe Gjykata Ndërkombëtare e Drejtësisë, por mohimi dhe minimizimi i saj nga udhëheqësit serbë në Bosnje dhe Serbi vazhdon të mbetet një plagë e hapur në rajon, transmeton albinfo.ch.

Serbia tërhiqet nga Kampionati Evropian në Esports që mbahet në Prishtinë

Posted on by albinfo.ch

Ekipi i Serbisë nuk do të marrë pjesë në Kampionatin Evropian në Esports, i cili nis të mërkurën dhe përfundon të dielën në palestrën “1 Tetori” në Prishtinë. Në këtë ngjarje do të garojnë ekipe nga 25 shtete të ndryshme, por për shkak të tërheqjes së Serbisë në momentet e fundit, numri i pjesëmarrësve ka rënë në 24, raporton albinfo.ch.

Turneu përfshin lojërat elektronike më të famshme në botë, si “Counter Strike 2” dhe “Dota 2”, dhe njëkohësisht shërben si kualifikues për Kampionatin Botëror të vitit 2026.

Kryetari i Federatës së Esports të Kosovës, Altin Preniqi, e ka quajtur këtë organizim një moment historik për vendin. “Për pesë ditë Kosova do të jetë mikpritëse për Esports. Ky është një moment historik për Kosovën dhe një dëshmi për të treguar vlerat tona”, tha ai të martën në një konferencë për media.

Tërheqjen e Serbisë e konfirmoi edhe zëvendësministrja e Kulturës, Rinisë dhe Sportit, Daulina Osmani. Sipas saj, Kosova ka garantuar një ambient të sigurt dhe të barabartë për të gjithë pjesëmarrësit, por tërheqja e Serbisë është rezultat i vendimeve politike të Beogradit, raporton albinfo.ch.

“Është për të ardhur keq që institucionet e Serbisë nuk lejojnë që sportistët të marrin pjesë. Ky ka qenë vendim i politikave shtetërore të Serbisë”, tha Osmani.

Në konferencën për media morën pjesë edhe figura të rëndësishme ndërkombëtare të Esports-it, si presidenti i Federatës Evropiane të Esports (EEF), Karol Cagan, sekretari i përgjithshëm i Federatës Ndërkombëtare të Esporteve (IESF), Boban Totovski, si dhe lojtari i Kosovës, Flatron Halimi.

Ceremonia hapëse e Evropianit do të mbahet të mërkurën në orën 12:00 në palestrën “1 Tetori”, raporton albinfo.ch.

Vdekja e Agon Zejnullahut: Sveçla premton drejtësi dhe dënim për fajtorët

Posted on by albinfo.ch

Ministri në detyrë i Punëve të Brendshme, Xhelal Sveçla, ka reaguar për vdekjen tragjike të të riut Agon Zejnullahu në Lipjan, i cili ndërroi jetë në orët e para të së hënës, pak pasi ishte arrestuar nga policia. Sveçla ka garantuar se kushdo që rezulton fajtor për këtë rast do të marrë dënimin e merituar, raporton albinfo.ch.

Zejnullahu dyshohej për sulme ndaj automjeteve dhe kalimtarëve, ndërsa familjarët e tij pretendojnë se ai ka vdekur si pasojë e dhunës së ushtruar nga zyrtarët policorë gjatë arrestimit. Për këtë rast, pesë policë janë rekomanduar për suspendim dhe janë ndaluar për 48 orë, nën dyshimin për veprën penale “vrasje nga pakujdesia”.

Në një reagim publik të martën, ministri Sveçla tha se hetimet për rastin janë duke u zhvilluar me intensitet të lartë dhe se bashkëpunimi ndërinstitucional është kyç për zbardhjen e së vërtetës.

“Familjarëve të të ndjerit u shpreh ngushëllimet e mia më të sinqerta. Pres që sa më shpejt të zbardhet e vërteta dhe të gjitha rrethanat e rastit, ndërsa familjarët dhe opinioni publik të njoftohen me të gjitha të gjeturat dhe epilogun”, ka shkruar Sveçla në Facebook.

Ai theksoi se askush nuk është mbi ligjin dhe se drejtësia do të vihet në vend. “Kushdo që rezulton fajtor do të përballet me drejtësinë dhe do të marrë dënimin e merituar.”

Sveçla gjithashtu u ndal te imazhi dhe roli i Policisë së Kosovës, duke e vlerësuar atë si institucionin më të besuar dhe më kredibil në vend. Ai shtoi se ky besim duhet ruajtur me çdo kusht, raporton albinfo.ch.

Çmimet e pronave të banimit në Zvicër vazhdojnë të rriten

Posted on by Drin Reçica

Çmimet e pronave të banimit në Zvicër vazhdojnë të rriten. Shtëpitë njëfamiljare dhe apartamentet janë bërë rreth 5 për qind më të shtrenjta brenda 12 muajve, sipas një indeksi të Raiffeisen. Rritjet janë veçanërisht të ndjeshme në Ticino, përcjell albinfo.ch.

Shifrat e fundit tregojnë se çmimet e banesave të banuara nga pronarët u rritën përsëri ndjeshëm në tremujorin e dytë të vitit 2025, sipas indeksit të çmimeve të transaksioneve të publikuar nga Raiffeisen Zvicër të martën.

Konkretisht, shtëpitë njëfamiljare kushtuan 1.5 për qind më shumë se në tremujorin e mëparshëm. Apartamentet u bënë 1.8 për qind më të shtrenjta. Krahasuar me tremujorin e dytë të vitit 2024, shtëpitë njëfamiljare kushtuan plot 5.2 për qind më shumë.

Zvicra jugore dhe Zvicra qendrore në krye
Shtëpitë njëfamiljare në Zvicrën jugore (+7.2 për qind) dhe Zvicrën qendrore (+7.0 për qind) regjistruan rritjet më të forta të çmimeve nga viti në vit, sipas Raiffeisen. Ndërkohë, në Zvicrën perëndimore (+2.1 për qind) dhe rreth Liqenit të Gjenevës (+0.2 për qind), çmimet e shtëpive u rritën vetëm pak.

https://www.blick.ch/wirtschaft/besonders-in-zwei-regionen-die-haeuserpreise-steigen-weiter-stark-an-id21031860.html

Mbi 207 mijë banesa të blera, të pabanuara në Kosovë

Posted on by Drin Reçica

Agjencia e Statistikave të Kosovës (ASK) ka publikuar raportin me të dhëna të detajuara për banesat dhe ndërtesat sipas komunave, në kuadër të Regjistrimit të Popullsisë, Ekonomive Familjare dhe Banesave 2024, përcjell albinfo.ch.

Ky publikim ofron një pasqyrë gjithëpërfshirëse mbi strukturën e banesave në nivel kombëtar dhe komunal, duke përfshirë tregues të rëndësishëm që ndihmojnë në analizimin e zhvillimeve në sektorin e banimit dhe planifikimin urban.

Sipas të dhënave të publikuara, në Kosovë janë regjistruar gjithsej 581,095 banesa, nga të cilat 356,959 janë të banuara nga një ose më shumë banorë.

Ndërkohë, 207,165 banesa, që përbëjnë 35.7 për qind të totalit, rezultojnë të pabanuara, duke përfshirë ato të destinuara për shitje, dhënie me qira apo përdorime të tjera.

Raporti përfshin informacione të detajuara për:

  • Numrin e përgjithshëm të banesave sipas komunave

  • Shpërndarjen e banesave në vendbanime urbane dhe rurale

  • Klasifikimin e banesave në të banuara dhe të pabanuara

  • Llojin e furnizimit me ujë

  • Llojin e sistemit të shkarkimit të ujërave të zeza

  • Mënyrat e ngrohjes në banesa

  • Numrin e dhomave në banesat e zakonshme

ASK thotë se këto të dhëna janë një burim i rëndësishëm për politikat zhvillimore, si dhe për hartimin e strategjive për përmirësimin e kushteve të banimit dhe menaxhimin e qëndrueshëm të hapësirës.

Analiza e shpërndarjes së banesave të banuara dhe të pabanuara shërben gjithashtu për të kuptuar trendët e zhvillimit urban dhe rural, duke ndihmuar komunat në planifikimin e nevojave të ardhshme për infrastrukturë dhe shërbime publike.

Kos: Serbia në situatë të vështirë, çështja e Kosovës të zgjidhet

Posted on by Drin Reçica

Serbia është në një situatë shumë të vështirë dhe ne, Bashkimi Evropian, e mbështesim fuqimisht rrugën evropiane të saj dhe popullit serb, përcjell albinfo.ch.

Kështu ka deklaruar në një intervistë për Deutsche Welle, Marta Kos, Komisionere e BE-së për Zgjerim në lidhje me protestat në Serbi.

Ajo thekson se megjithëse Serbia ka qenë vend kandidat për shumë vite, ajo ende nuk i ka zbatuar të gjitha reformat.

“Kjo është arsyeja pse ne i ndihmojmë ata të zbatojnë këto reforma”, shtoi Kos.

Kur bëhet fjalë për çështjen e Kosovës si kusht për t’u bashkuar me BE-në, Marta Kos thekson: “Gjithmonë më pëlqen të them se kur një vend vendos për rrugën drejt BE-së, kjo vjen me detyrime dhe përgjegjësi. Është çështje zgjedhjeje. Prandaj, askush nuk po e detyron Serbinë. Por kur thua: “Po, ne duam të bëhemi anëtar i BE-së” , atëherë duhet të bëhet. Shumë gjëra duhet të bëhen”.

Kurti e quan rekord të ri: Sivjet kemi mbi 21 mijë hektarë më shumë të mbjella me grurë

Posted on by Drin Reçica

Kosova sivjet ka mbi 21 mijë hektarë më shumë të mbjella me grurë sesa vitin e kaluar, përcjell albinfo.ch.

Kështu tha kryeministri i vendit, Albin Kurti përmes një postimi në rrjetin social në Facebook duke e quajtur sukses dhe rekord të ri në vend.

Ai tutje tha se sot me ministrin në detyrë të Bujqësisë, Faton Pecin u rikthyen në fshatin Sopijë të Therandës.

“Aty na mirëpriti fermeri Xhemë Beqiraj që ka të mbjellë 25 hektarë grurë. Me punën e zellin e tij, dhe me mbështetjen që e ka marrë nga shteti përmes subvencioneve dhe granteve, tokën që për një kohë të gjatë ishte djerrinë, e ka kthyer në fushë të artë me grurë, që nesër të jetë bukë në sofrën tonë. E përveç grurit ka edhe mbi 11 hektarë të mbjellë me bostan e pjepër”, ka shkruar Kurti.

Diskutim lidhur mbi publikimin e kombësisë për shkelësit në Zvicër

Posted on by Drin Reçica

Disa kantone tashmë e zbulojnë rregullisht kombësinë e të dyshuarve, përfshirë raporet policore, gazetareske, etj, përcjell albinfo.ch.

Megjithatë, Komiteti i Çështjeve Ligjore i Këshillit Kombëtar nuk dëshiron të ndjekë një mocion parlamentar i cili kërkon të detyrojë policinë të informojë publikun për kombësinë e kryesit të veprës penale, së bashku me detajet e zakonshme si mosha dhe gjinia.

Duke mos ndjekur këtë mocion, deputetët hedhin poshtë argumentin e propozuesve se meqenëse të huajt janë të mbipërfaqësuar midis shkelësve, publiku ka të drejtë të dijë se kush kryen krime në komunitetin e tyre.

Këshilli Kombëtar do ta debatojë më tej këtë çështje gjatë sesionit të vjeshtës të parlamentit.

Trump vendosi 35% taksa doganore shtesë për Serbinë

Posted on by Drin Reçica

Të hënën, presidenti amerikan Donald Trump shpalli vendosjen e taksave doganore për importet nga Serbia në masën 35 për qind dhe nga Bosnja e Hercegovina në masën 30 për qind, përcjell albinfo.ch.

Bëhet fjalë për “masa të vonuara doganore”, reciproke, të shpallura fillimisht në muajin prill.

Masat e reja për Serbinë dhe një numër të madh shtetesh të tjera do të hyjnë në fuqi më 1 gusht.

Trump e ka informuar presidentin e Serbisë, Aleksandar Vuçiq, si dhe udhëheqës të tjerë botërorë përmes një letre, se SHBA-të do të vendosin taksa shtesë prej 35 për qind për importet nga Serbia duke filluar nga 1 gushti, raporton NOVA.

Letrën që ua ka dërguar Vuçiqit dhe liderëve të tjerë, Trump e publikoi në rrjetin e tij social, Truth Social.

Presidenti amerikan deklaroi se “është nder i madh” për të të dërgojë një letër që, sipas tij, “tregon përkushtimin ndaj marrëdhënieve tregtare mes SHBA-së dhe Serbisë, si dhe faktin që SHBA-të janë të gatshme të vazhdojnë bashkëpunimin me Serbinë, pavarësisht deficitit të madh tregtar mes dy vendeve.”

Ai shtoi se nuk do të ketë taksa nëse Serbia apo kompanitë serbe vendosin të prodhojnë në SHBA, ndërsa paralajmëroi se do të ketë rritje të mëtejshme të taksave nëse Beogradi vendos të përgjigjet me masa të ngjashme ndaj importeve amerikane.

Trump gjithashtu shpalli taksa prej 25 për qind për Japoninë, Korenë e Jugut, Malajzinë dhe Kazakistanin, 30 për qind për Afrikën e Jugut, 32 për qind për Indonezinë, 35 për qind për Bangladeshin, 36 për qind për Kamboxhën dhe Tajlandën, si dhe 40 për qind për Laosin dhe Mianmarin.

Ministri i Bujqësisë: Kosova ka prodhuar mbi 56 milionë euro në vlerë gruri këtë vit

Posted on by Drin Reçica

Ministri në detyrë i Bujqësisë, Faton Peci, ka thënë se Kosova ka arritur një rekord të ri në sektorin e bujqësisë, me mbi 74 mijë hektarë të mbjellura me grurë në nivel vendi për këtë vit, përcjell albinfo.ch.

Përmes një video-adresimi në Facebook, rrugës për në Suharekë ku së bashku me kryeministrin në detyrë Albin Kurti nisën zyrtarisht fushatën e korrje-shirjeve, Peci theksoi rëndësinë e këtij rezultati.

“Vitin e kaluar shënuam rekord të të mbjellurave dhe rendimentit dhe siguruam bukën e motmotit. Këtë vit kemi thyer një rekord të ri. Janë mbi 21 mijë hektarë më shumë të mbjellura me grurë sesa vitin paraprak”, ka deklaruar ai.

Ministri në detyrë ka shtuar se kjo rritje ka ndikim të drejtpërdrejtë në ekonominë vendore.

Sipas tij, me një mesatare minimale të prodhimit, Kosova ka prodhuar mbi 56 milionë euro në vlerë gruri këtë vit.

“Mbi 74 mijë hektarë të mbjellura janë një rekord i ri në sektorin e bujqësisë”, ka theksuar Peci.

Ky supermarket po mbyll 25 degët e tij në Zvicër

Posted on by Drin Reçica

Alnatura po mbyll supermarketet e saj në Zvicër. Të 25 dyqanet do të mbyllen deri në fund të vitit 2025, përcjell albinfo.ch.

Shitësi me pakicë i ushqimeve organike nuk mundi të gjente një franchisemarrës të ri pasi Migros u tërhoq.

Sipas Alnatura, të gjithë 260 punonjësit e shitjeve të prekur do të marrin një ofertë alternative pune.

Ky vendim vjen pas njoftimit nga kooperativa Migros Zurich në shkurt se nuk do ta rinovonte marrëveshjen e franchising-ut me Alnatura, e cila kishte qenë në fuqi që nga viti 2012.

Për më shumë –

Studimi i ri mbi emigrantët në Zvicër

Posted on by Drin Reçica

Një ekip kërkimor nga Instituti Federal Zviceran i Teknologjisë në Lozanë (EPFL) dhe Universiteti i Gjenevës analizoi të dhëna që përfshinin miliona të dhëna nga regjistrimet e popullsisë, regjistrat e popullsisë dhe sistemi qendror i informacionit për migracionin i Zvicrës, për të zbuluar se si ka ndryshuar profili i emigrantëve me kalimin e viteve, përcjell albinfo.ch.

Ata zbuluan se perceptimi publik për emigrantët është formuar nga imazhi i vjetëruar i viteve 1990, kur shumë azilkërkues nga Ballkani, kryesisht myslimanë, erdhën në Zvicër me qëllim që të qëndronin përgjithmonë.

Megjithatë, ky imazh nuk pasqyron më realitetin e sotëm.

“Shumica e emigrantëve vijnë këtu për të ndjekur një arsimim ose për të ndjekur një mundësi karriere, por gjysma largohen nga vendi pas pesë deri në dhjetë vjetësh”, ka thënë Mathias Lerch i EPFL-së, autori kryesor i studimit.

Për më shumë – https://www.srf.ch/news/schweiz/migration-wahrnehmung-von-immigranten-in-der-schweiz-laut-studie-veraltet