Procesi i numërimit të votave po shkon drejt fundit.

Teksa ka përfunduar numërimi i votave nga përfaqësitë diplomatike dhe ato me postë, numërimi i votave me kusht është drejt përmbylljes ku deri tani janë procesuar rezultatet e numërimit të mbi 73% të këtyre votave në platformën e KQZ-së, përcjell albinfo.ch.

Komisioni Qendror i Zgjedhjeve ka filluar publikimin e listës së kandidatëve për deputetë të cilët kanë arritur të fitojnë ulëse në legjislaturën e 10-të të Kuvendit të Kosovës.

Nga Lidhja Demokratike e Kosovës e cila deri tani ka fituar 14 mandate sipas KQZ-së, ulëse kanë arritur të fitojnë: Lumir Abdixhiku, Hykmete Bajrami, Ukë Rugova, Avdullah Hoti, Doarsa Kica Xhelili, Kujtim Shala, Anton Quni, Armend Zemaj, Lutfi Haziri, Jehona Lushaku Sadriu, Janina Ymeri, Besian Mustafa, Adelina Thaqi Meta, Ermal Sadiku.

Kujtojmë që procesit të numërimit do t’i nënshtrohen edhe votat e personave me nevoja të veçanta.

Komisioni Qendror i Zgjedhjeve ka publikuar emrat e deputetëve të secilës parti që do të jenë pjesë e Kuvendit të Kosovës nga zgjedhjet e 28 dhjetorit, përcjell albinfo.ch.

Partinë Demokratike të Kosovës do ta përfaqësojnë 23 deputetë, bazuar në rezultatet e deritanishme të KQ-së, nga Bedri Hamza deri te Arbnora Salihu.

Komisioni Qendror i Zgjedhjeve (KQZ) ka publikuar në faqen e tij zyrtare listën e kandidatëve për deputetë të zgjedhur për mandatin e ri nga Lëvizja Vetëvendosje, transmeton albinfo.ch.

Më poshtë mund t’i gjeni emrat e secilit deputet dhe votat që kanë marrë.

Kryetari i Partisë për Liri, Drejtësi dhe Mbijetesë, Nenad Rashiq, ka konfirmuar se, bazuar në rezultatet e deritanishme zgjedhore, ka siguruar një ulëse në Kuvendin e Kosovës, përcjell albinfo.ch.

Me këtë rast, Rashiq ka deklaruar se është i gatshëm ta votojë Qeverinë “Kurti 3”, por ka theksuar se paraprakisht kërkon një takim me kryeministrin Albin Kurti, në të cilin do të sqarohen disa çështje.

“Besoj se kemi siguruar një mandat, pasi diferenca e votave është e madhe dhe nuk jemi në rrezik sa i përket mandatit. Është një mandat i vetëm, por i vlefshëm. Kam pasur përvoja të mira bashkëpunimi me zotin Kurti. Ende nuk kemi zhvilluar biseda konkrete për bashkëpunim, por jam i bindur se në ditët në vijim do të takohemi dhe do të diskutojmë”, ka deklaruar Rashiq.

Ai ka shtuar se është i hapur për bashkëpunim dhe nuk sheh pengesa për vazhdimin e tij, duke theksuar se nuk ka kushte për ta votuar Qeverinë Kurti 3, por kërkesa për disa korrigjime teknike.

“Nuk kemi kushte, por ka nevojë për disa përmirësime teknike për një qeverisje më të mirë në interes të qytetarëve serbë. Kushtetuta përcakton qartë se një ministri duhet të udhëhiqet nga një ministër serb dhe të gjitha rrethanat po na drejtojnë drejt bashkëpunimit. Në këtë moment nuk shoh asnjë pengesë për ta vazhduar bashkëpunimin”, ka theksuar ai.

Rashiq ka lënë të hapur edhe mundësinë e rizgjedhjes së tij si nënkryetar i Kuvendit, por ka bërë të ditur se fillimisht po pret vendimin e Gjykatës Kushtetuese, e cila duhet të sqarojë nëse posti i nënkryetarit të Kuvendit nga komuniteti serb i takon Listës Serbe, si shumicë parlamentare, apo nëse ky post mund t’i takojë atij.

Kryetarja e “Alternativës”, Mimoza Kusari-Lila, e ka quajtur si lajmë të rremë, raportimin e gazetës zvicerane NZZ, në të cilin përmenden takime të fshehta në Solothurn të Zvicrës, përfshirë edhe zv.kryeministrin Besnik Bislimi dhe kryediplomatin serb, Marko Gjuriq, përcjell albinfo.ch.

“Lajm i rremë në NZZ, lajm i rremë në disa platforma kosovare. Zelli për shpërndarjen e lajmeve të rreme mbetet i njëjtë, përkundër fakteve të qarta që e demantojnë plotësisht këtë narrativë. Kjo nuk është gazetari është papërgjegjësi”, ka shkruar ajo.

Një ndryshim i papritur ka ndodhur në fund të procesit të numërimit të votave nga zgjedhjet e 28 dhjetorit. Partia Demokratike e Kosovës (PDK) ka rikthyer ulësen e 23-të në Kuvend, duke e “rrëmbyer” atë nga Lidhja Demokratike e Kosovës (LDK), e cila tani ka rënë në 14 mandate nga 15 sa kishte sipas rezultateve preliminare.

Lëvizja Vetëvendosje (LVV), fituese e zgjedhjeve, ka arritur në 57 ulëse në Kuvend, duke i marrë një mandat PDK-së, e cila sipas rezultateve të mëparshme kishte 23. Me këto llogaritje të fundit, në Kuvend rikthehet Bekim Haxhiu nga PDK-ja.

Nga ana tjetër, LDK-ja humb një ulëse, të cilën e ka humbur Fadil Hadërgjonaj.

Aleanca për Ardhmërinë e Kosovës ka siguruar gjithsej 6 ulëse në Kuvend.

Gazeta zvicerane Neue Zürcher Zeitung (NZZ) ka publikuar sot një artikull në të cilin pretendon se shteti zviceran ka organizuar takime joformale ndërmjet përfaqësuesve të Kosovës dhe Serbisë, përcjell albinfo.ch.

Sipas gazetës zvicerane, në këto takime thuhet se kanë marrë pjesë zëvendëskryeministri i Kosovës dhe njëherësh kryenegociatori për dialogun, Besnik Bislimi, si dhe kryediplomati serb, Marko Gjuriq.

Ndaj këtij raportimi ka reaguar Qeveria në detyrë e Kosovës, e cila ka mohuar kategorikisht se Bislimi ka pasur ndonjë takim me Gjuriqin në Zvicër.

“Zëvendëskryeministri Besnik Bislimi nuk ka pasur asnjë takim në Zvicër me Marko Gjuriq dhe kurrë nuk e ka takuar atë”, thuhet në reagimin e Qeverisë.

Në reagimin e plotë, Qeveria në detyrë sqaron se procesi i dialogut mes Kosovës dhe Serbisë është i gjerë dhe përfshin një numër të madh akterësh ndërmjetësues. Krahas Bashkimit Evropian, edhe vende partnere e mike, si Zvicra, organizojnë iniciativa të ndryshme ndërmjetësimi përmes Departamentit Federal të Punëve të Jashtme.

Sipas reagimit, Zvicra çdo vit organizon takime me përfaqësues të shoqërisë civile, ekspertë, politikanë dhe zyrtarë qeveritarë nga të dyja shtetet, për çka Qeveria e Kosovës ka shprehur mirënjohje për angazhimin dhe përkushtimin e saj.

Megjithatë, theksohet se këto takime nuk janë “të fshehta” dhe se zëvendëskryeministri i parë Besnik Bislimi, në cilësinë e kryenegociatorit, nuk ka zhvilluar takime të tilla, e aq më pak me Marko Gjuriqin.

“Në njërin nga këto takime në Zvicër, zëvendëskryeministri Bislimi ka qenë i ftuar si folës, por në atë takim nuk ka qenë i pranishëm Marko Gjuriq. Pra, zëvendëskryeministri Besnik Bislimi nuk ka pasur asnjë takim në Zvicër me Marko Gjuriq dhe kurrë nuk e ka takuar atë”, përfundon reagimi.

Komisioni Qendror i Zgjedhjeve po vazhdon me publikimin e rezultateve nga numërimi i votave me kusht në kuadër të zgjedhjeve të parakohshme për Kuvendin e Republikës së Kosovës 2025, përcjell albinfo.ch.

Referuar të dhënave të përditësuara deri më tani nga 31 vendvotime të numëruara nga 57 gjithsej (54.39%), Lëvizja Vetëvendosje kryeson me 49.06% të votave, që përkthehet në 2,086 vota.

Në vendin e dytë renditet Partia Demokratike e Kosovës (PDK) me 19.29% ose 820 vota, ndërsa e treta është Lidhja Demokratike e Kosovës (LDK) me 11.08% (471 vota).

Aleanca për Ardhmërinë e Kosovës renditet e katërta me 7.62% (324 vota)

KQZ ka bërë të ditur se procesi i numërimit po vazhdon dhe se rezultatet përfundimtare do të publikohen pas përfundimit të numërimit të të gjitha vendvotimeve dhe verifikimeve përkatëse.

Agjencia Kundër Korrupsionit ka nisur procedurën zyrtare të verifikimit të pasurisë së Presidentes së Kosovës,Vjosa Osmani, përcjell albinfo.ch.

Kjo pasi Agjencia ka gjetur dallime të theksuara në deklarimin e saj të pasurisë ndërmjet viteve 2024 dhe 2025.

Burime brenda këtij institucioni kanë konfirmuar për VOX Kosova se procedura ka nisur pasi janë vërejtur dallime në sasinë e pasurisë që presidentja kishte deklaruar në formularët e deklarimit të pasurisë për zyrtarët publikë.

Ndryshimet lidhen kryesisht me rritjen e kursimeve, si dhe me shtimin e shumës së parave të gatshme të deklaruara.

Në dokumentet e dorëzuara për vitin 2025 vërehen lëvizje të konsiderueshme krahasuar me një vit më parë, çka ka nxitur institucionin përgjegjës të ndërmarrë verifikime shtesë, ashtu siç parashihet me ligj.

Osmani, e cila shpesh përmendet në opinionin publik për standardin e saj të jetesës, ka blerë një shtëpi në një lagje luksoze në periferi të Prishtinës.

Por ajo ka edhe shumë patundshmëri të tjera, siç janë pronat në Australi, ku vetëm një shtëpi figuron me vlerë mbi gjysmë milioni euro.

Po ashtu, vitin e kaluar, në deklarimin e pasurisë, ajo ka deklaruar se bashkë me bashkëshortin posedojnë edhe një banesë në Prishtinë, si dhe tokë dhe një shtëpi tjetër në Australi.

Ndërkohë, Bekim Kupina, këshilltari i Osmanit, e mirëpresin çfarëdo verifikimi.

“Presidentja Osmani mirëpret çfarëdo verifikimi nga cilido institucion, që është i bazuar në pavarësi, paanshmëri, integritet, ligj dhe fakte të vërteta, por jo në fushata njollosjesh, të cilat dihet mirëfilli pse po ndodhi.”, tha KupinaPas raportimeve se Agjencia Kundër Korrupsionit ka nisur procedurën zyrtare të verifikimit të pasurisë së Presidentes së Kosovës, Vjosa Osmani, nga Presidenca për rtv21.tv kanë bërë të ditur se nuk kanë informacione të tilla.

Procesi i numërimit të votave po vazhdon edhe sot, përfshirë votat me kusht, ndërsa Lëvizja Vetëvendosje vazhdon të kryesojë me përqindjen më të lartë të votave, 50.67 për qind.

Sipas të dhënave të deritanishme, kryeministri dhe lideri i VV-së, Albin Kurti, ka arritur të marrë 386,953 vota, duke u renditur bindshëm si kandidati më i votuar në këto zgjedhje.

Përveç Kurtit, Albinfo.ch sjell edhe pesë kandidatët më të votuar nga radhët e Lëvizjes Vetëvendosje:

• Glauk Konjufca – 303,733 vota

• Albulena Haxhiu – 164,604 vota

• Hekuran Murati – 162,576 vota

• Donika Gërvalla-Schwarz – 145,567 vota

Rezultatet përfundimtare pritet të konfirmohen pas përmbylljes së plotë të procesit të numërimit, përfshirë votat me kusht dhe ato nga diaspora, por trendi aktual tregon një epërsi të qartë të Lëvizjes Vetëvendosje dhe të liderit të saj, Albin Kurti./Albinfo.ch 

Reshjet e dendura të shiut që kanë rënë gjatë natës kanë shkaktuar vërshime në disa pjesë të Kosovës, përcjell albinfo.ch.

Në kryeqytet disa rrugë janë mbushur me ujë duke e bërë të vështirë qarkullimin e automjeteve.

Në Skenderaj, kryetari i Komunës, Sami Lushtaku ka shkruar se reshjet e natës së mbrëmshme të cilat po vazhdojnë edhe sot kanë sjellë vërshime në disa zona, duke shkaktuar vështirësi për një numër familjesh.

“Ekipet emergjente të zjarrfikësve që nga mesnata janë të angazhuara në terren dhe po përcjellin situatën me kujdes të shtuar. Në bashkëpunim me të gjitha ekipet e emergjencave në kuadër të komunës, do të vazhdojmë të jemi pranë qytetarëve për tu përballur së bashku me këtë situate”, ka shkruar ai në Facebook.

Ndërkaq Kompania Rajonale e Ujësjellësit “Mitrovica” ka njoftuar për ndërprerje të furnizimit me ujë për shkak të rritjes së turbullueshmërisë në kanalin e Ibër-Lepencit.

Kjo ndërmarrje ka thënë se është e detyruar ta ndërpresë ujin dhe se masa merret me qëllim të garantimit të sigurisë dhe cilësisë së ujit të pijes.

“Ekipet tona teknike janë në terren dhe po monitorojnë vazhdimisht gjendjen. Furnizimi me ujë do të rikthehet menjëherë pas normalizimit të nivelit të turbulleshmërisë dhe krijimit të kushteve të sigurta për distribuim”, thuhet në njoftimin e të martës në mëngjes.

Edhe në Malishevë për shkak të reshjeve të dendura është vërshuar parkingu nëntokësor, pak ditë pas përurimit të tij.

Në anën tjetër, Instituti Hidrometeorologjik i Kosovës ka njoftuar se nga datat 3-5 janar, në pjesën perëndimore të Kosovës, janë regjistruar reshje të konsiderueshme të shiut, të cilat kanë ndikuar dukshëm në rritjen e niveleve dhe prurjeve të ujit.

Tutje ka njoftuar se kryesisht bëhet fjalë për lumenjtë që rrjedhin nga Alpet Shqiptare dhe si pasojë, mund të kenë dalë nga shtretërit e tyre.

Numërimi i votave me kusht dhe i votave të personave me nevoja të veçanta ka nisur të hënën në Qendrën e Numërimit dhe Rezultateve (QNR), përcjell albinfo.ch.

Kjo fazë është pjesë e përpunimit të fundit të rezultateve të zgjedhjeve të parakohshme për Kuvendin e Republikës së Kosovës të mbajtura më 28 dhjetor 2025.

Sipas të dhënave të publikuara në platformën zyrtare të KQZ-së, deri në momentin e përditësimit janë numëruar 18 nga 57 vendvotime, apo 31.58% e totalit të votave me kusht.

Deri tani Lëvizja Vetëvendosje (LVV) kryeson bindshëm me 49.81% (1,313 vota). Pas saj renditet Partia Demokratike e Kosovës (PDK) me 20.45% (539 vota).

E treta është Lidhja Demokratike e Kosovës (LDK) me 11.65% (307 vota) dhe Aleanca për Ardhmërinë e Kosovës (AAK) – 8.95% (236 vota).