Archives

FFK bën thirrje për mbështetje në ndeshjen ndaj Zvicrës

Posted on by BR

Po vazhdon shitja online e biletave për sektorin e tifozëve të Kosovës për ndeshjen kualifikuese për Kupën e Botës 2026: Zvicër – Kosovë, që zhvillohet më 5 shtator në Bazel.

Ende ke mundësi ta sigurosh vendin tënd në stadiumin “St.Jakob Park”.

Mos e humb rastin, eja dhe mbështete Kombëtaren dardane nga afër, thuhet në njoftimin e FFK-së, transmeton albinfo.ch.

Ndeshja Zvicër-Kosovë zhvillohet në Bazel më 5 shtator në kuadër të kualifikimeve për Kupën e Botës 2025.

Biletat mund t’i blini në këtë link:

https://www.ticketmaster.ch/event/1761027560?CL_ORIGIN=ORIGIN25&language=en-us&fbclid=IwY2xjawMlS_VleHRuA2FlbQIxMABicmlkETE5ZlpRVGdPNFdxY3FEUE1sAR4OBFRaSGzTM7iBkKYYfP2zw62RM7L0fW6I32kMSU7gtCo273MDiieW65hnJw_aem_XpBVY5Z0TFmN4PsXmdoReA

Caktohen gjyqtarët e ndeshjes Zvicra-Kosova

Posted on by BR

UEFA i ka caktuar gjyqtarët që do ta drejtojnë ndeshjen mes Zvicrës dhe Kosovës, e cila do të luhet të premten mbrëma në Bazel, e vlefshme për kualifikimet e Botërorit 2026.

Szymon Marciniak do të jetë gjyqtari kryesor i ndeshjes, ndërsa gjyqtari i njohur polak do të asistohet nga bashkëvendësit Tomasz Listkeiewicz e Adam Kupsik.

Gjyqtari i katërt do të jetë Pawel Raczkowski, kurse video-asistent do të jetë Tomasz Kwiatkoëski dhe asistent i video-asistent, Woijciech Myc, po ashtu të gjithë nga Polonia.

Marciniak ka përvojë të madhe ndërkombëtare, duke qenë gjyqtar edhe në finalen e Kupës së Botës mes Argjentinës dhe Francës, si dhe finalen e Ligës së Kampionëve ndërmjet Manchester Cityt dhe Interit.

Më pak makina rreth stacionit kryesor të trenit, në Cyrih

Posted on by albinfo.ch

Në të ardhmen, do të ketë dukshëm më pak makina rreth stacionit kryesor të trenit të Cyrihut, dhe zona do të bëhet gjithashtu më e gjelbër. Ky është një propozim nga qeveria e qytetit të Cyrihut, e cila ka paraqitur planet përkatëse në këtë drejtim, transmeton albinfo.ch.

Për shembull, në planin e saj, qeveria propozon hapësira të gjelbra dhe më shumë hapësirë ​​për këmbësorët dhe çiklistët, shkruan srf.ch. Dhe kushdo që dëshiron të ngasë makinën nga njëra anë e Cyrihut në tjetrën nuk do të duhet më të kalojë me makinën e tij pranë stacionit kryesor të trenit.

Pse janë të nevojshme këto masa? Sipas autoriteteve, zona përreth Stacionit Kryesor të Cyrihut ka mangësi të konsiderueshme. Çiklistët dhe këmbësorët kanë pak hapësirë ​​për të arritur në mënyrë të sigurt në tren ose në lagjen fqinje. Gjithashtu, ka mungesë vendesh për të pushuar. Prandaj, zona duhet të “përshtatet” urgjentisht.

Propozimet e paraqitura të mërkurën nuk janë ende ligjërisht të detyrueshme. Megjithatë, ato synojnë të shërbejnë si bazë për planifikim të mëtejshëm.

Shkrimtari shqiptar nga Austria prezanton në Kosovë romanin “Shpirti i plagosur”

Posted on by BR

Ky roman është një trilog që vazhdon udhëtimin e nisur me romanin „Rrënjët e Kujtesës“ për të vazhduar pastaj me romanin: „Dëshirë e djegur“.

Safet Gërxhaliu, që ishte edhe panelist i ngjarjes, foli për biografinë e autorit, duke e vendosur në kontekst jetën brenda dhe veprimtarinë e tij në mërgim, transmeton albinfo.ch.

Ai nënvizoi se përvoja personale e Ramiz Selimit dhe përpjekjet e tij për të ruajtur identitetin dhe kulturën shqiptare janë elemente thelbësore që japin ngjyra dhe thellësi rrëfimit të Dardanit në roman.

“Sikur të ishim në nivelin e duhur, me këto romane duhej të merrej kinematografia, sepse skenarin e kanë të gatshëm. Ramiz Selimi ka ditur të sjellë në letër jo vetëm një histori, por edhe emocionin e përjetuar nga një brez i tërë shqiptarësh”, tha Gërxhaliu.

Për romanin folën recensentët Salih Bashota, gazetari, publicisti dhe shkrimtari, Prend Buzhala, si dhe shkrimtari dhe Vilson Culaj, të cilët ishin panelistët e ngjarjes dhe recensentë të librit.

Bashota theksoi: “Ky roman nuk është vetëm rrëfim personal, por edhe një reflektim mbi gjendjen e atëhershme në shoqërisë shqiptare dhe sfidat e saj historike. Romani “Shpirt i plagosur” e fut lexuesin menjëherë në një situatë dramatike, shpirtërore dhe psikologjike të thellë, ku protagonistët, Dardani dhe nëna e tij, Rina, janë të preokupuar me përballimin e pasojave të një viti të tmerrshëm. Ai tha se romani lexohet me një frymë.

Ndërsa Prend Buzhala shtoi: “Shpirti i plagosur na ofron një udhëtim emocional, ku dhimbja dhe shpresa ndërthuren në mënyrë të jashtëzakonshme. Rrëfimi është një përzierje e realizmit të hidhur dhe elementëve epikë, ku ngjarjet dhe veprimet zhvillohen në një kontekst të gjerë historik dhe politik. Edhe pse ngjarjet janë të shtrira dhe të lidhura me realitetin e dhunshëm dhe të pasigurt, elementi epik bëhet i dukshëm përmes qëllimeve të mëdha, ideve të larta dhe sakrificës që kërkohet për t’i arritur ato.

Vilson Culaj e përfundoi analizën duke thënë: “ Dikur Rolan Rolan thoshte :,,Romani është një ankth i përjetshëm deri në vdekje nëse nuk e ke përfunduar‘’.

Lidhur me këtë kontest që në fillim mund të themi se emri dhe përkushtimi i Ramiz Selimit në këtë zeje letrare është i madh dhe me sfida, por edhe i suksesshëm. Emri i tij në letërsinë shqiptare po zë vend krejt natyrshëm, triumfalisht dhe pa imponime e ekspozime patetike. Përmasa e rrëfimit në këtë roman ka tri dimensione personale, familjare dhe nacionale. Ky roman është çlirimi nga vuajtja e individit i cili është peng i robërisë nacionale, varfërisë, dhe mungesës së prestigjit në rrethin se ku jeton.

Një dimension të veçantë i promovimit ishte leximi i fragmenteve nga romani nga gazetarja nga Shqipëria, Mimoza Abrazhda, e cila i dha zë dhe emocione rrëfimit të autorit, duke e bërë përvojën letrare edhe më të prekshme për audiencën.

Ngjarja u pasurua me pikat muzikore të këngëtarit me zë të mrekullueshëm Shaban Krasniqi, i shoqëruar nga pianoja e Nashid Drejtës, duke krijuar momente të ndjeshme që lidhnin fjalën e shkruar me emocionin e tingullit.

Në fund, fjala iu dha autorit Ramiz Selimi, i cili falënderoi panelistët dhe të gjithë të pranishmit për nderimin që i bënë veprës së tij. Ramiz Selimi theksoi se rrëfimi i Dardanit nuk ka marrë fund, Shpirti i plagosur ishte vetëm një stacion i rëndësishëm, por jo i fundit, sepse historia e Dardanit do të vazhdojë edhe më tej në romanin e ardhshëm, që tashmë është në përgatitje dhe mban titullin “Hijet e Shpresës”.

Ai tha: „Romani „Hijet e shpresës“ tani më është redaktuar dhe gjendet në përpunim, sipas redaktores, libri i radhës do të jetë kryevepra e romaneve të mia.

” Libri pritet të dalë në dritë në fillim të vitit të ardhshëm. Vlen të theksohet se një grup i dashamirëve të librit nga Vushtrria në krye me Selim Izmakun e zbukuruan ngjarjen, prezent ishin edhe shkrimtarë të njohur si Xhemë Karadaku, Sherife Thaqi, Syhejl Havolli, Bekim Kelmendi, Shaqir Foniqi, Izet Avdyli, ish Ministri Ibrahim Makolli, nga Gjermania, Imer Llladrovci, pastaj gazetari Idriz Zeqiraj, dhe shumë tjerë.

Promovimi u përmbyll me një koktej rasti, të përgatitur nga familja e autorit, duke lënë të pranishmit një kujtim të veçantë të kësaj ngjarjeje letrare dhe artistike.

Sylvinho: Nuk ndihem me faj për Bajramin, kjo gjë ndodh kudo në botë

Posted on by BR

Shqipëria do të zhvillojë një miqësore përballë Gjibraltarit në Europa Point të enjten e 4 shtatorit, pesë ditë përpara duelit me Letoninë në Tiranë, e vlefshme për Kualifikueset e Botërorit 2026.

Tekniku i Kombëtares kuqezi, Sylvinho, ka folur në një konferencë për mediat përpara këtij dueli, nga i cili kërkohet fitorja, transmeton albinfo.ch.

“Sa i përket ndeshjes, është shumë e rëndësishme. Luajmë me Letoninë në Tiranë. Një kundërshtar i vështirë, skuadër fizike dhe shumë e organizuar. U konstatua që kemi vuajtur në ndeshjen ndaj Letonisë në mbrojtje. Unë mendoj se kemi vuajtur si skuadër. Kur ke lojtarë që të mungojnë. Është më e vështirë. Unë kam punuar me Brazilin dhe ka qenë e vështirë dhe për Brazilin. Na ka ndodhur edhe ne më përpara. Duhet të përgatitesh dhe të kalojmë te lista e dytë e Kombëtares. Duhet të bëjmë më të mirën me lojtarët që kemi dhe ne besojmë te ata.

Sa i përket situatës me Adrian Bajrami, ne e kemi plotësuar listën e pritjes dhe nuk kemi pasur ndonjë reagim. Pas reagimit për shtyp, kur nxorëm listën e plotë të 23 lojtarëve, prapë nuk kishte ndonjë ndryshim. Dy ditë më pas dikush na telefoni nga Federata dhe na tha që Adrian Bajrami zgjodhi të përfaqësojë Zvicrën. Fola 30 minuta me të. Kjo gjë ndodh kudo në botë. Edhe me Brazilin, kishte lojtarë që zgjidhnin Italinë dhe jo Brazilin.

Kur punon në një ekip Kombëtar, ndodh që disa lojtarë të dëmtohen. Jam i kënaqur me lojtarët që kanë ardhur, Kacurri, Shpendi, Çokaj. Kanë ardhur ta shijojnë Kombëtaren dhe ndihen krenar për këtë. Janë dy ndeshje të ndryshme. Një miqësore dhe një e rëndësishme për rezultat. Unë nuk besoj në miqësore, sepse duhet të përgatitemi mirë për fitore. Është një ndeshje e rëndësishme. Pas ndeshjes së nesërme, do të mendojmë për 11-shen që do të hedhim në fushë me Letoninë”, deklaroi braziliani, duke shtuar:

“Kemi të bashkuar me ekipin dhe portierin Simon Simoni, i cili zëvendëson Elhan Kastratin. Ai erdhi dhe u bë pjesë e grumbullimit, bëri një stërvitje dhe nuk ishte në 100% të tij. Prandaj thirrëm Simon Simonin dhe ne besojmë shumë te ai.

Broja është mirë. Nuk ka probleme. Broja e di që është e rëndësishme për të që duhet të vijojë të luajë. Është një lojtar i ri dhe është e rëndësishme që të futet në fushë, të ndihmojë skuadrën, të fitojë eksperiencë. Ka ndryshuar në 15 ditët e fundit. Akoma jeton në Angli, por ka ndryshuar mentalitet. Po bëhet shumë mirë. Nuk ka asnjë problem fizik, momentalisht është shumë mirë.

Është ndeshje e rëndësishme, ju a thashë më parë. Jemi mësuar me presionin, madje dhe lojtarët. Është një ndeshje e rëndësishme për ne. Në ndeshje të tilla duhet të përballesh. Duhet të luash mirë. E dimë që nuk kemi asnjë shans tjetër nëse marrim një rezultat të ndryshëm nga fitorja.

Fajtor për Bajramin? Pyetje shumë e mirë. Nuk ndihem fajtor. Mundohem të bëj më të mirën për grupin dhe ekipin. Përpara dy vitesh kemi folur në gjuhën portugeze. Bajrami ka pasur probleme te Benfica atë kohë. Jemi munduar ta ndihmojmë. I është bashkuar Kombëtares në qershor. Kemi folur. Pas vendimit të tij kam folur më përpara në telefon. Është një bisedë private që kemi bërë mes nesh. E kam përjetuar dhe në Brazil. E di si histori. Suksese lojtarit, por nuk ndihem në faj.

Siç thashë më përpara, ne punojmë të gjithë në Federatë. Kemi 3-4 muaj që diskutojmë për këtë miqësore. Nuk mund të ankohem, sepse çdo gjë ka qenë e rregullt. E vështirë të përgatitesh për miqësoren, kur pas pesë ditësh ke një ndeshje zyrtare. Futbolli duhet shijuar. Nuk besoj te miqësoret, në çdo ndeshje ka rëndësi rezultati dhe duhet të futesh në fushë dhe të japësh më të mirën.

Unë nuk besoj në miqësore, sepse kur futesh 90 minuta në fushë, duhet të japësh më të mirën. Rëndësi ka performanca dhe rezultati. Nuk besoj se një problematikë mund të ndikojë në ndeshjen tjetër. Ka lojtarë të rinj që nuk kanë luajtur shumë minuta me ne dhe unë dua t’i shoh si performojnë. Dua që ata ta shijojnë dhe të japin më të mirën e mundshme. Të shohim kush do të jetë titullar me Letoninë, edhe pse 11-shen për këtë ndeshje nuk e kemi ende. Por lojtarët duhet ta shijojnë në maksimum”, tha Sylvinho.

Kuqezinjtë e rinj duan rezultate pozitive ndaj Gjermanisë dhe Zvicrës

Posted on by BR

Shqipëria U-21 do të zhvillojë të premten e 5 shtatorit sfidën e parë miqësore të programuar ndaj Gjermanisë në “Elbasan Arena” në ora 18:00. Kuqezinjtë e drejtuar nga trajneri Alban Bushi kanë nisur përgatitjet zyrtare prej të hënës në “Shtëpinë e Futbollit”.

Në kuadër të takimit të parë miqësor, por edhe ndeshjes së dytë ndaj Zvicrës, që do të luhet më 8 shtator në Aarau kanë folur për fshf.org sulmuesi Erald Maksuti dhe mesfushori Feta Fetai, njofton FSHF, transmeton albinfo.ch.

Erald Maksuti, sulmuesi shqiptar i cili aktivizohet me ekipin e Flamurtarit foli për fshf.org për dy sfidat e rëndësishme të Shpresave. Djaloshi shqiptar vlerësoi Gjermaninë dhe Zvicrën si dy kundërshtarë mjaft të fortë, por theksoi se kuqezinjtë do të futen në fushë për të marrë rezultate pozitive.

Maksuti nënvizoi se objektivi i tij është të shënojë sa më shumë gola, ndërsa ka edhe një thirrje për tifozët shqiptarë.

Ndeshjet kundër Gjermanisë dhe Zvicrës – E dimë që janë dy miqësore shumë të forta. Luajmë me nënkampionët e Evropës dhe me një ekip të fortë si Zvicra. Janë ndeshje shumë të vështira në letër dhe si kundërshtarë, por ne do futemi të japim maksimumin tonë dhe shpresojmë të marrim rezultate pozitive. Objektivi im është që të bëj gola sa më shumë dhe të ndihmoj ekipin që të ecim.

Atmosfera në prag të ndeshjeve – Atmosfera në ekip është shumë e mirë. Jemi një grup njihemi, pasi kemi bërë disa ndeshje së bashku. Janë shtuar disa lojtarë që janë shumë të mirë. Do futemi në fushë për rezultate pozitive.

Thirrje për tifozët – I bëj thirrje tifozëve të jenë sa më të shumtë në numër, të na mbështesin dhe ne do japim maksimumin për çdo tifoz që do vijë në stadium” – tha Erald Maksuti për fshf.org.

Mesfushori i talentuar, Feta Fetai, tha se dy ndeshjet miqësore ndaj Gjermanisë dhe Zvicrës janë shumë të forta, por nga ana tjetër një test i mirë në kuadër të përgatitjeve për Kampionatin Europian U-21 2027. Fetai foli gjithashtu edhe për gjendjen e skuadrës dhe ftoi tifozët në stadiumin “Elbasan Arena” për të mbështetur kuqezinjtë.

Dy ndeshjet miqësore ndaj Gjermanisë dhe Zvicrës? – Kemi dy ndeshje shumë të mira dhe të forta për të treguar veten edhe për Evropianin U-21 2027. Janë teste shumë të mira për ne, për ekipin dhe për të gjithë lojtarët.

Gjendja e ekipit? – Kanë ardhur të gjithë. Kanë pasur ndeshje, po rikuperohemi dhe po përgatitemi për ndeshjen me Gjermaninë, pastaj për Zvicrën. Lojtarët janë të gjithë në formë. Janë përgatitur, kanë edhe minuta në këmbë. Shpresoj që të japim më të mirën në këto dy ndeshje.

Thirrje për tifozët? – Shpresoj që të ketë sa më shumë tifozë që të na përkrahin në “Elbasan Arena” dhe t’i gëzojmë me një fitore.

Gjendja e përfaqësueses shqiptare paraqitet mjaft e mirë, teksa ditën e sotme është programuar një tjetër seancë stërvitore nga stafi kuqezi. Skuadra do të mbyllë përgatitjet nesër dhe të premten do të luajë takimin e parë ndaj nënkampionëve të Evropës. Hyrja në stadium do të jetë falas.

Berna shpërndan 700 kupona në vlerë prej 400 frangash për kurse të gjermanishtës

Posted on by albinfo.ch

Qyteti i Bernës po ofron 600 kupona për banorët e qytetit dhe 100 kupona  shtesë për banorët e komunës Ostermundigen për të ndjekur kurse të  gjermanishtës.

Secili bonus ka vlerë prej 400 frangash dhe mund të përdoret në 13 shkolla gjuhe në Bernë. Iniciativa synon të ndihmojë integrimin e të huajve dhe të lehtësojë qasjen në mësimin e gjuhës gjermane.

Kush mund të përfitojë?

Të gjithë personat mbi 18 vjeç

Gjermanishtja duhet të jetë gjuhë e huaj për ta

Duhet të jenë të regjistruar në qytetin e Bernës ose në Ostermundigen

Aplikimi për programin DeutschBon është i hapur deri më 31 tetor 2025.

Përveç kësaj, më 9 shtator 2025, nga ora 18:30 deri 20:30, organizohet një aktivitet informues e rrjetëzimi me temën «Bern bietet», në adresën Träffer, Schosshaldenstrasse 43, Bern.

Në këtë ngjarje, pjesëmarrësit do të mund të marrin më shumë informacione nga profesionistë dhe persona që kanë përfituar nga ky program.

Dardanët udhëtojnë për 3 pikë ndaj Zvicrës

Posted on by BR

Kosova e ka zhvilluar stërvitjen e fundit në Kampin Nacional në Hajvali para nisjes për në Bazel, ku të premten do të luajë kundër Zvicrës, në ndeshjen e parë të ciklit kualifikues për Kupën e Botës 2026.

Atmosfera në kampin e Dardanëve është shumë pozitive, ndërsa të gjithë futbollistët po punojnë me përkushtim maksimal.

Në seancën e sotme stërvitore, përzgjedhësi Franco Foda ka punuar në detaje taktike, duke u fokusuar në organizimin ofensiv dhe mbrojtës, në ndërprerje dhe në reagimin e ekipit gjatë tranzicioneve të lojës, njofton FFK, transmeton albinfo.ch.

Mbrojtësi i Kombëtares, Mërgim Vojvoda, ka theksuar rëndësinë e përkrahjes së bashkatdhetarëve në ndeshjen e parë në Bazel.

“Atmosfera është shumë e mirë. E dimë se na presin dy ndeshje të vështira. E dimë sa e vështirë është të luash në Zvicër, por e dimë po ashtu se do të kemi shumë përkrahje nga tifozët. Djemtë janë të gjithë të përgatitur dhe stërvitjet po shkojnë shumë mirë dhe po bëhemi gati të shkojmë atje të marrim 3 pikë. Qëllimi ynë është të marrim 6 pikë, por sigurisht se do të jetë e vështirë pasi të dyja ekipet janë favorite, por ndonjëherë më mirë është kështu, sepse nuk është presioni tek ne por te ata. Ne po bëhemi gati për të fituar tri pikë si në Zvicër, ashtu edhe në shtëpi kundër Suedisë dhe shpresoj se ashtu do të jetë”, tha Vojvoda.

Edhe mesfushori Muharrem Jashari është optimist se ekipi do të ketë paraqitje të mirë dhe do të arrijë rezultat pozitiv.

“Jemi përgatitur maksimalisht për ndeshjen me Zvicrën. Atmosfera është e mirë dhe presim një rezultat pozitiv, pasi e kemi analizuar kundërshtarin në pikat e forta dhe të dobëta. Normalisht se në Zvicër na pret një përkrahje shumë e madhe dhe shpresoj të bëjmë më të mirën, të nxjerrim rezultat pozitiv dhe tifozët të jenë të kënaqur me paraqitjen tonë”, theksoi ai.

Ekspedita e Dardanëve do të udhëtojë nesër paradite drejt Bazelit, aty ku do të zhvillojë edhe një stërvitje dhe më pas më 5 shtator do të përballet me Zvicrën në stadiumin “St. Jakob-Park”.

Thirrjet për zbardhjen e fatit të të zhdukurve, thirrje për dinjitet njerëzor

Posted on by albinfo.ch

Më 30 dhe 31 gusht në Gjenevë është shënuar me një sërë aktivitetesh Dita Ndërkombëtare e të Zhdukurve me Dhunë, 30 Gushti. Organizatorët: Shoqata Kulturore “Dora D`Istria” dhe Lidhja Shqiptare në Botë, për përmbyllje dhe kurorëzim të këtyre zhvillimeve kishte caktuar një tryezë të rrumbullakët, e cila u mbajt pasditen e të dielës, më 31 gusht në Shtëpinë e Arteve “Grütli” të Gjenevës, shkruan albinfo.ch.

Ekspertë, zyrtarë dhe drejtues organizatash të të zhdukurve me dhunë bënin pjesë në panelin e gjerë, të drejtuar nga moderatori, Nazmi Jakurti dhe organizatorja e aktivitetit, Mirishahe Limani Hiler.

Andin Hoti dhe Kushtrim Gara përfaqësonin Komisionin Qeveritar për Personat e Zhdukur, nga Kosova, Silvia Hodgers, përfaqësuese e organizatave argjentinase të të zhdukurve, viktima të diktaturës së atjeshme në vitet `70 të shekullit të kaluar, Claudio Bolzman, sociolog dhe profesor në Shkollën e Lartë për Punë Sociale të Gjenevës, specialist i çështjeve të migrimit dhe marrëdhënieve ndërkulturore, Butrint Ajredini, avokat në Dhomën e Avokatëve të Gjenevës dhe përfaqësuesi i familjeve te te zhdukurve  të Kosovës, Salih Muhaxheri, nga Ferizaj.

Në këtë aktivitet kanë qenë të pranishme edhe përfaqësuesja e Ambasadës së Republikës së Kosovës në Zvicër, zonja Shukrije Ramadani dhe ajo e Shqipërisë, Monika Zguro.

Udhëheqësja e Konsullatës së Republikës së Kosovës në Gjenevë, zonja Floreta Kabashi i është drejtuar auditorit me një fjalë përshëndetëse, duke shprehur gatishmërinë e institucioneve të Kosovës për të punuar drejt zbardhjes së fatit të të zhdukurve. “Ne u bashkohemi thirrjeve të familjarëve, organizatave përkatëse të shoqërisë civile në këtë drejtim. Këto janë thirrje për drejtësi, llogaridhënie dhe dinjitet njerëzor. Republika e Kosovës është e përkushtuar për zbardhjen e fatit të secilit të zhdukur, pa dallim etnie. Ky është një detyrim ligjor dhe institucional dhe mbi të gjitha, moral. Fatkeqësisht Serbia refuzon të pranojë ushtriumin e krimeve të luftës në Kosovë dhe nuk ofron informacionet e nevojshme. Kjo nuk është thjesht mungesë bashkëpunimi por është vazhdim i krimit”, ka thënë veç tjerash zonja Kabashi.

“Detyrim moral e njerëzor që të vazhdojmë këtë rrugëtim derisa çdo familje të marrë përgjigjen që meriton”

“Jemi mbledhur këtu në Gjenevë, në Ditën Ndërkombëtare të të Zhdukurve me Dhunë, për të kujtuar, për të reflektuar dhe për të kërkuar drejtësi. Kjo ditë nuk është vetëm një datë në kalendar, por është një thirrje për ndërgjegje dhe për veprim”, është shprehur moderatori, Jakurti, në hapjen e punimeve të tryezës. Ai më tutje ka kujtuar vitin 2001, kur këtu në Gjenevë, bashkë me një grup aktivistësh dhe familjarësh, ishte organizuar një protestë para selisë së OKB-së, duke kërkuar gjetjen e të zhdukurve nga Kosova. “Ne besuam se zëri ynë do të dëgjohej dhe se e vërteta do të vihej në vend. Sot, 24 vite më pas, shumë familje ende nuk e dinë fatin e më të dashurve të tyre. Ky është një realitet i dhimbshëm që na shoqëron çdo ditë. Ne kemi detyrimin moral e njerëzor që të vazhdojmë këtë rrugëtim derisa çdo familje të marrë përgjigjen që meriton, ka thënë veç tjerash Jakurti.

Pjesëmarrësit në panel kanë paraqitur përvojat dhe njohuritë për problematikën e të zhdukurve me dhunë, secili nga këndvështrimi i tij.

Obstruksioni i Serbisë kundër zbardhjes së fatit të të zhdukurve, është përsëritje e krimit

 

Andin Hoti, në emër të Komisionit Qeveritar për Personat e Zhdukur ka shpalosur preokupimet, arritjet e deritashme dhe planet në drejtim të zbardhjes së fatit të të zhdukurve, në Kosovë. Ai ka shprehur mirëkuptim për frustrimin e familjarëve të të zhdukurve lidhur me mungesën e informacioneve për më të dashurit e tyre. Ai ka thënë se puna e komisionit konsiston në hulumtimin e varrezave masive në Kosovë dhe në Serbi si dhe në pjesëmarrjen në dialog me Serbinë për zbardhjen e fatit të të zhdukurve. Për aspektin e parë ai ka thënë se është bërë shumë, gjegjësisht “nuk ka mbetur pëllëmbë toke e Kosovës pa u hulumtuar për të gjetur viktimat e luftës”. Por në vazhdimësi ballafaqohemi me destruktivitetin e palës serbe, e cila merr detyrime dhe nuk i zbaton, duke bërë kështu krimin e dytë mbi viktimat e luftës dhe të zhdukurit. Ajo refuzon të hapë arkivat e veta, ku mund të gjendeshin të dhëna për të gjitha krimet e kryera mbi shqiptarët, gjatë luftës, ka thënë veç tjerash z. Hoti, duke apeluar për presion më të vendosur të palës ndërkombëtare mbi Serbinë.

Përvojat e të tjerëve në zbardhjen e fatit të të pagjeturve 

Silvia Hodgers, përfaqësuese e organizatave argjentinase të të zhdukurve, ka folur për përvojat e saj në gjetjen e viktimave të diktaturës së atjeshme në vitet `70 të shekullit të kaluar. Bëhet fjalë për rreth 35.000 të zhdukur në kohën e sundimit të juntës ushtarake dhe, së këtejmi, për një punë kolosale që është dashur të bëhet dhe që vazhdon të bëhet për zbulimin e tyre.

Claudio Bolzman, sociolog dhe profesor në Shkollën e Lartë për Punë Sociale të Gjenevës, ka trajtuar aspektet sociologjike të temës së të zhdukurve me dhunë dhe trajtimin që i është bërë kësaj teme nga shkenca e sociologjisë.

Salih Muhaxheri, përfaqësues i familjarëve të të zhdukurve të luftës nga Kosova ka folur për shqetësimet që kanë këta familjarë dhe për dhimbjen për të afërmit  e pagjetur që i shoqëron që nga përfundimi i luftës deri më sot. Ata i shqetëson sigurisht mungesa e përparimit në zbardhjen e fatit të të zhdukurve.

Avokati shqiptar nga Gjeneva Butrint Ajredini ka shpjeguar për publikun me terma konkretë problematikën e marrëveshjeve dhe konventave ndërkombëtare që ka nënshkruar Serbia lidhur me të zhdukurit dhe nuk i ka zbatuar si dhe për refuzimin nga ana e saj për të bashkëpunuar në këtë drejtim. Si shembull, me njërën nga këto konventa parashihet që të zgjatet koha e parashkrimit (vjetërsimit) të disa krimeve të luftës, por Serbia nuk e ka vendosur fare në kodin e saj penal një zgjatje të tillë.

Me këtë tryezë ka marrë fund edhe i gjithë manifestimi kushtuar Ditës së të Zhdukurve me Dhunë, i cili ka zgjatur dy ditë, organizuar nga Shoqata “Dora D`Istria” dhe Lidhja Shqiptare në Botë, me albinfo.ch si sponsor medial. Në këtë kuadër janë zhvilluar një sërë aktivitetesh, si Marshi për Drejtësi, rrugëve të Gjenevës, defilimi, me moton “Derisa i kujtojmë, ata jetojnë”, me fjalime dhe program artistik në sheshin para Pallatit të OKB-së, vënia e luleve në Kopshtin e të Zhdukurve, ekspozita e arteve pamore kushtuar të zhdukurve etj.

 

 

 

 

 

 

“Siparantum” i artë në Tajlandë, fiton edhe Çmim Special për rrëfim mbresëlënës

Posted on by Drin Reçica

Kori “Siparantum” nga Kosova ka shkëlqyer në Festivalin Ndërkombëtar të Koreve në Tajlandë, duke fituar medaljen e artë në kategorinë “Mixed Adult Choir” dhe Çmimin Special për rrëfim mbresëlënës, përcjell albinfo.ch.

Me 86,15 pikë, “Siparantum” u rendit në vendin e dytë në kategorinë e saj, duke u kualifikuar për garën finale për Çmimin e Madh (Grand Prix), së bashku me korin fitues “Medan Community” nga Indonezia. Çmimi kryesor iu dha korit indonezian “PSM-ITB”.

Veç suksesit teknik, juria ndërkombëtare vlerësoi veçanërisht aftësinë e “Siparantum” për të shpalosur rrëfime artistike me thellësi emocionale, duke e nderuar ansamblin me një çmim të veçantë.

Në këtë garë prestigjioze, kori nga Kosova interpretoi veprat “Amor io fallo” nga Jan van der Roost dhe “Pakëz në ëndërr dhe pakës në zhgjëndërr” të kompozitorit kosovar Baki Jashari.

Ky është edhe një sukses i rëndësishëm ndërkombëtar për muzikën korale nga Kosova.

Austria planifikon ndalimin e shamisë për vajzat nën 14 vjeç, gjoba mbi 1,000 euro për shkelësit

Posted on by Drin Reçica

Qeveria austriake është në fazat e fundit të përgatitjes së një ligji që do të ndalojë mbajtjen e shamisë së kokës nga vajzat nën moshën 14 vjeç në të gjitha institucionet arsimore, përfshirë shkollat private dhe ato islame. Ky veprim vjen si pjesë e një përpjekjeje për të forcuar integrimin dhe për të kufizuar atë që autoritetet e quajnë “mbulim i hershëm” i vajzave myslimane, transmeton albinfo.at.

Sipas Ministrisë së Familjes dhe Integrimit, fenomeni nuk është më margjinal. Vetëm në Vjenë vlerësohet se deri në 12,000 fëmijë mbajnë shamia, dhe autoritetet besojnë se prania e tyre është gjithnjë e më e dukshme në rrugë dhe shkolla.

Nëse ligji miratohet, mësuesit do të kenë detyrim të raportojnë shkeljet, ndërsa gjobat për prindërit mund të kalojnë shumën prej 1,000 euro për rastet e përsëritura. Policia do të jetë e ngarkuar me zbatimin e masave ndëshkuese.

Vendimi përfundimtar pritet të merret nga Këshilli i Ministrave gjatë muajit shtator. /Albinfo.at

https://www.krone.at/3885959

Akanji para ndeshjes me Kosovën dhe Slloveninë: Duam gjashtë pikë të plota

Posted on by Drin Reçica

Mbrojtësi i Zvicrës, Manuel Akanji, është paraqitur në konferencë para ndeshjes me Kosovën, transmeton albinfo.ch.

Akanji tha se duan gjashtë pikë në dy takimet e muajit shtator dhe nisje të mbarë në ndeshjen ndaj ‘Dardanëve’.

“Është periudha më e shkurtër kualifikuese që kam pasur me ekipin kombëtar deri më tani. Kështu që duhet të jemi plotësisht të përqendruar. Gjëja e mirë është se kemi dy ndeshje në shtëpi për të filluar. Presim gjashtë pikë nga ato ndeshje. Nuk do të jetë e lehtë, por ky është qëllimi ynë”, tha Akanji.

Kujtojmë që ndeshja mes Zvicrës dhe Kosovës, do të zhvillohet të premten, me fillim nga ora 20:45.

Nga ana tjetër edhe futbollisti , Fabian Rieder ka folur në konferencë për shtyp para ndeshjes së të premtes kundër Kosovës.

Lojtari i ri i Augsburgut e ka vlerësuar lart ekipin Dardan, por ndërkohë ka insistuar se Helvetikët duhet ta nisin me këmbë të mbarë kampanjën kualifikuese të Botërorit 2026.

“Po luajmë kundër Rexhbeçajt, një shoku të ri të skuadrës për mua. Por, ata (Kosova) janë të pozicionuar mirë në të gjithë skuadrën dhe do të na duhet ta shtyjmë veten deri në limit kundër këtij kundërshtari të fortë”, deklaroi fillimisht ai, teksa foli për duelin me shokun e tij të ri të ekipit, Elvis Rexhbeçaj.

“Nuk do të jetë një shëtitje në park për ne në këto kualifikime. Të tri skuadrat (Kosova, Suedia e Sllovenia) kanë cilësi të jashtëzakonshme. Por, ne duam ta kalojmë grupin dhe, nëse është e mundur, t’i fitojmë të gjitha ndeshjet. Këto janë qëllimet tona. Mezi presim të fillojmë”, përfundoi Rieder.

Zvicra dhe Kosova do të përballen mes vete këtë të premte në Basel në ndeshjen që do të nisë prej orës 20:45.

Këshilli Federal propozon kufizime më të rrepta për shpejtësinë 30 km/orë në rrugët kryesore

Posted on by Drin Reçica

Këshilli Federal po synon të vendosë rregulla më të qarta për zbatimin e kufirit të shpejtësisë prej 30 km/orë në rrugët kryesore që kalojnë nëpër qytete dhe fshatra. Qëllimi është ulja e ndotjes akustike dhe parandalimi i trafikut devijues drejt lagjeve të banuara, përcjell albinfo.ch.

Sipas propozimit, ndalimi i kufirit prej 30 km/orë nuk është në plan, por në rast se zbatohet, autoritetet do të duhet të dëshmojnë se masa nuk shkakton trafik të padëshirueshëm në zona të tjera. Edhe në zonat me zhurmë të lartë, kufizimi mbetet i mundshëm përmes përdorimit të sipërfaqeve rrugore “të qeta”.

Ky veprim vjen pas miratimit të një mocioni nga Parlamenti, i cili kërkonte masa për të kontrolluar shpejtësinë në rrugët e banimit. Megjithatë, Këshilli Federal nuk parashikon ndryshime për këto rrugë, pasi ato tashmë përmbushin funksione specifike për komunitetin lokal.

Ndryshimet e propozuara në Urdhëresën e Sinjalizimit dhe atë të Mbrojtjes nga Zhurma janë hapur për konsultim publik deri më 5 dhjetor.

https://www.blick.ch/politik/aber-kein-verbot-bundesrat-will-hoehere-huerden-fuer-tempo-30-id21195631.html

Osmani takoi Hargreaves-in, biseduan për krijimin e institucioneve

Posted on by Drin Reçica

Presidentja e Kosovës, Vjosa Osmani, ka pritur sot në takim ambasadorin e Mbretërisë së Bashkuar në Kosovë, Jonathan Hargreaves.

Në takim, Osmani ka shprehur mirënjohjen për mbështetjen e vazhdueshme të Britanisë ndaj Kosovës dhe ka ritheksuar përkushtimin për avancimin e partneritetit strategjik mes dy vendeve, veçanërisht në fushën e sigurisë, mbrojtjes dhe bashkëpunimit ekonomik.

Po ashtu, është diskutuar edhe procesi i konstituimit të institucioneve pas zgjedhjeve të 9 shkurtit. Presidentja Osmani ka riafirmuar se veprimet e saj do të jenë gjithmonë në përputhje me Kushtetutën dhe ligjet, duke garantuar stabilitet institucional dhe respektimin e vullnetit qytetar.

Mosmarrëveshjet për pronën çuan në vrasjen e mërgimtarit shqiptar në Itali

Posted on by Drin Reçica

Fatos Cenaj, 58-vjeçari shqiptar dhe ish-gardian, humbi jetën pas një pritë të planifikuar nga fqinji i tij italian më 8 qershor. Sipas mediave italiane, përfshirja e fqinjit në këtë akt lidhet me debate të shpeshta mbi kufijtë e pronës dhe mosmarrëveshje të vogla që u tensionuan me kalimin e kohës, transmeton albinfo.ch.

Sipas raportimeve të TG Padova, i dyshuari është italian, punëtor në një fabrikë lokale, dhe nuk ka lidhje me hakmarrje të mëparshme. Hetuesit besojnë se mëngjesin e 8 qershorit, ai e priti Cenajn pranë fermës Dindo, ku ky i fundit punonte. Kur Cenaj po kalonte me triçikletën e tij, i dyshuari qëlloi me armë zjarri, duke e goditur nga pas dhe duke e lënë të pa ndjenja. Cenaj vdiq disa ditë më vonë në spital.

Autoritetet italiane, përkatësisht Karabinierët e Parmës, kanë nisur hetimet. I dyshuari është nën trajtim në Qendrën e Shëndetit Mendor ULSS 6 dhe aktualisht është i lirë, ndërsa priten rezultatet e analizave balistike që do të hedhin më shumë dritë mbi ngjarjen. Pas vdekjes së Cenajt, familja e tij u largua nga zona për shkak të frikës./Albinfo.ch

KQZ-ja miraton procedurën për votim jashtë Kosovës

Posted on by Drin Reçica

Sot, Komisioni Qendror i Zgjedhjeve ka miratuar procedurën për votim jashtë Kosovës, sipas së cilës, zarfi me fletëvotime duhet të pranohet nga personi i regjistruar, përcjell albinfo.ch.

Në mbledhjen e 54-të të KQZ-së, u tha se qëllimi i këtij dokumenti është të përshkruajë të gjitha veprimet për përgatitjen e materialve për votimin jashtë Kosovës, raporton KosovaPress.

Procedura parasheh që pakoja me fletëvotime që KQZ ua dërgon përmes postës votuesve jashtë vendit mund të pranohet vetëm nga vetë personi i regjistruar.

“Zyrtari i postës duhet të sigurohet që të kontrollojë përmes dokumentit identifikues personin për të cilin është i dedikuar zarfime fletëvotime”, thuhet në këtë procedurë të KQZ-së.

Zarfi i cili do t’i dërgohet votuesit, përmban: fletëvotimet; zarfin e fshehtësisë; udhëzuesin me informacione se si plotësohen fletëvotimet dhe si realizohet votimi përmes postës; zarfin kthyes dhe shiritin mbyllës.

Në votimin jashtë Kosovës për votim me postë në Zgjedhjet Lokale, detyrë e votuesit është që pakon me fletëvotime ta dërgojë në ndonjërën nga kutitë postare të KQZ-së që hapen në shtete të ndryshme.

Sipas KQZ-së, adresat e kutive postare do të publikohen nga KQZ para fillimit të periudhës së votimit me postë.

Në këtë mbledhje, KQZ mori vendim edhe për decertifikimin e 9 kandidatëve nga subjekte të ndryshme politike, si: Prishina në dorën tënde (1); Partia Demokratike e Kosovës (1); Lëvizja për Bashkimin e Shqiptarëve (1); Partia Liberale Egjitpiane (2) dhe Alternativa (4). Këta kandidatë, ishin certifikuar më herët nga KQZ për pjesëmarrje në Zgjedhjet Lokale, të cilat do të mbahen më 12 tetor 2025.

Për gjashtë muaj, 103 persona hoqën dorë nga shtetësia shqiptare

Posted on by Drin Reçica

Në gjysmën e parë të vitit, 103 persona hoqën dorë nga shtetësia shqiptare, krahasuar me 315 persona gjatë të njëjtës periudhë të vitit të kaluar, përcjell albinfo.ch.

Referuar njoftimit, një pjesë e konsiderueshme e qytetarëve që dorëzojnë pasaportën shqiptare kërkojnë të marrin shtetësi të tjera, si italiane, gjermane ose franceze, ku ligjet e tyre nuk lejojnë mbajtjen e shtetësisë së dyfishtë.

Vitin e kaluar, 900 persona hoqën dorë nga shtetësia shqiptare, shifra më e lartë e regjistruar ndonjëherë në një vit. Ndërkaq, që nga viti 2004 deri në 2024, rreth 522,000 qytetarë shqiptarë kanë hequr dorë nga shtetësia.

Nga ana tjetër, gjatë periudhës janar – qershor, 400 persona kanë paraqitur kërkesë për të marrë pasaportë shqiptare, kryesisht shqiptarë të lindur jashtë vendit, veçanërisht fëmijë të emigrantëve, të cilët synojnë të fitojnë shtetësinë e prindërve të tyre ose të kenë dy pasaporta. Ndër ta ka edhe qytetarë shqiptarë nga vendet fqinje, ku lejohet mbajtja e dyfishtë e shtetësisë.

Osmani telegram ngushëllimi për Dhimitër Anagnostin: Frymëzim për gjeneratat që vijnë

Posted on by Drin Reçica

Presidentja e Republikës së Kosovës, Vjosa Osmani, ka shprehur ngushëllimet e saj për ndarjen nga jeta të mjeshtrit të madh të kinematografisë shqiptare, Dhimitër Anagnosti, duke e cilësuar atë si një figurë të shquar që do të mbetet përherë frymëzim për brezat që vijnë, përcjell albinfo.ch.

Në mesazhin e saj drejtuar familjes së regjisorit, Osmani vlerësoi kontributin e jashtëzakonshëm të Anagnostit në fushën e artit dhe kulturës. Ajo theksoi se vepra e tij shumëvjeçare ka pasuruar trashëgiminë kulturore shqiptare dhe i ka dhënë identitet të veçantë kinemasë sonë në arenën ndërkombëtare. “Veprat e tij mbeten të ngulitura thellë në kujtesën e publikut dhe janë dëshmi e talentit, përkushtimit dhe guximit të tij artistik. Ai ishte një njeri që i dha artit dinjitet dhe shoqërisë reflektim,” thuhet në telegramin ngushëllues.

Dhimitër Anagnosti ndërroi jetë në moshën 89-vjeçare, duke lënë pas një trashëgimi të çmuar në kinematografinë shqiptare. Ai ishte një nga pionierët dhe personalitetet më të rëndësishme të këtij arti në Shqipëri, me një karrierë që përfshinte role si regjisor, skenarist, shkrimtar dhe politikan.

Shqipëria me pagën minimale më të ulët në Evropë

Posted on by Drin Reçica

Paga minimale mujore bruto në Shqipëri ishte 408 euro në fund të muajt qershor, sipas të dhënave të fundit të përditësuara nga Instituti Europian i Statistikave, Eurostat, përcjell albinfo.ch.

Në këtë nivel, paga minimale është jo vetëm më e ulëta në Europë (përjashtuar shtetet e ish Bashkimit Sovjetik), por dhe shumë më pak sesa në vendet e tjera të Ballkanit Perëndimor.

Paga më e lartë minimale në rajon është në Mal të Zi, me 670 euro në muaj. Në krahasim me katër vjet më parë, ky nivel është dyfishuar.

Pas Malit të Zi, renditet Serbia, me një pagë minimale prej 618 euro në muaj, me rritje gati 70% në krahasim me gjashtëmujorin e parë 2021.

Për herë të parë pas disa vitesh, Eurostat ka përditësuar të dhënat për Maqdoninë e Veriut, duke raportuar një nivel prej 584 euro/muaj. Shifrat për Kosovën dhe Bosnjën nuk janë të disponueshme. Të dhëna të tjera bëjnë të ditur se paga minimale në Kosovë nga 1 tetori i bë 350 euro. Në Bosnjë, në të dy federatat varion nga 511-660 euro/muaj.

Të tre shtetet, Mali i ZI, Serbia, i paguajnë minimalisht punonjësit e tyre me rreth 620 euro në muaj. Në Shqipëri paga minimale është rreth 34% më e ulët sesa mesatarja e këtyre tre shteteve.

Në Shqipëri paga minimale nuk ka ndryshuar që nga 6 mujori i parë 2023, pasi ishte rritur disa herë në 2022-n, për të arritur në 40 mijë lekë, sa është edhe sot.

Në tabelën e Eurostat, paga minimale në Shqipëri është rritur fiktivisht nga 376 euro në 6 mujorin e parë 2023 në 408 euro sot për shkak të zhvlerësimit të euros, kur realisht fuqia blerëse ka rënë për shkak të çmimeve që janë më të shtrenjta në rajon dhe për ushqimet më shumë se mesatarja e Bashkimit Europian.

Ndryshe nga Shqipëria, vendet e rajonit kanë vijuar të rrisin me shpejtësi pagat minimale edhe pas vitit 2023, ku ndryshimi më i fortë ishte në Serbi, me 34% më shumë se 6 mujori i parë 2023, Mali i Zi i ka rritur me 25% dhe Maqedonia e Veriut me 20%.

Në Bashkimin Europian, sipas të dhënave të Eurostat, janë 22 shtete që kanë paga minimale. Niveli më i lartë është në Luksemburg, me 2700 euro/muaj. Gjermania, një destinacion i preferuar për shqiptarët për të punuar, renditet e katërta, ku paga më e ulët mujore bruto është 2161 euro. Paga më e ulët minimale në BE është në Bullgari me 551 euro në muaj. Në Turqi niveli është 558 euro.

Opozita i reagon Kurtit për paraqitje në seancën ndaj Klinakut, përgjigjet Kryeziu

Posted on by Drin Reçica

Partitë që deri në zgjedhjet e fundit ishin në opozitë i kanë reaguar kryeministrit në detyrë, Albin Kurti, pasi u paraqit në Gjykatën Themelore në Prishtinë në rastin në të cilin ish-udhëheqësi i Organizatës së Veteranëve të Luftës së Ushtrisë Çlirimtare të Kosovës, Faton Klinaku, akuzohet për kanosje ndaj Kurtit.

Deputetja e Partisë Demokratike të Kosovës, Vlora Çitaku, ia ka kujtuar Kurtit refuzimin për të dëshmuar në Prokurori lidhur me dyshimet për korrupsion me rezervat shtetërore.

“Pra, A.K. shkon në gjykatë për të dëshmuar kundër Klinakut, ‘krimi’ i të cilit ishte një status në Facebook. Por, kur bëhet fjalë për aferat milionëshe të vartësve të tij, refuzon t’i përgjigjet prokurorisë. Kush ka sy me pa dhe vesh me dëgju, e kupton se situata është më se e qartë”, ka shkruar Çitaku në Facebook.

Ka reaguar edhe deputeti tjetër i PDK-së, Artan Behrami.

“Kundër njerëzve të UÇK-së, Albin Kurti gjithmonë është i gatshëm të dëshmojë në gjykatë! Për afera korruptive, për të amnistuar krimet ekonomike, nuk i përgjigjet drejtësisë!” ka shkruar ai.

Deputeti i Lidhjes Demokratike të Kosovës, Avdullah Hoti, ka thënë se Kurti “nuk është kryeministri që i duhet Kosovës”.

“Zyrën e Kryeministrit e mban në mënyrë joligjore. Për këtë ekziston aktgjykimi i organit më të lartë të drejtësisë – Gjykatës Supreme, e cila qartësisht konstaton se anëtarët e Qeverisë në detyrë që mbajnë njëkohësisht edhe pozitën e deputetit janë në shkelje ligjore. Kur ftohet nga organet e drejtësisë për të dëshmuar në një rast të dyshuar korruptiv, ai nuk paraqitet. Në vend të kësaj, i fyen dhe i përçmon zyrtarët e drejtësisë, duke e diskredituar shtetin në sytë e qytetarëve dhe të aleatëve. Por, kur organet e drejtësisë e thërrasin për një rast të dyshuar kërcënimi ndaj tij, ai paraqitet aty pa asnjë problem, duke u viktimizuar”, ka shkruar Hoti.

Ngjashëm ka reaguar edhe Arton Demhasaj, anëtar i Aleancës për Ardhmërinë e Kosovës.

“Pamje ‘historike’ – Kryeministri në detyrë/Deputeti Kurti, dëshmon në gjykatë për një kërcënim! Ama për aferat me miliona e miliona euro, tendera, korrupsion nuk bën me shku me deshmu në Prokurorin Speciale… aty s’ka kohë me u paraqit, se qenka shumë i zënë me “drejtësi selektive”! Luja Albin, luja… Luja popullit sa të mundesh!” ka shkruar ai.

E zëdhënësi i Qeverisë, Përparim Kryeziu, ka thënë se paraqitja e kryeministrit në detyrë, për rastin e kanosjes ndaj tij s’është standard i dyfishtë.

“Sa i përket ftesës së Prokurorisë Speciale, kryeministri Kurti asnjëherë nuk ka refuzuar që të japë dëshminë e tij. Përkundrazi, ai ka shprehur gatishmërinë e plotë për të bashkëpunuar me drejtësinë dhe për të respektuar parimin e transparencës dhe llogaridhënies, duke kërkuar që intervistimi të zhvillohet në zyrën e tij, një praktikë kjo që ka ndodhur edhe më parë”, ka shkruar Kryeziu.

Kryeziu po ashtu ka thënë se për rastin e kanosjes, Kurti është intervistuar në zyrën e tij më 10 qershor.

Kryeministri Kurti ka kërkuar vazhdimisht që prokurorët t’i shkojnë në zyrë dhe ka thënë se ka precedent për këtë, por gjykata e ka urdhëruar atë që të dëshmojë në prokurori. Ai madje është gjobitur për refuzimin që të shkojë në prokurori. E Kurti është ankuar për këtë gjobë 250-euroshe.

Kurti është ftuar të dëshmojë lidhur me dyshimet e prokurorisë në rastin e rezervave shtetërore. Prokuroria dyshon se shteti është dëmtuar me rreth 600.000 euro gjatë blerjes së produkteve për rezervën shtetërore.

Nga Gjilani në Bern e Cyrih: Alban Hyseni nis fushatën me diasporën

Posted on by Drin Reçica

Mësohet se kryetari aktual i Komunës së Gjilanit dhe kandidati për një mandat të dytë nga radhët e Lëvizjes Vetëvendosje, Alban Hyseni, pritet të nis fushatën elektorale me takime të drejtpërdrejta me mërgatën shqiptare në Zvicër, shkruan albinfo.ch.

Më 6 shtator 2025 (e shtunë), Hyseni do të ndalet në dy qytete kryesore ku jetojnë dhe veprojnë shumë bashkatdhetarë nga Gjilani: Bern dhe Cyrih.

Bern -Adresa: Ziegelackerstrasse 10, 3027 Bern, ora: 12:30 dhe Cyrih (Kloten) – Adresa: Bramenring 1, 8302 Kloten, Schweiz, ora: 16:30.

Fokus i veçantë: përfshirja e mërgatës në zhvillimin e Gjilanit

Në këto takime, kryetari Hyseni pritet të prezantojë arritjet e deritanishme gjatë mandatit të tij si dhe planin e punës për katër vitet e ardhshme. Një nga temat kryesore do të jetë edhe roli i mërgatës në zhvillimin e qëndrueshëm të Gjilanitdhe mundësitë për përfshirjen e saj aktive në projektet komunale.

Organizatorët bëjnë thirrje për pjesëmarrje të gjerë të bashkatdhetarëve, duke theksuar se ky është një rast i mirë për të bashkëbiseduar nga afër me kryetarin për sfidat dhe mundësitë që e presin qytetin./Albinfo.ch

Në Zvicër për votën e mërgimtarëve: LDK nis fushatën për Gjilanin

Posted on by Drin Reçica

Në prag të zgjedhjeve lokale në Kosovë, kandidati i Lidhjes Demokratike të Kosovës (LDK) për komunën e Gjilanit ka nisur një seri takimesh me bashkatdhetarët gjilanas në Zvicër, në kuadër të fushatës së tij për të siguruar mbështetjen e mërgatës, shkruan albinfo.ch.

Fushata do të përfshijë dy ngjarje të rëndësishme në qytete të ndryshme të Zvicrës, ku jeton një numër i madh i mërgimtarëve nga Gjilani. Takimet janë paraparë si më poshtë:

  • E enjte, 04 shtator 2025, ora 20:00 në adresën:
    My Garage, Pro sa 19, Pré de la Fontaine, 1242 Satigny, Genève, Suisse
  • E shtunë, 06 shtator 2025, ora 20:00 në adresën:
    Industriestrasse 14, 8305 Dietlikon, Schweiz

Nën moton “Bashkë për Fitore”, kandidati i LDK-së u ka bërë thirrje bashkëqytetarëve të tij të marrin pjesë në këto takime miqësore për të bashkëbiseduar rreth të ardhmes së Gjilanit.

“Pjesëmarrja juaj na nderon!”, thuhet në ftesën publike, duke reflektuar rëndësinë që i jepet rolit të diasporës në zhvillimin dhe drejtimin e komunës.

Kjo qasje e drejtpërdrejtë ndaj mërgatës vjen si rezultat i ndikimit të madh që ajo ka jo vetëm në aspektin ekonomik për vendlindjen, por tashmë edhe në atë politik, pasi shumë nga bashkatdhetarët mbajnë të drejtën e votës dhe interesohen për zhvillimet në vend.

Kandidati, i shoqëruar nga figura të njohura të LDK-së, pritet të diskutojë programin e tij për zhvillimin e Gjilanit, prioritetet kryesore, si dhe rolin që mund të ketë mërgata në ndihmën për realizimin e projekteve. /Albinfo.ch