Falë mbështetjes së Agjencisë Austriake për Zhvillim, të rinjtë në Partesh janë duke përfituar nga programi #PONDER, i cili synon zhvillimin e shkathtësive të të menduarit kritik dhe rritjen e ndërgjegjësimit për edukimin medial. Përmes aktiviteteve dhe trajnimeve të ndryshme, pjesëmarrësit po mësojnë të analizojnë informacionin, të vënë në pikëpyetje burimet dhe të krijojnë qasje më të sigurt në përballjen me përmbajtjet mediale, transmeton Albinfo.ch.

Në një kohë kur rrjetet sociale dhe informacioni online ndikojnë gjithnjë e më shumë në formimin e opinioneve, edukimi medial po konsiderohet një ndër mjetet kryesore për fuqizimin e të rinjve. Programi #PONDER synon të ndihmojë pjesëmarrësit të sfidojnë paragjykimet, të dallojnë informacionin e saktë nga dezinformimi dhe të zhvillojnë mendim të pavarur, duke i përgatitur ata për një përfshirje më aktive dhe të vetëdijshme në shoqëri./Albinfo.ch

Kolektivi për Mendim dhe Veprim Feminist, në bashkëpunim me organizatën “Përpjekja”, kanë bërë thirrje për protestë kundër paralajmërimeve për rritjen e çmimit të energjisë elektrike. Protesta pritet të mbahet të premten, duke filluar nga ora 13:00 para ndërtesës së KEDS-it dhe më pas do të vazhdojë drejt Qeverisë së Kosovës.

Aktivistja Qëndresa Hyseni ka bërë të ditur se protesta do të zgjasë rreth dy orë dhe ka ftuar qytetarët që t’i bashkohen kundërshtimit të shtrenjtimit të energjisë elektrike. Sipas saj, rritja e çmimit të rrymës prek drejtpërdrejt jetën e përditshme të qytetarëve dhe ndikon në rritjen e kostos së jetesës.

Hyseni ka theksuar se kundërshtimi qytetar është i domosdoshëm, duke paralajmëruar se një rritje e mundshme prej rreth 20 për qind e faturave të energjisë do të ndikonte negativisht në standardin jetësor të qytetarëve. Ajo ka shtuar se protesta e së premtes shihet si hap i parë i veprimeve qytetare, të cilat, sipas saj, do të vazhdojnë deri në pezullimin e vendimit për shtrenjtim të rrymës.

Sipas organizatorëve, protesta është iniciativë e shoqërisë civile dhe nuk ka karakter partiak. Ata kanë theksuar se çdo qytetar ka të drejtë të marrë pjesë dhe të shprehë qëndrimin e tij lidhur me këtë çështje.

Organizatorët presin pjesëmarrje të konsiderueshme qytetare, ndërsa protesta pritet të zgjasë nga ora 13:00 deri në orën 15:00.

Vetëm një vit pasi Zyra e Rregullatorit të Energjisë (ZRRE) miratoi rritjen e tarifave të energjisë elektrike me 16 për qind, kompania KESCO ka dorëzuar kërkesë të re për shtrenjtim të rrymës, kësaj here rreth 21 për qind. Kërkesa pritet të shqyrtohet nga ZRRE, ndërsa Presidenca e Kosovës ka paralajmëruar se do ta kundërshtojë çdo rritje eventuale të çmimit të energjisë, transmeton albinfo.ch.

Këshilltari për media i Presidentes, Bekim Kupina, ka deklaruar se Presidenca do të mbajë të njëjtin qëndrim si në vitet e kaluara, duke u udhëhequr nga interesi publik. Ai ka bërë të ditur se komentet zyrtare do të dorëzohen sapo të hapet thirrja publike për konsultime.

Qëndrimi i Presidencës pritet të jetë i ngjashëm me kundërshtimin institucional të shprehur edhe vitin e kaluar, kur ZRRE po shqyrtonte rritjen e tarifave për vitin 2025. Në dokumentin e publikuar më 28 mars 2025, Presidenca kishte argumentuar se rritja e çmimit të energjisë ishte në kundërshtim me kornizën ligjore dhe nuk merrte parasysh situatën ekonomike dhe mirëqenien e qytetarëve.

Sipas Presidencës, ZRRE ka obligim ligjor që në radhë të parë të mbrojë konsumatorin, ndërsa rritja e tarifave nuk mund të shihet si zgjidhje e vetme për problemet strukturore të sektorit energjetik. Në reagimet e mëhershme ishte theksuar se një vendim i tillë do të rriste barrën financiare për qytetarët dhe do të ndikonte drejtpërdrejt në rritjen e inflacionit, kostos së jetesës dhe uljen e fuqisë blerëse.

Të dhënat e publikuara nga Presidenca tregojnë se rritja kumulative e tarifave të energjisë në Kosovë në katër vitet e fundit ka arritur gati 126 për qind, ndërsa periudhat e rritjeve më të mëdha kanë përkuar me norma të larta inflacioni. Gjithashtu, është theksuar se krahasimi i çmimit të energjisë me vendet e rajonit nuk mund të bëhet pa analizuar të ardhurat mesatare dhe standardin jetësor të qytetarëve.

Presidenca ka ngritur shqetësime edhe për mungesën e transparencës nga operatorët energjetikë, duke theksuar se raportet financiare për vitin paraprak nuk ishin publikuar, çka e vështirëson vlerësimin real të kostove dhe humbjeve që përdoren si argument për rritjen e tarifave. Sipas saj, një pjesë e rritjes së kostove lidhet edhe me mosrealizimin e prodhimit të planifikuar nga KEK-u, gjë që ka rritur importin e energjisë me çmime më të larta.

Në vend të shtrenjtimit të energjisë, Presidenca ka propozuar masa alternative, si subvencionimi i energjisë për kategoritë më të ndjeshme, kufizimi i humbjeve të lejuara për operatorët, përmirësimi i pagesës së faturave në komunat veriore, reduktimi i përkohshëm i TVSH-së për energjinë elektrike dhe krijimi i skemave të pagesës me këste për qytetarët.

Kryeministri në detyrë, Albin Kurti, ka paralajmëruar ndryshime në përbërjen e kabinetit qeveritar “Kurti 3”, duke theksuar se lista e ministrave nuk do të jetë identike me atë që kishte prezantuar më herët në Kuvend. Ai ka bërë të ditur se disa prej emrave të propozuar më parë do të mbesin, por do të ketë edhe kandidatë të rinj, transmeton albinfo.ch.

Deklaratën Kurti e bëri pas përurimit të investimeve në efiçiencë të energjisë në shkollën e mesme ekonomike “Isa Boletini” në Podujevë. Ai rikujtoi se më 26 tetor 2025 kishte dështuar të siguronte shumicën parlamentare për formimin e qeverisë, gjatë periudhës së bllokadës në Kuvend.

Në listën e mëparshme të propozuar nga Kurti ishin përfshirë disa emra të rinj, ndërsa jashtë saj kishin mbetur zëvendëskryeministri Besnik Bislimi, ministrja në detyrë e Tregtisë dhe Industrisë, Rozeta Hajdari, ministri i Pushtetit Lokal, Elbert Krasniqi dhe ministrja e Arsimit, Arbërie Nagavci. Për postin e ministrit të Infrastrukturës ishte propozuar kryetari i Kuvendit, Dimal Basha, ndërsa ministria e re për Familje dhe Mirëqenie Sociale ishte paraparë të udhëhiqej nga Andin Hoti. Në Ministrinë e Kulturës dhe Turizmit ishte propozuar aktori Fatmir Spahiu, ndërsa Fitore Pacolli ishte nominuar për ministre të Mjedisit dhe Planifikimit Hapësinor. Po ashtu, Donika Gërvalla ishte propozuar për të marrë drejtimin e Ministrisë së Drejtësisë.

Kurti dhe kryetari i Kuvendit, Glauk Konjufca, kishin propozuar edhe rritjen e numrit të ministrive nga 15 në 19. Kryeministri në detyrë ka theksuar nevojën që Kuvendi të formohet sa më shpejt, në mënyrë që të miratohen marrëveshje ndërkombëtare me vlerë qindra miliona euro, si dhe buxheti i vendit.

Në zgjedhjet e 28 dhjetorit, Lëvizja Vetëvendosje fitoi mbi 50 për qind të votave, rezultat që i mundëson formimin e qeverisë në bashkëpunim me përfaqësuesit e komuniteteve pakicë.