Deri në nëntor, 1.4 milionë pasagjerë të ANP

Aeroportin Ndërkombëtar të Prishtinës “Adem Jashari”, deri në nëntor e kanë shfrytëzuar 1 milion e 443 mijë udhëtarë, ose 6.1 për qind më shumë se vitin e kaluar

Statistikat e publikuara nga Agjencia e Statistikave të Kosovës (ASK) se kosovarët tetë  herë më shumë e shfrytëzojnë aeroplanin se sa tretnin, i ka konfirmuar edhe Autoriteti i Aviacionit Civil të Kosovës (AACK). Sipas këtij të fundit, numri i pasagjerëve që shfrytëzojnë Aeroportin është rritur dukshëm muajin fundit.

Sipas AACK-së, rritja e trafikut në Aeroportin Ndërkombëtar të Prishtinës “Adem Jashari” ka vazhduar në nëntor prej 6.1 për qind, krahasuar me periudhën e njëjtë të vitit të kaluar. Sipas kësaj agjencie, në muajin nëntor kanë qarkulluar nëpër aeroport 101 226 udhëtarë.

“Deri në nëntor të këtij viti, Aeroporti ndërkombëtar i Prishtinës u ka shërbyer 1 443 714 udhëtarëve apo 11.7 për qind më shumë se në të njëjtën periudhë të vitit të kaluar”, është thënë në njoftimin e Autoritetit të Aviacionit Civil të Kosovës (AACK).

Ndryshe, sipas statistikave të ASK-së, kosovarët më shumë e kanë shfrytëzuar aeroplanin për flurime jashtë vendit se sa udhëtimet me tren brenda Kosovës. Madje dallimi ne tremujorin e tretë të këtij viti, është dukshëm më i lartë, duke kaluar shifrat në 8 ose 9 fish më shumë me aeroplan se sa me tren.

“Në tremujorin e tretë të vitit 2015, numri i pasagjerëve, që e kanë shfrytëzuar trenin, si mjet udhëtimi është 66 mijë pasagjerë. Ndërsa numri i udhëtarëve që e kanë shfrytëzuar aeroplanin, si mjet transporti, është rreth 541 mijë. Numri i fluturimeve gjatë tre muajve, sipas ASK-së, është 2150 ose 11 për qind më shumë se vitin e kaluar”, precizohet në statistikat e ASK-së, vetëm për tre muajt e parë të këtij viti.