Diaspora shqiptare e integruar mirë në Itali

Ambasadori italian, Piero Cristoforo Sardi tha se shqiptarët janë mjaft mirë të integruar në shtetin italian, ndërsa qeveria në Romë, sipas tij, mbështete çdo angazhim të Kosovës për organizimin e shqiptarëve atje

Qeveria e Italisë do t’i jep mbështetje të plotë Ministrisë kosovare të Diasporës për të realizuar objektivat e saj organizative, kulturore e arsimore në diasporën shqiptare në këtë shtet. Kështu deklaroi  ambasadori i Italisë në Kosovë, Piero Cristoforo Sardi pas një takimi që zhvilloi me ministrin e Diasporës, Valon Murati.

Ambasadori italian, theksoi se shqiptarët janë mjaft mirë të integruar në shtetin italian.

Gjatë këtij, takimi ministri Murati e njoftoi diplomatin Sardi për politikat e MeD-së dhe  projektet e realizuara, si regjistrimi i diasporës, proces tashmë i përfunduar, të dhënat e të cilit do të dalin muajt e ardhshëm. Po ashtu, u bisedua edhe për bashkëpunimin Kosovë-Itali, veçanërisht në fushën e kulturës e të arsimit, si dhe për komunitetin e shqiptar që jeton dhe vepron atje.

Ministri Murati foli edhe për mësimin e gjuhës shqipe në Itali, për organizimin e diasporës atje, për rrjetet e krijuara të studentëve dhe të rinjve shqiptarë, për investimet në zhvillimin ekonomik të vendit, për krijimin e kushteve për të investuar në Kosovë, por edhe për tema të tjera që lidhen me diasporën.