Deklarata e Pendarovskit, nxit reagime në Shqipëri

Presidenti i Maqedonisë së Veriut, Stevo Pendarovski, në një intervistë në Bruksel për “Euroactiv” kërkoi që Maqedonia të mos trajtohet në bllok me Shqipërinë, por veçmas. Deklarata e tij nxiti reagimin e kryeministrit Edi Rama. Në një postim në “Twitter”, kreu i qeverisë shqiptare shprehet se kjo deklaratë i duket e çuditshme, pasi nuk është e drejtë, transmeton albinfo.ch.
Rama shkruan se kjo nuk është as praktike, duke pasur parasysh konsideratën për kontributin e faktorit shqiptar në proceset integruese të Maqedonisë së Veriut.
“Presidenti Pendarovski nënkupton favorizimin e ndarjes nga Shqipëria në vendimin për negociatat? Çudi kjo qasje, sidomos kur konsideron kontributin kyç të Shqipërisë dhe shqiptarëve në zhvillimet demokratike dhe rrugën europiane të shtetit mik. S’duket as e drejtë, as praktike, faktikisht!”, shprehet kryeministri i Shqipërisë në reagimin e tij.