Gjatë gushtit, 214 mijë pasagjerë në ANP

Në gusht 2015 ANP-ja u shërbeu rreth 214 000 udhëtarëve apo 11.4 për qind më shumë se në të njëjtën periudhë të vitit të kaluar

Në Aeroportin Ndërkombëtar “Adem Jashari” në Prishtinë, ka vazhduar fluksi i madh i udhëtarëve edhe gjatë muajit gusht. Sipas një njoftimi lëshuar nga Autoriteti i Aviacionit Civil i Republikës së Kosovës (AACK), gjatë gushtit kanë qarkulluar 214 mijë pasagjerë, ose 25 mijë më shumë se të njëjtën periudhë të vitit të kaluar.

“Në gusht 2015, Aeroporti Ndërkombëtar i Prishtinës u shërbeu rreth 214 mijë udhëtarëve apo 11.4 për qind më shumë se në të njëjtën periudhë të vitit të kaluar. Gushti tradicionalisht është muaji me numrin më të madh të trafikut në ANP”, është thënë në njoftimin e Autoritetit të Aviacionit Civil të Republikës së Kosovës.

AACK-ja ka bërë me dije se rritja për vitin 2015 deri në gusht krahasuar me të njëjtën periudhë në vitin 2014 është 11.7 për qind për një total prej 1.08 milionë udhëtarë.