Reagime rreth grabitjes në aeroportin e Tiranës

Shoqata e Bankave e Shqipërisë ka dënuar grabitjen e 10 milionë eurove në  aeroportin e Rinasit, duke thënë se ngjarjet e tilla janë shqetësuese.

Për këtë ngjarje në Aeroportin e Rinasit ka reaguar edhe kompania ‘Austrian Airlines’.

Kreu i shoqatës së Bankave, Spiro Brumbulli tha se ngjarja është tepër e rëndë dhe përtej imagjinatës.

“Kjo vë në pikëpyetje sigurinë e qytetarëve. Nëse do të mbyllet edhe ky rast si më parë, do të shtojë përsëritjen e ngjarjeve të tilla. Duhet vëmendje për sigurinë. Si Shoqatë e Bankave e dënojmë një ngjarje të tillë. Ne kemi transportuar paratë dhe ngjarja ka ndodhur në avion. Në gjykimin tim, përgjegjësia është e aeroportit, pasi hyrja me makinë deri tek avioni tregon se masat lënë për të dëshiruar. Bankat kanë të siguruar të gjithë vlerën monetare”, ka thënë Burbulli.

Ndërsa zëdhënësja e linjës ‘Austrian Airlines’, Tanja Gruber, deklaroi se  grabitja ndodhi kur sasia e parave po ngarkohej në aeroplanin e linjës Tiranë-Vjenë.

Gjithashtu ajo theksoi se nuk do të ketë më trasnferta parash nga Tirana për në kryeqytetin e Austrisë, duke shtuar se nuk ka pasur asnjë rrezik për stafin dhe ekuipazhin.