Grabitje në ‘Rrugën e Kombit”, dy kosovarëve u merret vetura ‘Audi Q7″

Viktimë e një grabitjeje të armatosur në Shqipëri kanë rënë dy qytetarë nga Kosova në Rrugën e Kombit, pikërisht në aksin rrugor Milot-Rrëshen derisa po ktheheshin nga Mali i Zi në Kosovë.

Viktimë e një grabitjeje të armatosur në Shqipëri kanë rënë dy qytetarë nga Kosova në Rrugën e Kombit, pikërisht në aksin rrugor Milot-Rrëshen derisa po ktheheshin nga Mali i Zi në Kosovë

Gjashtë persona të armatosur me kallashnikov që udhëtonin me dy vetura, njëra prej të cilave e pajisur me sinjalizues të policisë, ia kanë marrë me forcë automjetin “Audi Q7” shtetasit M. A. 21 vjeç nga Korisha e Prizrenit.

M.A. bashkë me shokun e tij F.M., po ashtu 21 vjeç, ishin duke u kthyer nga pushimet që kishin kaluar në Budvë të Malit të Zi për në Kosovë.

Sipas Polixisë së Lezhës, ngjarja raportohet të ketë dodhur rreth orës 22:00 të mbrëmjes së diel.

Dy të rinjtë sapo kishin kaluar qytezën e Milotit, kanë vënë re se prapa tyre qëndronin dy vetura dhe bazuar në raportin e Policisë, kishin menduar se bëhet fjalë për patrulla të rregullta policie.

Pas pak metrash, njëra veturë e ka tejkaluar dhe ia ka bllokuar rrugën. Pas kësaj, nën kërcënimin e armëve, i riu ka dorëzuar çelësat e veturës.

Viktima ka denoncuar rastin e grabitjes në komisariatin e policisë Laç. Forca të policisë së këtij komisariati janë vënë në ndjekje të grabitësve, por pa mundur që të kapin apo identifikojnë autorët.

“Shërbimet e Policisë dhe grupi hetimor menjëherë pas marrjes së njoftimit kanë shkuar në vendngjarje dhe po punojnë për fiksimin e çdo provë të vlefshme që do t’i shërbejë hetimit, për identifikimin e autorëve dhe zbardhjen e dokumentimin e kësaj ngjarje. Nga shërbimet e Policisë janë shoqëruar në Komisariatin e Policisë Kurbin disa shtetas që mund të kenë dijeni për ngjarjen, si dhe janë sekuestruar pamje filmike. Gjithashtu, janë ngritur pika kontrolli në hyrje-dalje, më qëllim kapjen e autorëve. Nën drejtimin e Prokurorisë së Rrethit Gjyqësor Kurbin, vijon puna për zbardhjen e dokumentimin e plotë të kësaj ngjarje”, thuhet në njoftimin e Drejtorisë Vendore të Policisë në Lezhë.

Ndërsa Drejtori I Përgjithshëm i Policisë Kriminale në Policinë e Shtetit në Shqipëri, Tonin Vocaj, tha për “KOHËN”, se ngjarja po trajtohet me prioritet.

“Ngjarja kriminale e regjistruar mbrëmjen e së dielës po trajtohet me prioritet nga policia, pasi është mjaft shqetësues rikthimi I këtyre grabitjeve. Grupe kriminale po veprojnë, ku për objektiv kanë automjetet luksoze ku pasi i grabisin i çojnë dhe i çmontojnë”, tha Vocaj.

 

---